¹ Wuwu tululombele, luzimpangi, mu matadidi ngizilu ya mfumu eto Yesu Klisto ye nkutakani eto ye yani, ² kaluzelangensua mu kondua kua mpasi mu mabanza meno, mu Mpeve eno, mu mpova, kani mu n'kanda wuna bonso wutukidi kua yeto ko; mu kulukuikidisa vo lumbu kia Mfumu kizidi. ³ Ka muntu ko wuluvukumuna mu konso mpila nkutu ko. Kadi mana kamalendi sala vangama ko nate kikuiza mpasi zasaka, ye muntu wakondua n'siku kasengomonua, muana wa m'fuasi. ⁴ Yi yani kakidilanga, ye telamananga konso kina kibokoluanga nzambi, yevo kikunduanga. Kadi, yani vuandanga muna nzo a Nzambi ye kisonganga bonso Nzambi. ⁵ Nga kalutabambuka moyo ko vo yakulutela mambu momo kiokio yakala ye yeno e? ⁶ Wuwu luzeye kiokio kita kun'kakidila, mpasi vo kasongua kaka mu ntangu yifuanakane. ⁷ Kadi mansueki ma nkolamano makotele kala mu salu, kansi, vena ye muntu mosi wuta mo kakidila mu ntangu yiyi nate makatulua mu nzila. ⁸ Ikuma ndondo lembi zitisanga n'siku sikasongua, ndondo Mfumu Yesu sika vonda mu vumununu kia nua ani. Mfumu sikam'fuasikisa m'vimba m'vimba mu mbikudulu ya ngizulu ani. ⁹ Ngizulu a kimpumbulu siyatukisua mu mavanga kua satana mu ngolo zawonso, ye bidimbu, ye masivi ma luvunu, ¹⁰ ye luvunu luawonso luakondua kua lunungu. Mambu momo simakala kua bobo bafuanga, wu kina vo balembi tambula zola kua kieleka mpasi bavuluzua. ¹¹ Mu kuma kiokio, Nzambi wabanata mu vangu dimosi dia mvidusu mpasi bakuikila mu luvunu. ¹² N'sendo yi ewu vo sibafundusua bawonso, bana kabakuikila mu kieleka ko. Kansi kiongolo nkutu bakivana mu kondua kua lunungu. ¹³ Kansi tutavutula matondo ntangu ka ntangu mukuma kieno luzimpangi zan'zolua za Mfumu, kadi Nzambi walusola bonso m'butu mia ntete mia luvuluzu muna mpedoso ya Mpeve ye mu lukuikilu muna kieleka, ¹⁴ muna kuma kia diodio kalubokelela mu nzila ya nsangu zeto zambote mpasi luatambula n'kembo a Mfumu eto Yesu Klisto. ¹⁵ Ikuma luzimpangi, lukala luakuikama. Lusimbinina kinkulu kiokio lualongua, kani mu m'vovo yevo mu n'kanda eto. ¹⁶ Wuwu, bika Mfumu eto Yesu Klisto yani kibeni, ye Nzambi Se dieto ndondo watuzola ye watuvana lusiamusu lua m'vu ya m'vu, ye vuvu kia mbote muna mana makun'tuala mu n'lemvo, ¹⁷ kalusiamisa ye katula n'tima mieno mu mavanga mambote ye mu mpova.