¹ Paulu, ntumua ya Yesu Klisto mu luzolo lua Nzambi, ye mpangi Timoteo, ² kua ban'longo ye mpangi za kuikama mu Yesu bena kuna Kolosayi; bika n'lemvo ye luvuvamu bialuvewa kua Nzambi Se dieto! ³ Tuvutudi matondo kua Nzambi Se dia Mfumu eto Yesu Klisto, ye katutayoya mu kulusambidila ko, ⁴ Kiokio yawa nsangu za minu kieno muna Yesu Klisto ye muna zola kueno kua ban'longo bawonso, ⁵ kuma kia vuvu kialukubikulua muna mazulu, yevo mambu ma kieleka, mambu ma nsangu zambote makiluzayikisulua. ⁶ mena vakati kueno ye muna nza ya m'vimba; metabta m'butu, ye metakuenda kudi, bonso mpe dina vakati kueno, tuka muna lumbu luawa ye luazaya n'lemvo a Nzambi landila kieleka. ⁷ Landila ndongolo luatambula kua Epafala, mpangi eto ya n'zolua muna salu, ndondo wuna kua yeno n'sadi a Klisto wakuikama, ⁸ ye watulonga kana mu nkia zola Mpeve kakulutuadisilanga. ⁹ Ikuma kiokio beto mpe, tuka lumbu kina tuawa mo, katutayoya mu sambila kua Nzambi ko mukuma kieno, ye lomba vo beno luakala luazala ye nzayilu ya luzolo luani, mu nduenga zawonso ye ngangu zakimpeve, ¹⁰ mu diata mu mpila yafuakana muna Mfumu ye kun'kadila wambote kikilu, kiokio luna ye m'butu mu mpila zawonso za mavanga mambote ye kiokio lutakula muna nzayilu a Nzambi, ¹¹ mu lusiamusu mu ngolo zawonso kua lendo kia n'kembo ani, mpasi vo luakalanga ntangu zawonso ye vema kua kiese ye kua mvibudulu. ¹² Luvana n'kembo kua Se, ndondo walukumisa luafuana mu tambula fua dia ban'longo muna n'temo. ¹³ Ndondo watukula muna lendo kia tombe ye watunata muna kimfumu kia Muana a nzola ani, ¹⁴ mu ndondo tunina tuakulua, mu n'lemvo a masumu. ¹⁵ Yani Wuna fuani kia Nzambi yilembi monekanga, muana a ntete muna mvangulu a nza yawonso. ¹⁶ Kadi mu yani muavangulua bima biawonso bina muna mazulu ye va n'toto, bimonekanga ye bilembi monekanga, biandu, zinzitusu, zingiadulu, yimfumu. Biawonso biavangua kua yani ye mukuma kiani. ¹⁷ Yani wuna tekela bima biawonso ye bima biawonso bizingilanga mu yani. ¹⁸ Yani wuna n'tu wanitu a Dibundu; wuna ngiatukulu, Muana a ntete mu bafua, mpasi kakala wantete mu biawonso. ¹⁹ Kadi Nzambi wazola vo mfuzulu yawonso yakala mu yani; ²⁰ Mu nzila ani wazola wizanesa biawonso ye yani kibeni, kana bina va n'toto ye bina muna mazulu, mu tula luvuvamu mu nzila ani, muna menga ma kuluzu diani. ²¹ Ye beno, luakala mu ntangu ya ntama, zimbeni muna mabanza meno ye muna mavanaga meno mambi, yani wuwu wuluwizanese ²² mu mfuilu ani mu nitu ya n'suni ani, mu kulumonekesa ban'longo, bakondua belua ye bakondua nsembolo va n'tuala ani, ²³ vo nkutu luna kaka luakieleka ye nakekete muna minu, kondua kuafila n'sangu zambote zavuvu nima zozo luawa, zalongua kua konso kua vangua ku nsi a zulu, ye mu ndondo mono Paulu ya biekolua n'sadi. ²⁴ Wuwu ngita yangalala mu mpasi zamu mukuma kieno; ye dina dikondolo mu mpasi za Klisto, mbanisini dio mu n'suni amu, mukuma kia nitu ani, yoyo yina Dibundu. ²⁵ Yi mu diodio yabiekolua n'sadi, landila zitu Nzambi kamvuana mukuma kieno, mpasi vo yatoma longa n'samu a Nzambi. ²⁶ Masuekamu ma ntangu zawonso ye mu mbandu zawonso, kansi wuwu mazayikusu kua ban'longo, ²⁷ Kua bana Nzambi kazola songa tezo kia kimvuama kia n'kembo kia masuekamu momo vakati kua mim'pakanu, eki: Klisto mu yeno, vuvu kia n'kembo. ²⁸ Yi yani tutalonga, mu siamisa konso muntu ye longa konso muntu mu nduenga zawonso, mpasi mu yekola konso muntu kua Nzambi, ndondo wakumini walunga mu Klisto. ²⁹ Yi mukuma kiokio n'sadilanga, mu nuana mu ngolo zani zisalanga mu lendo kua mono.