¹ Kiokio kia lumingu kialuta, Malia muisi Mangadala, Malia, ngudi a Yakobi, ye Salome basumba mafuta ma nsunga mpasi benda mo kusa mu nitu a Yesu mayumisa yo. ² Mu lumbu kia ntete mu lumingu, bayenda kuna ziami, n'siuka n'siuka, wuwu kina vo ntangu yavayika. ³ Bavovana yawu ye yawu: Nani sikatunungunina tadi, vana muelo a ziami e? ⁴ Ye, kiokio basendola meso, bamona vo tadi diakala dia nene, dianungunua. ⁵ Bakota muna ziami, bamona toko dia vuanda vana lunene wavuata mvuela ya mpembe ye bamona wonga. ⁶ Wabatela kalumoni wonga ko; luta sosa Yesu muisi Nazaleti, ndondo wakomono vakuluzu; wafutumukini, kena diaka vava ko; lutala fulu kina ban'tula. ⁷ Kansi luenda luavova kua N'longoki miani ye kua Petelo vo wuluvitidi kuna Ngalili, yi kuna siluammuena bonso kalutelele. ⁸ Bavayika muna ziami ye batina. Wonga ye zakamu diababuila, ye kabavova kani diambu kua muntu ko, mudiambu dia wonga wawu. ⁹ Yesu, bukafutumuka mu n'siuka wa lumbu kia ntete mu lumingu, wamonekena ntete Malia musi Mangadala, nduna kakudila mpeve nsambuadia zambi. ¹⁰ Wayenda nati nsangu kua bana bakala ye yani, ye bakendalala, ye bakala dila. ¹¹ Kiokio bawa vo wuna moyo, ye wammona, kabakuikila dio ko. ¹² Kunima ya momo, wamoneka mu mbonokono yan'kaka, kuababole mu yawu bakala mu nzila mukuenda kundambu za mavata. ¹³ Bavutuka mu vova wo kua ban'kaka, kababakuikila mpe ko. ¹⁴ Bosi, wakimonekesa kua kumi ye mosi, kiokio bakala vana meza; ye wababela mukuma kia kondua kuawu kua lukuikilu ye m'balu awu a n'tima, kadi kabakuikila bana bammona kina kafutumuka ko. ¹⁵ Ye wabatela: "luenda muawonsono mu nza lulonga nsangu zambote kua vangua ya wonsono. ¹⁶ Konso nduna kuikila ye botokua sikavuluzua, kansi nduna lembikuikila, sikayelosua. ¹⁷ Tala masivi simalanda bana bakuikila mu nkumbu amu: sibakula mpeve zambi; sibavova ndinga zampa; ¹⁸ sibasimba zinioka,vo banuini kima kia mpondi, kakikubavanga mpasi ko; Sibatula moko kua zimbevo, ye mbevo, sizaniaka. ¹⁹ Mfumu, kiokio kamanisa vova kua yawu, watombolua kuzulu ye wavuanda kuna lubakala lua Nzambi. ²⁰ Ye bayenda longela muawonso. Mfumu wakala sala ye yawu, ye wasiamisa mambu ma nzambi mu masivi makala mo landa.