¹ Lumbu kimosi kia lumingu, kiokio kakala kuenda kuna nzo ya wumosi mu zimfumu za min'falisi mu dia dimpa, m'falisi miakala toma kun'landila. ² Tala van'tuala ani vakala ye muntu mosi wakala ye mpasi zavimba nitu. ³ Yesu wayuvula kua bazeye n'siku mia Bayudayo ye kua mim'falisi: " nga n'siku eto wuvene luve mu niakisa mu lumbu kia lumingu yevo nkatu e?" ⁴ Kansi bakala napi. Ikuma Yesu wan'simba, wanniakisa ye wan'giambula kenda. ⁵ Wabatela: " nani mu beno wuna ye muana yevo ngombe yibuidi muna wulu mu lumbu kia lumingu, sikan'katula mo vana vawu ko e? " ⁶ Kabalenda vana mvutu mu mambu momo ko. ⁷ Kiokio Yesu kamona neyi bobo babokolosua ku n'kembo bakala solela fulu ya nzitusu, wata ngana mosi wabatela: ⁸ " Mu ntangu bokoloso ku n'kembo wa longo, kuvuandidi va fulu ya nzitusu ko, kadi dilenda kala vo muntu wukulutidi mu nzitusu wabokoloso. ⁹ Kiokio muntu wulubokelese beno bakulu sikaluaka, sikatela : " vana fulu kiaku kua nduna wan'kaka", Ye wana, mu nsoni, siwenda baka fulu kuna nima. ¹⁰ Kansi kiokio bokoloso, wenda ye vuandila kuna nima, mu ntangu ndondo wubokelese kaluaka, lenda kutela : " n'kundi, wenda kuna n'tuala. " wana siwazitusua va n'tuala a bawonso bavuende yaku vana meza. ¹¹ Kadi konso kitombola sikakululua, ye konso nduna kikulula sikatombolua." ¹² Yesu wata diaka kua muntu ndondo wam'bokelesa: " kiokio wutakubika ndilu ya muini yevo ya nkokela, kubokelesa bakundi baku, yevo mpangi zaku, yevo Mase maku, yevo bakundi baku bamvuama ko, kadi bawu mpe balenda kubokelesa mu lumbu kia n'kaka, ye kuvutudila mpila mosi. ¹³ Kansi kiokio wutakubika n'kembo, bokelesa bamputu, makoka, mim'vanguki, ye mpofo, ¹⁴ ye siwakala mu kiese, kadi kabalendi kuvutudila mpila mosi ko. kadi siwayindudulua muna mfutumukunu ya balunungu. ¹⁵ Kiokio wumosi wavuanda ye Yesu vana meza kawa mambu momo, wan'tela: " Kiese kua nduna siwadia dimpa muna kitinu kia Nzambi! " ¹⁶ Kansi Yesu wan'tela: " muntu mosi wakubika ndilu yanene ye wabokelesa n'kangu wabidi. ¹⁷ Muntangu ndilu yakubama, wafila n'sadi miani mpasi miatela bana babokolosua: " luiza wuwu kadi biakulu bikubamene." ¹⁸ Yawu awonso bayantika lomba n'levo mpila mosi. Wantete wan'tela: " mpatu mosi yasumbidi ye mfete kuenda yo tala. Wundevokela, vo dilendakana." ¹⁹ Ye wan'kaka wan'tela: " makabu tanu ma ngombe zizole zizole yasumbidi, ye ngiele zo teza. Wundemvokela, vo dilendakana." ²⁰ Ye muntu wan'kaka wavova: " yakuelele, yidina kilendi kuiza ko." ²¹ N'sadi wowo wayenda ye wavova mambu momo kua mfumu ani. Idina, mfumu a nzo wafunga nganzi ye tele kua n'sadi ani, : " wenda n'sualu muna bala bala ye muna fulu ya mbanza ye nata kuku, bamputu, makoka, mpofo ye m'vanguki mia malu." ²² N'sadi wavova: " Mfumu ,momo tumini mavangamene, kansi fulu yakinu kaka." ²³ Mfumu wavova kua n'sadi: " wenda mu nzila zanene ye mu mbela mbela ya tupangu tuakangua mu min'ti yevo zimvuma, ye lubanata mu kingolo mpasi nzo amu yazala. ²⁴ Kadi yilutelele, kamosi ko mu bobo babokoloso wayeleka dia kuamu." ²⁵ N'kangu wabidi wayenda yani, wabaluka ye wabatela: ²⁶ " vo muntu wizidi kua mono ye kamengene Se diani, ngudi, n'kento, muana, mpangi za yakala ye za bakento ko, ingeta, ye luzingu lua yani kibeni, kalendi kala n'longoki amu ko. ²⁷ Konso nduna kabaka kuluzu diani ko ye kundanda kalendi kala n'longoki amu ko. ²⁸ Kadi nani mu yeno, ndondo zolele tunga nzo ya zangama, kalembi vuanda ntete, ye yinda ntalu ye zaya vo wuna ye bina kavuidi nsatu mu kudika bio e? ²⁹ Mu mpila ya n'kaka, kiokio kasadidi lufulu ye kena wafuana ko mu manisa, bawonso beta kummona si bayantika kum'vueza ³⁰ ye vova: " muntu Ndondo wayantikidi tunga ye kakele wafuana ko mu manisa." ³¹ Yevo nkia n'tinu, mu ntangu ketakuenda kuna mvita kua n'tinu wan'kaka, kalembi vuanda ntete ye lomba malongi keti vo wuna wafuana, mu mafunda kumi ma bantu, mu nuana ye n'tinu wa n'kaka wuta kuiza kua yani ye mafunda makumole ma bantu e? ³² Ye vo nkatu, mu ntangu yoyo wa n'kaka wakinu kua nda, fididi ntumua mu yuvula mana mafuanakene mu tula luvuvamu. ³³ Mudina, ka mosi ko mu yeno lenda kala n'longi amu vo kasisidi mawonso mena yani ko. ³⁴ Mungua wuna wambote, kansi vo mungua wuvidisi n'zenzo ani, neyi diaka wulenda vutudila n'zenzo e? ³⁵ Kawukala diaka m'funu ko mu n'toto yevo mpe mu mbolela. Siwatubua kuna nganda. Konso wuna ye makutu mu wa, kawa."