¹ Bantu babidi bakivana mu soneka nsangu za mambu mavangama vakati kua yeto. ² Landila mana tuatambukusua kua bana bakala mbangi za mona meso tuka kuna ngiantukulu ye bakuma n'sandi mia mambu ma Nzambi. ³ Ikuma, mono mpe, yamona dio diambote mu toma yuvula tuka kuna ngiantukulu mpasi yasoneka mukuma kiaku, nsangu zatoma kubukua, n'kuluntu Teyofile. ⁴ Nzolele vo wazaya kieleka kia ndongolo zozo wabaka. ⁵ Mu ntangu Elode kakala n'tinu wa Yuda, vakala Nganga a Nzambi yabokololongo Zakalia, wakala mu kimvuka kia zinganga za Abia. N'kento ani wakala mu n'kuna wa Aloni, wakala ye nkumbu ya Elizabeti. ⁶ Yawu a wabole bakala bankua lunungu va meso ma nzambi, bakala zitisanga min'siku ye ntumunu zawonso za Mfumu bonso wufuene. ⁷ Kansi kabakala ye muana ko, kadi Elizabeti wakala sita, ye yawu a wole bakala bataluka mu mim'vu mu tandu kina. ⁸ Lumbu kimosi Zakalia wakala sala salu kiani kia kinganga van'tuala Nzambi, yakala ntangu yakimvuka kiani mu sala kio, ⁹ landila fu kia salu kia kin'longo, mu nsololo ya Nganga nduna feti sala, wasolua mu ta wadi mukota mu nzo a Mfumu mpasi kayoka biamfuitisa. ¹⁰ Lukutakanu lua wonso lua n'kangu luakala sambila vana nganda mu ntangu ya n'kayilu wa biamfuitisa. ¹¹ Mbasi ya Nzambi yammonekena, yatelama va lubakala lua zikua dia biamfuitisa. ¹² Kiokio kamona Mbasi, Zakalia wavila zayi ye wamona wonga wayingi. ¹³ Kansi Mbasi yan'zayisa: " kumoni wonga ko, Zakalia, kadi sambu kiaku kiwakane. N'kento aku Elizabeti sikakuwutila muana wayakala ye si wam'vana nkumbu ya Yowani. ¹⁴ Sikakala kua ngeye n'samu wa kiese ye wa mayangi, ye babidi sibayangalala mu ngutuka ani. ¹⁵ Sikakala wanene van'tuala Mfumu, kalendi sala nua kani vinu yevo malavu ma ngolo ko. Sikakala wazalua kua mpeve tuka muna vumu kia ngudi ani. ¹⁶ Ye ba Isaeli babidi sibabangumuka kua Mfumu Nzambi awu. ¹⁷ Sikadiata va n'tuala Nzambi, mu Mpeve ye lendo kia Elia, mu vutula n'tima wa Mase kua bana bawu ye tuadisa yimpumbulu mu diata bonso mu nduenga za bankua lunungu, mpasi mu vangila Mfumu n'kangu wuna wan'kubikilua." ¹⁸ Zakalia wavova kua Mbasi: " neyi siyazayila dio e?" Kadi ngina wanuna kibeni ye n'kento amu wuna watoma nuna." ¹⁹ Mbasi wam'vutudila: " Mono yi Ngabilieli, nduna telamanga vana n'tuala a Nzambi. Yafidisu mu kutela ye kuzayisa nsangu zizi zambote. ²⁰ Wuwu, siwakuma baba, kuvova diaka ko nate lumbu sikialungana mabu mama, kadi kukuikidi mu m'vovo miamu ko mina milungana mu ntangu yina." ²¹ N'kangu wakala vingila Zakalia ye bayitukua vo wazingila kibeni muna suku dia kin'longo. ²² Kiokio kavayika, kalenda diaka kubavovesa ko, ye babakusa vo wamona mona meso muna suku dia kin'longo. Watatamana kubavana bisinsu, ye wakala kaka baba. ²³ Kiokio ntangu ani ya kisalu yamana, wavutuka ku nzo ani. ²⁴ Kunima fintangu ntangu n'kento ani Elizabeti wabaka n'kayilu. Wakisueka ngonda tatu, wakala vovanga mu yani kibeni: ²⁵ " Tala mavangidi Mfumu mu mono; watudidi meso mani mu mono mu n'lemvo mu manisa mana mamvangidingi nsoni va n'tuala bantu." ²⁶ Mu ngonda ya n'sambanu ya vumu kiani, Mbasi Ngabilieli wafidisua kua Nzambi mu Mbanza ya Ngalili ya bokololuanga Nazaleti, ²⁷ kua muana nduba walembi zaya yakala wakala nzitikila ya muana yakala babokelelanga Yosefi, muisi kanda dia Davidi. Muana n'kento ndondo yi Malia. ²⁸ Wayiza kua yani ye wan'tela: " Mbote, ngeye Nzambi kavangidi n'lemvo wa nene, Mfumu wuna yaku." ²⁹ Mu mambu momo watoma vila zayi ye wakiyuvula nki mbote yoyo yizolele songa. ³⁰ Mbasi yan'zayisa: " kukadi ye wonga ko, Malia, kadi ngeye tambudi n'lemvo va n'tuala a Nzambi. ³¹ Tala siwabaka lukawu lua muana yakala ye siwam'vana nkumbu ya Yesu. ³² Sikalala wanene ye sikabokololua Muana a Nzambi a zangama. Mfumu Nzambi sikam'vana kiti kia kifumu kia Davidi n'kulu ani. ³³ Sikayala nate kuayele m'vu mu nzo ya Yakobi ye kimfumu kiani kaki kala ye nsuka ko. ³⁴ Malia wavova kua Mbasi: " neyi sidiavangamena kadi kizeye yakala ko e?" ³⁵ Mbasi yavutula ye yan'zayisa: " Mpeve a N'longo sikakala yaku ye lendo kia ndondo lutidi zangama sikiafuka mu kini kiani. Yidina muana sikawutuka sikakala wan'longo, sikabokololua Muana a Nzambi. ³⁶ Ye tala, Se diaku dia n'kento Elizabeti wabakidi mpe lukawu lua muana mu kinunu kiani. Wuna mu ngonde ya n'sambanu ya lukawu luani; Yani wakala bokololua sita, ³⁷ kadi Nzambi kalembakananga diambu ko." ³⁸ Maliya wavova : " Ngina selo kia Nzambi. Bika mawonso mavangama kua mono bonso wuna nsangu zaku!" yidiawu Mbasi wan'sisa. ³⁹ Mu ntangu yina, Malia wayenda n'sualu kuna mbanza mosi yakala vana mongo wuna muna mbanza ya Yuda. ⁴⁰ Wakota mu nzo ya Zakalia ye wavana mbote kua Elizabeti. ⁴¹ Kiokio Elizabeti kawa mbote ya Malia , muana wanikuka muna vumu kiani. Elizabeti wazala ye Mpeve a N'longo. ⁴² Waboka ye vova mu ndinga ya ngolo: " ngeye wuna wasakumunua vakati kua bakento bawonso ye bika m'butu wa vumu kiaku wasakumuka, ⁴³ neyi divangamene kua mono vo ngudi a Mfumu amu kafete kuizila kua mono e? ⁴⁴ Kadi kiokio mbote aku yiwakane mu makutu mamu, muana nikukini ye kiese muna vumu kiamu. ⁴⁵ Nkua kiese kena yoyo kuikidi; kadi mana banzayisa kua Mfumu simalungana!" ⁴⁶ Ikuma Maliya wavova: " muela amu sanisina Mfumu, ⁴⁷ ye Mpeve amu yiyangalele mu Nzambi, Mvuluzi amu. ⁴⁸ Kadi yani watudidi meso mu sielo kiani kia n'kento kia kikulula. Ingete, mbandu zawonso sizambokelela nkua mayangi. ⁴⁹ Kadi mpungu tulendo wavangidi manene kua mono. Nkumbu ani yina yan'longo! ⁵⁰ N'lemvo ani wukuizanga mbandu ka mbandu kua bana bakum'vuminanga. ⁵¹ Yani wasongele ngolo za koko kuani ye wamuanganesa bana bena ye mabanza ma kikundidika. ⁵² Wabuisa bana bamin'tinu va yiti yawu ya kimfumu, ye wazangula balembama. ⁵³ Wazadisa m'fue mia nsatu ye mambu mambote, kansi zimvuama, wabavutula moko ma mpamba. ⁵⁴ Wayiza sadisa Isaeli, n'sadi ani, mpasi mu kubasonga n'lemvo ani ⁵⁵ ( bonso kavova kua Mase meto) kua Abalahami, ye kua kanda diani mu ntangu zawonso." ⁵⁶ Maliya wakala muna nzo ya Elizabeti tezo kia ngonda tatu. Bosi,wavutuka kuna vata diani. ⁵⁷ Wuwu ntangu yawuta yifuene kua Elizabeti, ye wawuta muana a yakala. ⁵⁸ Mfinangani zani, ye mpangizai za kanda bawa vo Mfumu wasongele sinsu kia n'lemvo ani wanene kua yani; bayenda yangalala ye yani. ⁵⁹ Bosi mu lumbu kia nana, bayenda zengesa kiyakala kia muana. Bazola kum'bokelela " Zakalia", nkumu a Se diani. ⁶⁰ Kansi ngudi ani wavova: " Ve, sikabokololua Yowani." ⁶¹ Ban'tela: " kavena muntu mu kanda diaku wuna ye nkumbu yoyo ko." ⁶² Bakala salanga sinsu kua Se diani mpasi bazaya neyi kazolele bam'bokelela. ⁶³ Walomba fimeza ye wasoneka mambu ema: " nkumbu ani Yowani." bawonso bayitukua. ⁶⁴ Vanafulu nua ani wakala kimpuanza ye ludimi luani luakutuka. Wavova ye wasakumuna Nzambi. ⁶⁵ Yikuma, bawonso bakala vuandanga va kinzungidila kiawu babuilua kua wonga. Ye mu tini kiawonso kia mongo wa Yuda, bavovela n'samu miomio. ⁶⁶ Bawonso bawa mio balunda mio mu n'tima miawu ye bakala vova: " Nani wana muana yoyo sikakala e?" kadi koko kua Nzambi kuakala ye yani. ⁶⁷ Zakalia, Se diani, wazala ye Mpeve a N'longo, wabikula ye wavova: ⁶⁸ " Bika Mfumu kasakumuka, Nzambi ya Isaeli, kadi wazietele n'kangu ani ye walunganese mpulusu ani. ⁶⁹ Watuvene ngolo za mpulusu mu kanda dia Davidi, n'sadi ani. ⁷⁰ Yi momo kalonga mu nua mia m'bikudi miani mia n'longo mu ntama. ⁷¹ Yina mpulusu yitakutukula kua mbeni zeto ye mu moko ma bawonso bana ka bakutuzolanga ko. ⁷² Wasongele nkenda zani kua Mase meto ye wabambukidi moyo mu nguizani ani ya n'longo. ⁷³ Landila ndofi kadia kua Abalahami Se dieto, sikatuvana luve, ⁷⁴ ku nima kutukatula mu moko ma mbeni zeto, mu lenda kun'sambila kondua kua wonga, ⁷⁵ mu kin'longo ye mu lunungu ku nsi a meso mani, mu luzingu lueto lua m'vimba. ⁷⁶ Ye ngeye, muana amu, siwabokololua m'bikudi wa ndondo waluta zangama, kadi siwadiata ku n'tuala a Mfumu mu kubika ngizilu ani ⁷⁷ ye vana kua n'kangu ani nzayilu ya mpulusu mu nzila ya n'lemvo a masumu. ⁷⁸ Nzambi eto sikatulemvokela mu nkenda zani zawalakazi. Mu nkenda zozo, sikeza, bonso ntangu kiokio yivayikanga, mu vana ntemo kua beto tuka mu zulu. ⁷⁹ Sikakiesesa bana bena mu tombe kia ngolo ye mu kini kia lufua, mpasi kadiatisa ntambi zeto mu nzila ya luvuvamu." ⁸⁰ Mukuma kia muana, wakala kula ye wakala kuma ngolo mu Kimpeve. Wakala vuandanga muna makanga nate mu lumbu kayantika kisonga kua n'kangu a Isaeli.