¹ Ngiatukulu ya nsangu zambote za Yesu Klisto, muana a Nzambi. ² Bonso masonokua muna Yesaya, wa m'bikudi: " tala, mfidisi va n'tuala aku ntumua amu, yani sika kubika nzila aku." ³ Yiyi yi ndinga ya nduna bokanga muna makanga, lukubika nzila a mfumu, ye lusungika yinzila nzila yani. ⁴ Yowani wayiza, wam'botiki muna makanga ye walongelanga mbotokolo ya mvilukulu a mavanga. Mu mfungunu a masumu. ⁵ Nsi yawonsono ya Yuda ye bantu bawonso ba Yelusalemi bayendanga kua yani; ye, bafungunanga masumu mawu ye batambulanga mbotokolo kua yani muna nzadi a yolodani. ⁶ Yowani wavuatanga m'vuatu mia mika mia kamela ye n'kamba a bulu muna luketo. Wakala dianga makonko ye wiki wa mfinda. ⁷ Walongelanga vo: ku nima amu, ndondo wuta kuiza wundutidi mu lendo ye kina nkutu wafuana mu n'kutula n'singa mia nsapatu zani ko. ⁸ Mono yakulubotekele mu maza. Yani sikakuluboteka mu mpeve a nlongo. ⁹ Mu ntangu yina, Yesu watuka ku Nazaleti ye kuenda kuna ngalili. Ye wabotokua kua Yowani muna yolodani. ¹⁰ Muntangu ka vayika muna maza, wamona mazulu mazibuka ye mpeve yakulumuka mu yani bonso yembe. ¹¹ Ye ndinga yawakana muna mazulu ya vova: " ngeye yi muana amu a n'zolua, mu ngeye muna nzola amu yawonso. ¹² Vanavawu, Mpeve yannata kuna makanga. ¹³ Kuna kakala makumaya ma lumbu ye watontua kua satana. Wakala kuna ye bulu ya mfinda ye Mbasi zakala kun'sadila. ¹⁴ Ku nima, kiokio Yowani kamana yekolua, Yesu wayenda kuna Ngalili, kuna kakala longela n'samu a mbote wa Nzambi. ¹⁵ Wakala vova: " Ntangu yifuene, kimfumu kia mazulu kifinamene, luvilula mavanga ye lukuikila mu n'samu a mbote wampa." ¹⁶ Muntangu kakala lutanga kuna simu dia m'bu a Ngalili, wamona Simoni ye Andele, mpangi a Simoni. Bakala tuba konde muna m'bu, kadi bakala n'takudi. ¹⁷ Wabatela: " lundanda ye siyalukitula n'takudi mia bantu." ¹⁸ Vanavawu basisa makonde mawu ye ban'landa. ¹⁹ Kiokio Yesu kayenda kua nda fioti, wamona Yakobi, muana Zebedayi ye Yowani, mpangi ani, bakala muna n'lungu ye bakala vangulula makonde mawu. ²⁰ Vanavawu wababokela ye basisa Se diawu muna n'lungu, kintuadi ye bisadi, ye ban'landa. ²¹ Wayenda kuna kapenawumi, mu lumbu kia lumingu, Yesu wakota ntete muna nzo a Nzambi ye walongela. ²² Bawonso bayitukua mu malongi mani, kadi walongela bonso mfumu kansi ka bonso min'soniki ko. ²³ Muna nzo a Nzambi awu muakala muntu mosi wakala ye mpeve yasumuka, wakaya mu ngolo zawonso: ²⁴ " Nkia diambu vakati kua yeto ye ngeye, Yesu muisi Nazaleti e? Wizidi mu kutuvidisa e? Nzeye ngeye yinani, wuna wan'longo wa Nzambi. ²⁵ Yesu wannuanisa, wata: " kanga nua aku ye vayika mu muntu ndondo!" ²⁶ Ye mpeve yasumuka yavayika mu muntu ndondo, yannikuna mu ngolo zawonsono ye yakaya mu ngolo za wonso ²⁷ Bawonso bayitukua ye bakiyuvula yawu ye yawu: " nkidiaka kiki e? ndongolo zampa ye wisa! Wutatumina mpeve zasumuka mu lendo kiawonso, ye zitakun'tumamana. ²⁸ Ye tunda diani diayenda vanavawu muna yinzungidila ya wonso ya Ngalili. ²⁹ Mu mpayikulu ya nzo a Nzambi, wayenda kintuadi ye Yakobi ye Yowani kuna nzo ya Basimoni ye Andele. ³⁰ N'zitu a Simoni wakala walambalala, wakala ye yuku yuku. Vanavawu bata n'samu ani kua Yesu. ³¹ Muntangu kafinama , wan'telamesa mu koko kuani. Vanavawu yuku yuku dian'katuka ye wan'sadila. ³² Mu nkokela kunima ntangu, banata kua yani mbevo zawonso ye bantu bakala ye mpeve za diabulu. ³³ ye mbanza yawonso yakutakana vana muelo ani. ³⁴ Waniakisa mbevo zabidi za mpila mu mpila ye mpe wakula mpeve zabidi za diabulu, ye kavana nkutu luve kua mpeve za diabulu zavova ko, kadi zan'zaya. ³⁵ Mu n'siuka, wana tombe kakiamanisi eti ko, watelama, wayenda kuna makanga kuna kasambidila. ³⁶ Simoni ye bawonso bakala yani ban'sosa. ³⁷ Kina ban'solola, ban'tela: " bantu bawonso beta kusosa." ³⁸ Yani wabavutudila: " tuenda kua n'kaka muna mbanza za kinzungidila, yalongela mpe. Kadi yi dina mvayikidingi. ³⁹ Wayenda ye walongela mu zinzo za Nzambi muna Ngalili yawonso ye wakula mpe mpeve za diabulu. ⁴⁰ N'kua wazi wayiza kua yani, wafukama, wata mu kiadi kia wonso: " vo zolele, lenda kumvelelesa. ⁴¹ Yesu wamona kiadi kia bidi, walambula koko kuani, wan'simba ye wata: " nzolele wo, kala wavelela." ⁴² Vanavawu wazi wan'katuka ye wavelela. ⁴³ Yesu wam'vutula vanavawu ye wan'vana nsikudukusu zangolo, ⁴⁴ ye wan'tela: Keba kuaku mu ta nsangu zozo kua muntu a n'kaka. Kansi wenda kisonga kua Ngudi a nganga ye vana n'kayilu mukuma kia velela kuaku, ye yawonso yasikidikisa Mose, mpasi vo yakala kimbangi kua yawu. ⁴⁵ Kansi muntu ndondo, wayenda, wata nsangu zozo mu ngolo zawonso ye muawonso, nate nkutu Yesu kalenda diaka kota va tendankongolo mu mbanza mosi ko. Wakala vuandanga kuna nganda a zimbanza , kuna makanga. Ye bantu bakala tuka mu ndambu ye ndambu.