¹ N'kembo wa mampa makondua funusua, wabokololuanga Paska wafinama. ² Ngudi za Nganga ye min'soneki bakal sosa mpila bafete vondela Yesu, kansi bakala mona wonga wa n'kangu. ³ Satana wakota mu Yuda Isikalioti, mosi mu kumi ye zole. ⁴ Yuda wayenda mokena kua Ngudi za Nganga ye mfumu za min'kengi mu mpila kafete kubayekolela Yesu. ⁵ Bamona kiese ye bayizana mu kum'vana bongo. ⁶ Bawizana ye bayantika sosa ntangu ya mbote mu kubayekolela Yesu kondua n'kangu kazaya. ⁷ Lumbu kia n'kembo wa mampa ma kondua funusua kiokio bafete vonda muana a meme wa paska kiafuana. ⁸ Yesu watuma Petelo ye Yowani wavova: " luenda kutukubikila madia ma Paska mpasi tua dia mo." ⁹ Ban'tela: " Kueyi zolele tuakubikila mo e? " ¹⁰ Wabavutudila: " luwa, kiokio siluakota muna mbanza, siluawawana ye muntu mosi neti m'vungu wa maza. Lun'landa ye lukota nate muna nzo yina kakota. ¹¹ Ye siluavova kua mfumu a nzo: " N'longi wutelele: " kueyi kuna suku siyadila Paska ye n'longoki miamu e? " ¹² sikakulusonga suku dia n'tandu dianene, dina ye biti ye biawonso bifuene. Yi muna lukubikila wo." ¹³ Bayenda ye bawana mawonso mpila katela mo. Ye bakubika madia ma paska. ¹⁴ Kiokio ntangu yafuana, wavuanda ye n'longoki miani. ¹⁵ Wabatela: " yazolele kibeni dia madia mama ma Paska ye yeno tekela ya mona mpasi. ¹⁶ Kadi, yilutelele wo, kidia mo diaka ko nate kina malungana muna kimfumu kia Nzambi." ¹⁷ bosi, Yesu wabaka mbungu ye kiokio kamana vutula matondo,wavova: " lubaka yiyi ye lukayana yo yeno ye yeno. ¹⁸ Kadi, yikutele dio, kisala nua diaka yitukidi mu bundu kia vinia ko nate kifumu kia Nzambi kikuiza." ¹⁹ Bosi, wabaka dimpa, ye kiokio kamana vutula matondo, wabukuna dio, ye wabavana dio ye wavova: " yiyi yi nitu amu yiveno mudiambu dia yeno. Luvanganga dio mu kumbambukila moyo." ²⁰ Mpila mosi, kunima ndilu, wabaka mbungua wavova: " mbungua yiyi yi yaluwawanu lua mpa mu menga mamu matengokele mudiambu dia yeno. ²¹ Kansi lukeba, Ndondo kungiekola wuna yamu vava meza mama. ²² Kadi Muana a muntu wuta kuenda landila mpila makubamena. Kansi kiadi kua muntu ndondo kungiekola! " ²³ Ye bayantika yuvasana yawu ye yawu, nani vakati kia yawu vanga dio. ²⁴ N'zonza miabua mpe vakati kua yawu mu matadidi nani mu yawu lutidi nene kua ban'kaka. ²⁵ Wabatela: " n'tinu a mim'pakanu wubayadidi, ye bana bena ye luyalu kua bawu babokololuanga n'giadi mia nzitusu. ²⁶ Kansi kadikala mpila mosi ko kua yeno. kansi nkutu, bika ndondo lutidi nene mu yeno kakala bonso lutidi ke. Ye nduna lutidi m'funu kakuma bonso yani yi n'sadi. ²⁷ Kadi nani lutidi nene: ndondo wuna va meza yevo nduna wuta kaya e? Nga kaluzeye ko vo yi ndondo wuna vana meza e? Kansitu, ngina vakati kua yeno bonso nduna wuta kaya. ²⁸ Kansi luna bana bazizila ye mono mu ntontolo zamu. ²⁹ Yiluvene kimfumu bonso Se diamu kamvanina kimfumu. ³⁰ Mpasi vo luadia ye luanua va meza mu kimfumu kiamu. Ye mpasi vo luavuanda va yandu ya kitinu ye lufundisa kumi ye zole dia makanda ma Isaeli. ³¹ Simoni, Simoni keba, satana lombele ka vua mpasi kalutisa mu kiyungulu bonso nginga ya ble. ³² Kansi yasambidi mu kuma kiaku mpasi vo minu kiaku kakiyoyi nkutu ko. Mpasi vo kiokio vutuka , wasiamisa mpagi zaku." ³³ Petelo wan'tela: " Mfumu, ngina wakubama mu kuenda yaku muna boloko ye kuna lufua." ³⁴ Ye Yesu wantela: " Petelo, yikutelele dio, nsusu ya koko kayikikokolela ko wunu, vo ngeye kumvakudidi n'kalu nkumbu tatu ko vo kunzeye ko. " ³⁵ Wabatela diaka: " kiokio yalufila kondua kua mbongo, kondua kua nkutu ya nkuta ye kondua kua nsampatu, nga luakondua konso kua kima e? " Bavutula: " nkatu kibeni " ³⁶ Ye wabatela: " kansi wuwu, konso wuna ye mbongo kabaka, ye mpila mosi wuna ye nkutu bika kabaka yo. Konso nduna kondolo mbele a luyalu, kateka m'vuatu ani ye kasumba yo yi mosi. ³⁷ Kadi yikulutelele dio, mana masonama mu mono mafeti lungana: " wabakulua bonso mosi wuna ku nganda a n'siku." ³⁸ Bavova: " Mfumu, tala mbele zole za luyalu. " Wabatela: " zifuena." ³⁹ Ku nima ya ndilu, Yesu wayenda bonso wakala fu kiani, kuna mongo wa Olive, ye n'longoki miani mian'landa. ⁴⁰ Mu ntangu baluaka, wabatela: " lusambila mpasi kalubue mu ntontolo ko." ⁴¹ Bosi wavaluka ye bawu mu tezo kia tini kia ntubulu a tadi ye wafukama, wasambila ⁴² Wavova: " Tata, vo zolele dio, katula mbungua yiyi mu mono. Kansi, ka mu luzolo luamu ko, kansi bika luzolo luaku luavangama." ⁴³ Mudina, Mbasi a zulu yam'vayikila mu kun'siamisa. ⁴⁴ Muna wonga wuna, wasambila mu ngolo zawonso ye kiufuta kiani kiakuma bonso matonsi manene ma menga makala bua vana n'toto. ⁴⁵ Kiokio kamanisa sambila, wayiza kua min'longoki, ye wabawana baleka mu diambu dia kiadi kiawu, ⁴⁶ ye wabayuvula mudiambu dia nki lulekele? Lusikama ye lusambila mpasi kalubue mu ntontolo ko." ⁴⁷ Muntangu yoyo kakala vovanga, tala, n'kangu wayiza ye Yuda, mosi mu kumi ye zole, wakala kubatuadisa. Wafinama kua Yesu mu kum'fiba, ⁴⁸ kansi Yesu wan'tela: " Yuda, nga yi mu mfiba wutayekolela Muana a muntu e?" ⁴⁹ Kiokio bakala ye Yesu bamona mana makala vioka, bavova: " Mfumu, situazuba mu mbele ya luyalu e?" v 50 Ye monsi mu yawu wazuba n'sadi a ngudi za nganga, ye wan'zenga kutu kua lunene. ⁵¹ Yesu wavova: " yimene, luyambula!" ye wasimba kutu kuani ye waniakisa ko. ⁵² Bosi Yesu wavova kua ngudi za nganga, kua mfumu za nzo a Nzambi ye kua bakuluntu ban'yizila: " lutakuiza bonso kua kimpumbulu, ye mbele za luyalu ye m'bota mia nene? ⁵³ Kiokio yakele yeno lumbu yawonso muna nzo a Nzambi, kaluantudidi moko ko. Kansi yiyi yi wola eno, ye yoyo ya lulendo lua tombe." ⁵⁴ Kiokio bam'baka, bannata ye ban'luakisa kuna nzo a ngudi a nganga. Kansi Petelo, wakala kun'landanga kuanda. ⁵⁵ Kunima lunga tiya vana kati kua yanzala ye bavuanda vakimosi, Petelo wavuanda ye yawu. ⁵⁶ N'sadi mosi wan'kento wammona, kadi wakala wavuana vana n'temo a tiya, wan'tungununa ye wavova: " muntu ndundu mpe kele ye yani." ⁵⁷ Kansi Petelo wavakula n'kalu, ye wavova: " muana n'keno, kin'zeye ko." ⁵⁸ Ntangu yafioti yaluta, wan'kaka wammona ye wavova: " wuna mpe mosi mu yawu." Kansi Petelo wavova : " muana yakala, kina wo ko." ⁵⁹ Kunima tezo kia wola mosi, wan'kaka diaka wasiaminina vova: " kieleka, muntu ndundu kele diaka ye yani kadi wuna musi ngilili." ⁶⁰ Petelo wavutula: " muana yakala, kizeye ko nki zolele vova." Vana nawu, kiokio kakala vova, koko dia nsusu dia kokola. ⁶¹ Kiokio Mfumu kabaluka, watala Petelo. Ye Petelo wabambuka moyo mu mambu Mfumu kan'tela: " Tekela nsunsu yakokola, wunu kiki, siwamvakudila n'kalu nkumbu tatu." ⁶² Ye kiokio kavayika, wadila kua yingi. ⁶³ Bantu bakala simba Yesu bakala kun'sakanena ye kun'zuba. ⁶⁴ Kunima ya mana kum'fika zidi, ban'yuvula: " bikula, nani wukuzubidi e?" ⁶⁵ Bavova mambu mayingi man'kaka mambi ye ma luvuezo kua yani. ⁶⁶ Kiokio kaka kuma kua kia, kimvuka kia mbuta za n'kangu, nganga za Nzambi za mbuta ye min'soneki bavuanda mu lukutakanu. Banata Yesu muna lukutakanu luawu, ⁶⁷ ye bavova: " vo wu Klisto, wututela." Kansi wabatela: " vo yilutelele wo, kalukuikila dio ko; ⁶⁸ ye vo yiluvene ngiuvu, kaluvana mvutu ko. ⁶⁹ Tuka mu wunu, Muana a muntu sikavuanda kuna lunene lua lulendo lua Nzambi." ⁷⁰ Bavova bawonso: " disongele vo wuna Muana a Nzambi e? " Ye wabavutudila: " luvovele wo, ngina wo." ⁷¹ Mu diodio Bavova: " mudiambu dia nki tunina diaka ye nsatu a kimbangi e? Kadi tun'guidi yeto mosi mu nua wayani kibeni."