¹ Yesu, kina kasempole meso, womona bantu bamvuama bakala tula n'kayilu miawu muna kitunga. ² Wamona diaka fola dia mputu, watula mo sengo yole ya mbongo. ³ Ye wavova: " mu kieleka, yilutelele dio, fola didi dia mputu ditudidi lutila bawonso bobo ban'kaka. ⁴ Bawonso babakidi muna n'luta miawu mu vana min'kayilu. Kansi fola didi, tudidi kina kena kiawu, kiawonso kakele kiawu mu zingila. ⁵ Kina vo ban'kaka bakala vovela nzo a Nzambi, neyi ya tudulua ntoko mu matadi mantoko ye min'kayilu, wavova: ⁶ " mu bima biobio lutamona, lumbu siyiza yoyo, kavena tadi vana ntandu a tadi ko dilembi kunkulua." ⁷ Ban'yuvula : " N'longi, wana nkiantangu mambu momo simakala e? " Ye nkia sinsu sikiakala kina mambu momo simakala e?" ⁸ Yesu wavutula: " Lukeba kaluvukumunua ko. Kadi babidi sibeza mu nkumbu amu, ye vova: " yi mono ye ntangu yifinamene, kalubalandi ko." ⁹ Kiokio siluawa beta vovela zimvita ye ntelamanu, kalukadi ye kinkenda ko, kadi mambu momo mafete tekakala, kansi nsukulu kayikala vana vawu ko." ¹⁰ Ikuma wabatela: " n'kangu mosi siwatelamana n'kangu wa n'kaka, ye kimfumu kua kimfumu kia n'kaka. ¹¹ Sikuakala ye ndikuka za ngolo za n'toto, ye mu fulu bia mpila mu mpila, m'vengele ye vuku. Sikuabua mambu ma ngitukulu, ye sinsu ya nene muna zulu. ¹² Kansi, tekela mawonso momo, sibalutula moko, sibalukuamisa, sibakuluyekola kuna zinzo za tukutakanu, sibalutuba muna boloko, sibalunata va n'tuala a min'tinu ye va n'tuala a zimfumu za zunga mu diambu dia nkumbu amu. ¹³ Momo simaluvana mpuasika mu ta kimbangi. ¹⁴ Idiawu, kalutudi dio nkutu mu n'tima mieno ko muteka yindula kukitanina kueno. ¹⁵ Kadi siyaluvana m'vovo simiakala m'funu ye nduenga yoyo mbeni zeno zawonso kabalendi telamena yevo nuanisa ko. ¹⁶ Kansi siluayekolua kana nkutu kua mase ye ngudi zeno, kua mpangi zeno, kua mfinangani zeno ye bakundi beno, sibavondesa babidi mu yeno. ¹⁷ Siluamangua kua bawonso mu kuma kia nkumbu amu. ¹⁸ Kansi kavavila kana lusuki lua n'tu eno ko. ¹⁹ Mu luvibudulu lueno, siluavukisa miela mieno. ²⁰ " Kiokio siluamona Yelusalemi dizungidilu kua makambi ma makesa, wana luzaya vo mbuilu ani yifinamene. ²¹ Ikuma, bana sibakala muna Yuda batina kuna miongo, bana sibakala muna kati kua mbanza bavayika ye bika bana sibakala mu kinzungidila kabakoti ko. ²² Kadi siyakala lumbu ya vutula kunda mukuma kia ndungusulu ya mawonso masonekua. ²³ Kiadi kua bakento bana sibakala ye lukawu ye bana sibakala yemeka mu lumbu yina! Kadi sikuakala ye kiadi kiayingi mu nsi, ye ngazi kua n'kangu. ²⁴ Sibabua kunsi a mbele a luyalu, sibanatua mu kinanga muna nsi zawonso ye Yelusalemi sidiadiatua mu malu kua mim'pakanu nate ye ntangu ya mim'pakanu yilungana. ²⁵ Simuakala ye sinsu muna ntangu, muna ngonda ye muna ntentembua. Ye va n'toto, sivabua kingongo vakati kua n'kangu miomio kamilenda zaya mana bafeti vanga mu diambu dia mazu ma m'bu ye mayo mani ko. ²⁶ Bantu sibafua mu wonga wavingila momo simeza va n'toto. Kadi tulendo tua mazulu situakunkuka. ²⁷ Bosi, siluamona muana a muntu sikeza mu tuti mu lulendo ye n'kembo wanene. ²⁸ Kiokio mambu momo mayantika moneka, luvumbuka ye luvumbula n'tu mieno, kadi luvuluzu lueno lufinamene." ²⁹ Yesu wabatela ngana yi mosi : " lutala n'ti wa muniengie ye n'ti miawonso. ³⁰ Kiokio misasidi, siluazaya mu tala mio, vo nsungi ya mbangala yifuene. ³¹ Mpila mosi, kiokio siluamona mambu momo malueke, luzaya vo kifumu kia Nzambi kifinamene. ³² Mu kieleka yikulutele dio, mbandu yiyi kayi lendi luta ko vo mambu mama mawonso kamavangamene ko. ³³ Zulu ye n'toto sibiavioka, kansi m'vovo miamu kamilendi vioka ko. ³⁴ Lukikeba mu yeno kibeni, mpasi vo n'tima mieno kamifuluki kua mambu ma nsoni, kua kinduvu ye kua ngindu za luzingu, yevo lumbu kina kakiluyizila ku kinsusumukina ko, bonso n'tambu. ³⁵ Kadi sikiza kua bawonso bazingilanga vava n'toto wawonso. ³⁶ Lukaya meso mu ntangu zawonso, lusambila mpasi luakala ye ngolo mu tina mambu momo mawonso meta kuiza, ye kala watelama va n'tuala a Muana a muntu." ³⁷ Mu diodio, mu lumbu biobio Yesu kakala longanga muna nzo a Nzambi, wakala kuenda lekanga kuna mongo wabokololua mongo wa Olive ³⁸ N'kangu wawonso wakala kuizanga mu n'suka n'suka muna nzo a Nzambi mu kun'gua.