¹ Wuwu, mu diodio ditadidi ntangu ye nsungi, luzimpangi, kaluna ye m'funu mu sonekenua mu diodio ko. ² Kadi lutomene zaya yeno kibeni vo lumbu kia Mfumu sikiza bonso muivi mu mpimpa. ³ Kiokio sibavova: " luvuvamu ye kebua", wana nkutu fuasua kua kintulumukina sikuiza kua yawu. Sikuakala bonso n'songo mia ngutulu a n'kento wuna ye vumu. Kabalendi vuka kani neyi nkutu ko. ⁴ Kansi yeno, luzimpangi, kaluna mu tombe ko, mpasi lumbu kiokio kialuluakila bonso muivi. ⁵ Kadi luna beno bawonso bana ba n'temo ye bana ba muini. Katuna bana ba fuku ko, kani batombe ko. ⁶ Ikuma, katuleki bonso wuvanganga ban'kaka ko, kansi tukaya meso ye kukiyala. ⁷ Kadi bana balekanga balekanga mu mpimpa, ye bana bakoluanga malavu, bakoluanga mu mpimpa . ⁸ Kansi, wuwu kina vo tuna bana ba muini, tukala tuakiyala; tuvuata n'kamba a luketo wa minu ye wa zola, ye bonso mpu ya sengo, vuvu kia mpulusu yikuiza. ⁹ Kadi Nzambi katukubikila mu builua kua nganzi ko, kansi mu ntambululu a mpulusu mu Mfumu eto Yesu Klisto. ¹⁰ Yani wuna ndondo wafua mu kuma kieto, mpasi vo, ngatu vo tulenda kaya meso yevo tulenda leka, tuazinga ntuadi ye yani. ¹¹ Yi mu diodio, lusiamasana yeno ye yeno, ye lulongana yeno ye yeno, bonso luvangilanga dio kala. ¹² Tululombele, luzimpangi, mu zaya bana beta sala vakati kueno ye bana bena bazangama vazulu eno mu Mfumu ye betakulutunga. ¹³ Tululombele mpe mu kala ye nzitusu ya nene kua bawu mu zola mukuma kia salu yawu. Lukala mu luvuvamu vakati kueno. ¹⁴ Tulusiamisi, luzimpangi: lulukisa bana bazingilanga mu mvualangani, lusiamisa bobo bayoya, luvibidila bakondolo kikesa, lukala ye luvibudulu kua bawonso. ¹⁵ Lukikeba, muntu kavutudi mbi mu mambi kua n'kuayani ko. Kansi nkutu, lulandanga kaka momo mena mambote vakati kueno ye van'tuala a bawonso. ¹⁶ Luyangalalanga ntangu zawonso. ¹⁷ Lusambilanga kondua kua yoya. ¹⁸ Luvutula matondo mu konso kuadiambu. Kadi wowo wuna luzolo lua Nzambi mu Klisto Yesu mu kuma kieno. ¹⁹ Kaluzimi Mpeve ko. ²⁰ Kalutinguni zimbikudulu ko. ²¹ Kansi lufiongonona mawonso. Lusimbinina mana mena mambote. ²² Lutina konso kua mbonokono ya mambi. ²³ Bika Nzambi ya luvuvamu kaluvelelesa bonso wufuwe. Bika Mpeve eno yawonso, muela, ye nitu, bialundua kondua kua nsembolo nate mvutukulu ya mfumu eto Yesu Klisto. ²⁴ Ndondo walubokela wuna wakuikama ye yiyani sikavanga wo. ²⁵ Luzimpangi, lusambilanga mpe mu kuma kieto. ²⁶ Luvana mbote kua zimpangi zawonso mu mfibilu ya velela. ²⁷ Yikululombele mu nkumbu ya Mfumu vo n'kanda wuwu watangua kua zimpangi zawonso. ²⁸ Bika n'lemvo wa Mfumu eto Yesu Klisto wakala yeno.