¹ Simoni Petelo, nkole ye Ntumua ya Yesu Klisto, kua bobo batambula minu kia ntalu bonso yeto tuatambudila kio, minu mu ndungidi ya Nzambi eto ye M'vuluzi Yesu Klisto. ² Bika n'lemvo wakala yeno, luvuvamu luatomboka muna nzayilu a Nzambi ye ya Yesu Mfumu eto. ³ Mambu mawonso matadidi lendo kia Nzambi mukuma kia moyo tuavewa mo mu nzila ya nzayilu a Nzambi, ndondo watubokela mu nzila ya n'kembo wayani kibeni ye mu nkadulu ya songa. ⁴ Mu mambu momo, watuvana n'silu mia ntalu ye mia nene. Wavanga wo mpasi luakala ntuadi muna Kinzambi, kadi beno luavuka mu mpukumunu yina mu nza mudiambu dia nsatu za mbi. ⁵ Mukuma kia diodio kaka, luvanga bonso wufuene mpasi vo luatambula kadilu kia songa mu minu kieno, ye mu kadilu kieno kia songa, nzayilu. ⁶ Mu nzayilu eno lukudika kukiyala, ye va kukiyala vakudikua ntatameno, ye va ntatameno eno lukudika wuveledi. ⁷ Ye va wuveledi weno lukudika nkalasani ya kimpangi, ye va nkalasani ya kimpangi lukudika zola. ⁸ Kadi vo mambu momo mena mu ngeye ye metakula mu ngeye, kukala sita mu nzayilu a mfumu eto Yesu Klisto ko. ⁹ Kansi kua ndondo mambu mama makondolo, ye wutasosa kaka biobio bina va lukufi, yani wuna mpofo.Yani vilakene mfunguninu a masumu mani mantama. ¹⁰ Ikuma mpangi, luvanga mawonso ma fuene mpasi luakala ye vuvu kia mbokolo eno ye kia nsololo eno. Vo sadidi mambu mama kalulendi sielomoka ko. ¹¹ Mu mpila yoyo, nkotolo mu kimfumu kia m'vu ya m'vu kia Mfumu eto ye M'vuluzi Yesu Klisto siyakuluvewa bonso wufuene. ¹² Mudiodio, siyakala ntangu zawonso wakubama mu kulubambula mambu momo moyo kanele vo luzeye mo, ye vo wuwu luna ngolo mu kieleka. ¹³ Mbenzi vo dina dialunugu kua mono mu kulusikamesa ye mu kulubambula moyo mu mambu momo wuwu kina vo yakinu ntete mu nzo yiyi ya makuba. ¹⁴ Kadi nzeye vo ka ntama beni ko, siyavayika mu nzo yiyi ya makuba bonso Mfumu eto Yesu Klisto kansongele dio. ¹⁵ Siyavanga bonso wufuene mpasi vo luabambukila mambu mama moyo kunima ngiendolo amu. ¹⁶ Kadi katualongoka nsadilu za kinkulu kia nsambudulu za toma kubikua mu nduenga zawonso ko kiokio tualuvovela mana matadidi lendo kia mbonekeno a Mfumu eto Yesu Klisto, kansi tuakala mbangi za mona meso za kimfumu kiani kialuta zangama. ¹⁷ Kadi watambula kua Nzambi Se nzitusu ye n'kembo kiokio ndinga yi mosi yawakanesa nzitusu ye n'kembo wa kimfu kiani kialuta zangama: " ndundu yi muana amu wa n'zolua mu yani yatula nzola amu yawonso." ¹⁸ Tuawa ndinga yoyo yatuka kuzulu, kiokio tuakala yani vana zulu a mongo wa n'longo. ¹⁹ Tuna ye m'vovo wuwu wa mbikudilu wuna wavuvu kibeni mu wowo lutavangila diambote mu yekamena. Wuna bonso muinda wutalema va fulu kia tombe nate ku kia ye ntetembua ya n'suka yitubuka muna n'tima mieno. ²⁰ Luzaya ntete edi, kavena mbikudilu ya masonukua yitukanga mu mbangudilu ya muntu yani mosi ko. ²¹ Kadi kakuna mbikudilu mosi yatuka mu luzolo lua muntu ko. Kansi nkutu, bantu mu lutuadusu lua Mpeve a Nlongo bavova mambu matuka kua Nzambi.