¹ Ye yamona mu koko kua lunene kua nduna wavuanda vana kiti Kimfumu, n'kanda wasonukua mu kati ye ku nganda ye wakangulua mu dimbu nsambuadia. ² Yamona mbasi ya lendo yakala vovanga mu ndinga ya ngolo: " Nani wuna wafuana mu zibula n'kanda ye katula dimbu yani e?" ³ Kamuntu ko, mu zulu, kani va n'toto, kani kunsi a n'toto wakala wafuana mu zibula evo tanga n'kanda. ⁴ Yadila kuabidi kadi kavamoneka muntu wafuana mu zibula evo tanga n'kanda wowo ko. ⁵ Kansi mosi mu mbuta za nuna wantela: " Kudidi ko! Tala, Nkosi ya kanda dia Yuda, Muana wa David, wanunga. Wuna wafuana mu zibula n'kanda wowo ye dimbu yani nsambuadia." ⁶ Vakati kua kiti kia Kimfumu ye vangua ya yaa moyo, ye vakati kua mbuta za nuna, yamona muan'a Meme watelama vana; wakala ye mbonokono bonso yani wateka vondua. Wakala ye mpoka nsambuadia ye meso nsambuadia bina Mpeve nsambuadia za Nzambi zafilua va n'toto wam'vimba. ⁷ Wafinama ye wabaka n'kanda mu koko kua lunene kua nduna wakala wavuanda vana kiti kia Kimfumu. ⁸ Kiokio Muana Meme kabaka n'kanda, vangua ya ya moyo ye makumole ye ya ma mbuta zanuna bayizama van'tuala ani. Bakala muntu muntu ye nsambi mosi ye kopo diavangulua mu wolo diazala ye biamfuitisa, bita songela sambu bia minkuikizi. ⁹ Bayimbila n'kunga wampa: " Wuna wafuana mu baka n'kanda ye wula dimbu biani, kadi wayokua n'kayilu ye, mu menga maku, wakudila Nzambi bantu bamakanda mawonso, ndinga zawonso, n'kangu miawonso ye nsi zawonso. ¹⁰ Wabakitula nsi ye ngudi za nganga mu salu kia Nzambi eto, ye sibayala va n'toto." ¹¹ Bosi, yatala ye yawa ndinga ya mbasi zabidi mu mbela mbela ya kiti kia Kimfumu, ye vangua bia moyo ye mbuta zanuna. Ntalu awu ya wonso yakala makumi mamafunda makumi mamafunda ye mafunda mamafunda. ¹² Bakala vova mu ndinga ya ngolo: " Muana Meme wayokua n'kayilu wuna wafuana mu tambula lendo, kimvuama, nduenga, ngolo, n'kembo, nzitusu ye nsanusunu." ¹³ Yawa vangua biawonso biakala muna zulu ye va n'toto, kuna nsi a n'toto, vana zulu a mbu (ye biawonso bina mo). Biakala vova: " Nsanusunu, Nkembo, nzitusu, ye lendo kua ndondo wuna vana kiti kia Kimfumu ye kua Muana Meme mu ntangu zawonso." ¹⁴ Vangua ya bia moyo biavova: " Amene!", ye mbuta zanunu bayizama ye bakunda.