¹ M'bikudi mia luvunu miayizidi kua bantu ye n'longi mia luvunu simiza mpe kua yeno. Simianata mu kinsueki ndongolo zaluvunu zifuasanga, ye sibavakudila n'kalu mu Mfumu yoyo yabakula. Banatanga mbungulu za kintulumukina kua yawu. ² Babidi sibalanda mu nzinunu zawu zambi, ye mu yawu nzila ya kieleka siyatiakua. ³ Mu nsatu zasaka tezo, sibabaka ndandu mu yeno mu m'vovo mia luvunu. Ngielele awu kayizingila ko; mbungulu awu kayinimbanga ko. ⁴ Kadi vo Nzambi kavukisa mbasi zozo zavola masumu ko. Kansi wabayekola kua talatalusi mpasi bakangua mu min'singa mia sengua muna n'kobo wa tombe nate ye kuna mfundusu. (N'kanda mia n'kaka mitanga mu tubua kuna yenga dia tombe nate ye kuna mfundusu). ⁵ Diaka, katanina nza yankulu ko, kansi watanina Nowa, ndondo wakala n'longi wa lunungu, ye nsambuadia yan'kaka, mu ntangu kafila zalu mu nza ya balembua kala ye vumi wa mambu ma Nzambi. ⁶ Nzambi wabunga mpe mbanza za Sodoma ye Ngomola nate ye kitula zo bombe ye wafukisa zo, mu songela mbandu ya mana simaluakila bakondolo vumi wa mambu ma Nzambi. ⁷ Mu matadidi Loti walunungu, ndondo wakala ntangu zawonso wakendalala mu diambu dia nkadulu ya bana bena ku nganga ya n'siku muna mfukusu awu, Nzambi wan'vuluza. ⁸ Kadi muntu ndondo walunungu, wakele zinganga va kati kuawu lumbu ka lumbu, wakala kuamusua muna muela ani walunungu, mudiambu dia mana kakala mona ye gua. ⁹ Mfumu zeye neyi kalenda kudila bantu bani ye vumi kia mambu ma Nzambi mu ntontolo, ye neyi kalenda lundila bantu bakondolo vumi wa mambu ma Nzambi mpasi babaka tumbu muna lumbu kia mfundusu. ¹⁰ Mama mena kibeni makieleka kua bana batatamananga mu nsatu za n'suni ziyivisanga ye zitingunanga luyalu. Bena mfidi mia mpaka ye bankua n'tu ngolo. Kabena ye wonga watiaka vangua ya nzitusu ko. ¹¹ Zimbasi zina ye ngolo ye kikesa kilutidi nene, kansi kabakubavangilanga m'fundu mia mfigulu va n'tuala Mfumu ko. ¹² Kansi bulu yoyo yikondolo mbakusulu yavangua kaka mpasi yabakua ye fuasua. Kabazeye ko kina bafinganga. Sibafuasua. ¹³ Sibabaka m'futu wa mavanga mawu mambi. Babanzanga vo kukivana mu bilutidi wete muna lumbu kia mvimba dina dia mbote. Bena ye mvindu ye basumuka. Bagiangalalanga mu luvunu luawu kiokio bakalanga mu nkinzi mieno. ¹⁴ Bena ye meso mazala kua fuani ya bakento ba zumba ; kabagiukutanga masumu ko. Batuntanga miela miomio kamina mia siamusua ko mu mavanga mawu mambi , ye bena ye n'tima mia kivana mu nzinunu. Bena bana basingua. ¹⁵ Bayambula nzila ya sungama. Bavila ye balanda nzila ya Balami muana a Beole, ndondo zolanga tambula m'futu wakondua lunungu. (buku ya nkaka yitele Balami muana Bosoli) ¹⁶ Kansi wavangua mukuma kia mambi ma yani kibeni. Muana mpunda ya fioti wankento wababa wakala vova mu ndinga ya bantu yamanisa kilawu kia m'bikudi. ¹⁷ Bantu bobo bena bonso nto zikondolo maza. Bena bonso matuti meta natumunua kua tembua kia ngolo. Tombe kiangolo kiabakubukulua ¹⁸ Bavovanga mu kitumpidika kua mpamba. Batuntanga bantu mu nzinunu za n'suni. Batuntanga bana batezanga tina bana bazingilanga mu mvidusu. ¹⁹ Bakubavananga n'silu wa kimpuanza, kansi yawu kibeni bena nanga mia ngivusu. Kadi muntu wuna nanga wa mawonsono makun'yalanga. ²⁰ Konso nduna tinini nsumukunu za nza mu nzayilu ya Mfumu ye Mvuluzi Yesu Klisto, ye bosi vutukidi diaka muna nsumukunu yoyo, nkadulu ya nsuka yikitukidi yambi lutila yina ya ntete. ²¹ Nga dialuta wete kua bau mu lembua teka zaya nzila ya lunungu, kansi ka mu teka yo zaya ko ye fila nima n'siku a n'longo wubavewa . ²² Kingana kiokio kina kia kieleka mudiambu dia yawu: " Mbua vutukilanga luku ya yani kibeni. Ngulu yiyobele yivutukanga vana nteke."