¹ Ye mu ntangu yiyi luzimpangi, lutusambidila, mpasi mambu ma Mfumu mamuangana mu n'sualu ye mazitisua, bonso mena mpila mosi kuna ndambu eno. ² Lusambila mpasi tuakulua mu bantu ba nganzi ye bambi, kadi bawonso kabena ye minu ko. ³ Kansi Mfumu wuna wakuikama ndondo walutula ye kulukeba mu n'kua wambi. ⁴ Tuna ye vuvu kua Mfumu mukuma kieno, vo luta vanga ye siluatatamana vanga mambu mana tualutumini. ⁵ Bika Mfumu katuadisa n'tima mieno kuna zola kua Nzambi ye kikesa kia Klisto. ⁶ Wuwu luzimpangi, tululombele mu nkumbu ya Mfumu eto Yesu Klisto, mu lembi kala kintuadi ye zimpangi zizingilanga mu yungana mpamba-mpamba. Diambu diodio kadina dia fuanakana mu kinkulu kiokio luatambula kua yeto ko. ⁷ Kadi yeno mosi luzeye vo dina dia fuana mu kututanginina. Kadi katuadiatidi va kati kueno bonso bana bakondolo luzitu ko. ⁸ Ye katuadidi madia ma nkatu ma muntu ko. Kansi nkutu, tuasadidi fuku ye muini mu luzingu lua mpasi za ngolo, mpasi tualembi kala zitu kua yeno. ⁹ Katuavangidi dio ko mu diambu dia tukondolo kana lendo ko. Kansi nkutu, tuavangidi dio mpasi tuakala mbandu kua yeno, ye mpasi vo luatutanginina. ¹⁰ Kiokio tuakala ye yeno, tualutela: " vo muntu kazolele sala ko, kadieko." ¹¹ Kadi tuawilu vo ban'kaka mu yeno kabazolele sala ko. Kabetasala ko, kiongolo nkutu bena bantu bandumunanga mansueki. ¹² Ikuma mu bantu bampila yoyo, tutakubatela ye kubavana malongi mu Mfumu Yesu Klisto mu sala mu luvuvamu ye mu dia madia mayawu kibeni. ¹³ Kansi yeno, luzimpangi, kaluyoyi mu vanga momo mena ma lunungu ko. ¹⁴ Vo muntu katumamene mambu meto mena mu n'kanda wuwu ko, luvambana ye yani ye kalukadi yani kintuadi ko mpasi kafua nsoni. ¹⁵ Kalum'baki bonso n'tantu ko, kansi lun'longela bonso mpangi. ¹⁶ Bika Mfumu yani mosi kaluvana luvuvamu luani mu ntangu zawonso ye mu konso kua diambu. Bika kakala ye beno bawonso. ¹⁷ Mono Paulu yiluvene mbote, mu koko kua mono kibeni bonso yivanganga dio mu n'kanda miawonso. ¹⁸ Bika n'lemvo wa Mfumu eto Yesu Klisto wakala kua beno bawonso.