¹ Me tsiamisi teete bwabu, mikwikisi misamana bisama bi mu tini yi mutini, kulomo ku Nzaami ku vutulu matono mu diama di bahata babaso, ² Mudiama di batotolo yi ba mfumu ba tsi ba tumi mi mukusa vo beete tukala yi luzingi lu ngeme lu mutini mboti. ³ Bwabunu kwé bu mboti ku ndumi Nzaami mvulusi ete, ⁴ Zari vo bahata babaso ba wuhuluku yé balene ku zaya kieriki. ⁵ Diama kwé i Nzaami mosi kaka yi mutu mosi wé a kahati Nzaami yi bahata, Yesu Klisto u vuati niti kimutu, usi ngwisene mu Nzaami yi bahata, ⁶ Uki gehe nde kibeni ki muku katala bahata babaso mu bu mbala. Kiakini kie ki mbangi mu taanga nde, ⁷ Idini Nzaami ka tsori me i sala mulongi yi tuhumu maama-maani, me i moka makieriki, me i hunaka, i tuhumimi muku songono bahata ba bikolo bi kaka nzili lukwikili yi makieriki. ⁸ Me nzori vo bahata bayakala basamana wu bifulu biabiso, ku koono ngaansi kaani ngini mbi. ⁹ Me nzori siki vo ba kehete kitese ki mosi ba vuata u mu pihili mosi i mboti, mu mutini fwani, ka i lu lene ke, ka ba lutusuku, kaba bangasa ka mbonsi, kaba vuata ka bimi bi wolo, keti misangaa, kaani milele mi taala yingi. ¹⁰ Kaansi bagaha nita wu luziti mu bisala biau bi mboti, mu ndenge kufwani ba kehete ba mokau ba zitisa Nzaami. ¹¹ Vo mukehete waa malongi kaka zonso ko ka nieke pihi wu mu nzô Nzaami yi ku kikulumusu. ¹² Me ka pehe nzili ku mukehete ka, kaani kakala yi kimfumu; kaansi nde ka kala pihiwu ¹³ Diama Adami ka tirimi mutu teete, bunu kunimi Ava; ¹⁴ Ka Adami ki u uhunimi, mukehete u uhunimi ubebisi musiki Nzaami. ¹⁵ Nde kakala uguhulu ku gôho kitiki mama, goho kangimi mu lukwikili, yi kukikaba ku Nzaami yi mu kisanta.