¹ Bika tuavutuka mu nkanda wunuansonikina; diena diambote kua yakala mu lembua kuela nkento. ² Kansi mu diambu dia zimpukumunu, bika yakala kakala ye nkento wayani beni. ³ Yakala bindamene mu lungisa mbebe za nkento ani, ye bika nkento mpe kavanga mpila mosi kua yakala diani. ⁴ Nkento akuela kayalanga nitu ani ko kansi i yakala diani wuyala yo. Mpila mosi mpe, yakala kayalanga nitu ani ko kansi i nkento ani wuyalanga yo. ⁵ Ka wumosi ko fueti yimina wayani, vo ka nutekele wizana ko va kintete, mu diambu dia lusambulu. Mboki nulenda kueno diaka kala va kimosi, kidi Satana kalembua kunutonta mu diambu dia lembua kukiyala. ⁶ Ndongi ngieti kunuvana, kansi ka tumunu ko. ⁷ Nzolele vo antu awonsono akala nkievo mono. Kansi muntu muntu watambula wani nkayilu kua Nzambi; wankaka nkayilu wawu, wankaka nkayilu ewuna. ⁸ Kua mpumpa ye mafola, edi nkembi, diena kuani diambote mu kala mpumpa nkievo mono. ⁹ Kansi vo i mpasi mukukiyala, mbote mu kuela, kadi diena nkinzi mu kuela kidi walembua kuamusua kua nzinununu. ¹⁰ Kua akuela, ntumunu ngieti vana (ka mono ko, kansi Mfumu), ¹¹ Kansi vo vondele longo, kakuedi diaka ko; va kawa ko, kawizana ye yakala diani. Yakala kalendi vambana ye nkento ani ko.> ¹² Mu momo mankaka, edi nkembi (mono ngieti kamba, ka Nzambi ko), vo munkuikizi wakuela nkento kondolo munkuikizi ye tambudidi mu zinga yani, kalendi vambana yani ko. ¹³ Vo munkuikizi wakuelua kua yakala dikondolo munkuikizi ye tambudidi mu zinga yani, kalendi vambana yani ko. ¹⁴ Kadi yakala dikondolo munkuikizi, sakumunu mu kuma kia nkento ani. Nkento kondolo munkuikizi, sakumunu mu kuma kia yakala diani. Ana awu ka ena diaka asumuka ko, kansi asakumunua. ¹⁵ Kansi vo ndondo kondolo munkuikizi zolele vambana ye wayani, nunyambula diakadila mpila yoyo. Disongele vo munkuikizi wowo weka kimpuanza. Nzambi watubokila mu nkalasani ya luvuvamu ¹⁶ Nanga nkento wuna vulusa yakala diani. Nanga yakala wuna vulusa nkento. ¹⁷ Dimosi kaka diena, muntu muntu kazinga landila nkayilu wukatambula kua Nzambi. Katatamana kadila wonso Nzambi kambuanina mu ntangu yikambokila. Zozo i nsikudukusu zame mu mabundu mamonsano. ¹⁸ Yakala, nga diazengua diakala mu ntangu yikabokulu'e? Kavidisi dimbu kiokio ko. Nga ka diakala diazengua ko e? Kakadila mpila yoyo. ¹⁹ Diakala diazengua evo nkatu, ka diena mfunu ko; diamfunu i mu tumamana nsikudukusu za Nzambi. ²⁰ Muntu muntu kasikila wonso wukakadila mu ntangu yikabokulua kua Nzambi. ²¹ Nanga wakala mu ntangu yiwabokulua kua Nzambi e? Kukadila dio mayindu ko, kansi vo nzila yena, kituka kimpuanza. ²² Kadi diona wabokulua kua Mfumu mu kinanga kiani, yani wena wakulua mu Mfumu. Mpila mosi kua wabokulua mu kimpuanza kiani, yani weka nanga mu klisto. ²³ Mu ntalu nuasumbulua, i dina, kanukadi minanga mia antu ko. ²⁴ Zimpangi, Muntu muntu kasikila wonso wukakadila mu ntangu yikabokulua kua Nzambi. ²⁵ Mu mambu matadidi zimpumpa, kiena ye ntumunu ya Mfumu ko. Ngindu zame ngieti vana; mono i muntu wumosi wena wafuana mu siluavuvu, mu kuma kia nkenda za Nzambi. ²⁶ Diena diambote kua yakala mu kadila wonso wukenina mu diambu dia kuama kua ntangu yayi. ²⁷ Wakuela wen'e? Kuvondi longo ko. kuena wakuela ko e? kutombi kuela ko. ²⁸ Wamana kuela, kuvolele masumu ko. Vo mpe muan'ankento kuelolo, kavolele masumu ko. Muanki akuela zitu kikalanga yawu; mono nzolele kunuvengumunina zitu kiokio. ²⁹ Zimpangi, edi nzolele kamba, ntangu yikufamene. I diawu, tuka wawu, ayakala akuela, akala nkievo zimpumpa; ³⁰ eti dila, akala nkievo ka eti dila ko; eti yangalala, nkievo ka eti yangalala ko; eti sumba, nkievo ka ena lekua ko; ³¹ abakanga nluta mu lekua ya nza yayi, nkievo ka abeki nluta ko, kadi lekua ya nza yayi yeti vioka. ³² Nzolele nuakala avuvama. Mayindu ma yakala dia mpumpa makalanga mu Mfumu, yani wutombanga naweyi mu yangidikila Nzambi. ³³ Kansi mayindu ma yakala diakuela makalanga mu mambu ma nza; yani wuyindulanga naweyi mu yangidikila nkento ani, ³⁴ mayindu mani makalanga yeku yeku. Mayindu ma nkento walembua kuelua evo ma muan'andumba makalanga mu Mfumu, kidi nitu ye mpeve biavedila. Kansi mayindu ma nkento wakuelua makalanga mu mambu ma nza; yani wuyindulanga naweyi mu yangidikila yakala diani. ³⁵ Vo ngieti kamba diambu diadi, mu kuma kia ntomoso eno, kansi ka mukunukomina ko. Ngieti dio kamba kidi nuakala asungama ye nuakivana kua Mfumu mu lembua kala mayindu yeku yeku. ³⁶ Kansi vo nkuedi kazitisi nguizani ye nkento wuketi kuela (vo mimvu mikafueti kuedulua milutidi, diakadila mpila yoyo), mbote kalungisa luzolo luani; kavolele masumu ko. Longo luawu lufueti kala. ³⁷ Kansi vo wena wakuikama mu ntim'ani, lembua komunua kansi lenda kukiyala, ye zengele mu ntim'ani mu vanga dio, i sa vo tatamana ye nkento wuketi kuela, diambote kana vanga. ³⁸ I kuma, vo yakala kuelele, diambote kavengi, ye, diodio disolele mu lembua kuela, vengi dilutidi mu mbote. ³⁹ Nkento wukalanga wakangama kua yakala diani, vo yakala diodio diena moyo. Yakala vo difuidi, weka kimpuanza mu kuelua kua wonso wukazolele; kansi lufueti kala longo mu Mfumu. ⁴⁰ Mu mabanza mame nkento lembolo kuelua diaka wuna luta kala kiese.