¹ Wuwu, m'futisi mia mpaku miawoso ye n'sumuki mian'kaka miakala kuiza kua Yesu mu kuiza wa. ² M'falisi ye n'soniki miakala vunguta yawu ye yawu, bavova: " muntu ndondo tambulanga basumuki ye dianga nkutu ye Yawu." ³ Yesu wata gana eyi, wabatela: ⁴ " nani vakati kua beno vo wuna ye nkama ya mameme ye vidisi dimosi mu mawu, kalembi sisa luvua ye vua muna makanga ko, ye kuenda sosi diodio divididi nate ye kina kasolola dio e? ⁵ Ye vo solole dio, tudidi dio va mavembo mani ye yangalele. ⁶ Kiokio kaluake kuna nzo, kutakese bakundi bani ye mpangi zani, ye wubatelele: " luyangalala ye mono, kadi mbuene meme diamu diavila." ⁷ Yidina, yilutelele vo kiese sikiakala muna zulu mukuma kia n'sumuki mosi vilukidi, kansi ka mu luvua ye vua lua balunungu ko lukondolo nsatu ya viluka. ⁸ Yevo Nkia n'kento vuidi sengo kumi ya mbongo, vo vidisi kimosi, kalembi kuika muinda, kombola nzo, ye sosa kio nate ye kimoneka. ⁹ Ye kiokio kamuene kio, kutakese bakundi bani ye bantu bakinzungidila ye kubatela: "luyangalala kintuadi ye mono, kadi mbuene sengo kiamu kia mbongo yavidisi." ¹⁰ Ikuma, yikulutelele dio, kiese kikalanga vakati kua Mbasi za Nzambi kiokio n'sumuki wuvilukidi." ¹¹ Bosi Yesu wavova: " muntu mosi wakala ye bana bole bayakala, ¹² Nduna watoko vakati kua yawu wavova kua Se diani: " tata, wumvana wuwu ndambu ya fua diamu. " Ikuma, wakayanesa kimvuama kiani kua bawu. ¹³ Lumbu yaluta, toko diodio wakutakesa bima biani biawonso ye wayenda kuna nsi ya nda, ye kuna wamana sakanena mbongo zani, mu sumba yina kavua m'funu ko, wabebesa mbongo zani mu luzingu lua mbi. ¹⁴ Kiokio kamana zo sakanena, m'vengele wangolo wabua muna nsi yoyo yawonso. Ye wayantika fua nsatu. ¹⁵ Wayenda kisonekesa mu salu kua muntu mosi mu besi nsi yoyo ndondo wan'tuma kuna mpatu ani mu dikilanga zingulu. ¹⁶ Wakala zola dia madia makala diwa kua gulu zozo, kadi kamuntu mosi ko wan'vananga madia. ¹⁷ Kansi kina toko diodio kavutuka mu yani kibeni, wavova: " n'sadi min'kua mina kua Se diamu mina ye madia mafuana, ye ngina vava, ngita fua nsatu! ¹⁸ Siyakatuka vava ye kuenda kua Se diamu, ye siyavova: " Tata, nsumukini kua zulu ye kua ngeye. ¹⁹ Kina diaka wafuana ko mu bokololua muana aku; wumbaka mosi mu n'sadi miaku." " ²⁰ Ikuma, muana toko wakatuka ye wayiza vutuka vua Se diani. Kiokio kakala ntete kua nda, Se diani wammona ye wamona kiadi kiayingi bosi walemoka wakituba muna nsingu ani ye wan'gimba. ²¹ Muana wan'tela: " Tata, nsumukini kua zulu ye va meso maku. Kina diaka wafuana mubokololua muana aku ko." ²² Se wavova kua n'sadi miani: " Lunata mu n'sualu mvuela yilutidi wete ye lum'vuatisa yo ye luntula mpeto mu n'lembo ani, ye nsampatu mu malu mani. ²³ Ye diaka lunata muana ngombe wamafuta ye luvonda wo. Tudia ye tusala n'kembo. ²⁴ Kadi mua amu wakele wafua kansi wuwu wuna wamoyo. Wakele wavila ye wuwu solokele." Ye bayantika n'kembo. ²⁵ Mu ntagu yina, mbuta ani wakala kuna mpatu. Kiokio kakala kuiza ye kafinama ye nzo, wawa min'kunga ye makinu. ²⁶ Wabokela mosi mu min'sadi ye wan'giuvula keti nkia mambu momo. ²⁷ N'sadi wan'tela: " mpangi aku vutukidi kuna nzo ye Se diaku vondele muana ngombe wamafuta, kadi vutukidi kondua kua vonza." ²⁸ Muana a mbuta wafuema ye kazola diaka kota muna nzo ko, kansi Se diani wavayika ye wan'dodokela . ²⁹ Kansi muana mbuta wavutula ye wavova kua Se diani: " tala, mvula zabidi yitakusadila, ye kisidi diata kani n'siku mosi mu n'siku miaku ko, kansi, kua mvene kani muana ngombe ko, mpasi yasala n'kembo ye bakundi bamu, ³⁰ Kansi kiokio muana aku kezidi, ndondo sakanene bima biaku ye bakento ba ndumba, vondele muana ngombe wamafuta." ³¹ Se wan'tela: " Muana, wuna yamu lumu yawonso ye bima biamu biawonso bina biaku. ³² Kansi dina diambote kua beto mu sala n'kembo ye yangalala, kadi mpangi aku ndundu wakele wafua ye wuwu wuna wamoyo; wakele wavila ye wuwu monekene."