¹ Paulu, ntumua ya Klisto Yesu mu luzolo lua Nzambi, ye Timoteo mpangi eto ya yakala, kuna Dibundu dia Nzambi dina kuna Kolinto, ye kua minkuikizi miawonso mina muna Akayi diawonso. ² Bika n'lemvo ye luvuvamu lua Nzambi Se dieto ye Mfumu Yesu Klisto luakala yeno! ³ Bika Nzambi, Se dia Mfumu eto Yesu Klisto kakembesua. Wuna Se dia nkenda ye Nzambi ya lusiamusu luawonso, ⁴ Nzambi kutusiamisanga mu kiadi kieto kiawonso, mpasi vo tulenda siamisa bobo bena mu kiadi. Mu lusiamusu lolo tutambudi kua Nzambi, mpila mosi tusiamisanga bobo bena mu kiadi ⁵ Kadi wowo mpasi za Klisto ziwokele mu kuma kia n'levo eto, wowo mpe lusiamusu lueto luwokele muna Klisto. ⁶ Vo tukendalele, yi mukuma kia lusiamusu lueno ye mukuma kia mpulusu eno; vo tusiamusu, yi mukuma kia lusiamusu lueno. Lusiamusu lueno lutasala kibeni kiokio lutakabula mpasi zimosi muna luvibudulu ye zozo tutamona. ⁷ Vuvu kieto mu yeno kina kia sikila, kadi tuzeye vo bonso lutakabudila zimpasi, wowo mpe lutakabudila lusiamusu. ⁸ Wana, katuzolele kuluyambula kondua kua zaya ko, zimpangi, mu momo matadidi mvualangani yatuluakila kuna Asia.Tuakala kusi a mpasi zayingi, lutila nkutu tezo kia ngolo zeto, nate nkutu tuadimbula vuvu vo tulenda diaka zinga. ⁹ Tuakala mona nzengolo a lufua vo yifete kaka kuiza kua beto, mpasi katutudi vuvu kieto mu beto kibeni ko , kansi diodio diakala mpasi katukibundi vuvu ko. Kansi mu Nzambi, yani vukisanga mu wulu dia lufua. ¹⁰ Yani watuvukisi ye sikatuvukisa diaka. Mu yani tutabundila vuvu vo sikatuvukisa diaka. ¹¹ Sikavanga dio wuwu kina vo beno mpe luta kutusadisa mu sambu kieno. Mu diodio babidi sibavutula matondo mu kuma kieto mu diambu dia n'lemvo tutambudi mu sambu ya babidi. ¹² Kadi dita kutuvana n'kembo, kimbangi kia kansansa kieto. Kadi dina muna kati kua n'tima ye muna kieleka kitatuka kua Nzambi yoyo tutadiatila mu nza. Tuasala mama lutila ntuadi ye beno, kamu nduenga za va n'toto ko, kansi mu n'lemvo a Nzambi. ¹³ Katulendi kulusonekena mambu momo kalulendi tanga ye bakusa ko. Ye nsidi vuvu vo, ¹⁴ lua kutubakusa fioti, situakala ndungidi eno mu kukikembesa muna lumbu kia Mfumu Yesu, wuwu kina vo siluakala ndungidi eto mu kukikembesa. ¹⁵ Kadi yakala ye vuvu mu didi, yazolele ngiza ntente kua beno, mpasi luatambula n'lemvo mu nzietelo zizole. ¹⁶ Yazolele viokela kua beno mu ndutilu amu kuna Makedonia, ye zola diaka kuluzietela mu mvutukulu amu kuna Makedonia ye beno mu kunsindika kuna Yuda. ¹⁷ Kiokio yakala banza mpila yina, nga yakala ye keti-keti e? Nga yikubikanga mambu mu kimuntu, mpasi yavova ingeta, ingeta ye ve,ve mu nkumbu mosi e?. ¹⁸ Kansi wukina vo nzambi wuna wakuikama, katulendi vova Ingeta ye ve ko. ¹⁹ Kadi Muana Nzambi, Yesu Klisto, ndondo tualongele vakati kueno, mono, silivani, ye Timoteo, kena ingeta ye ve ko." kansi nkutu tangu zawonso wuna kaka "ingeta" . ²⁰ Kadi mu mawonso matadidi n'silu mia Nzambi, mina ingeta mu yani. Ye mpe diaka mu nzila ani tuvovanga "amene" mukuma kia n'kembo a Nzambi. ²¹ Wuwu Nzambi kututambudilanga beno ye beto mu Yesu Klisto, ye kutufilanga mu kisalu. ²² Yani kututulanga dimbu ye kutuvananga mpeve muna n'tima mieto bonso sinsu kia bina sikatuvana kuna nsuka. ²³ Kiongolo, ngita baka Nzambi bonso mbangi amu, yi mu diambu dia lembi kuluvilangesa kiayizidi ku Kolinto ko; ²⁴ ka mu sa ko vo tuayala minu kieno, kansi yi mukuma kia kiese kieno , bonso luna nakekete muna minu.