¹ Exɔn godo , un mɔ wema ɖe le mimla le omɛ ke flɔn axɔluzinkpo ji lɔ we alɔ aɖisi lɔ mɛ; e wlan nu do wema exɔn we akpaxwe awe lɛɛ kpo; e tlɛ wema lɔ le ofi canwe, bo ɖo wuntun e ji. ² Un mɔ wɛnzangun hɔnhlɔnnɔ ɖokpo le axwa do ɔ tlili, bo nɔ ɖɔ: "Mɛ wɛ e ka jɛ ɖɔ e ni gba wuntun lɛɛ, bo hun wema lɔ?" ³ Amɔ, mɛ ti ma le oji gɛ; mɛ ti ma le anyzan ji gɛ; mɛ ti maka lɛ le anyzan gɔ, bo na sigan hun wema lɔ, alo bo na sigan kpɔn xo etɔn mɛ gɛ. ⁴ Exɔn wutu, un vi avi kaka, ɖo e ma mɔ mɛ ke e jɛ ɖɔ e ni hun wema lɔ, alo e ni kpɔn xo etɔn mɛ ti gɛ. ⁵ Amɔ, mɛxo lɛɛ ɖokpo ɖɔ na un ɖɔ: "Nɔkpɔn vi avi gɛ, kpɔn: Kinnikinni ke le akɔta Judaa tɔn mɛ, bo nyi axɔlu Davidi we vi lɔ ɖu l'e ji, bo na gba wuntun canwe lɛɛ, bo na hun wema lɔ." ⁶ Un mɔ Lɛngbɔvi ɖokpo le ote le axɔluzinkpo lɔ cɛncɛn; onu le gbɛ ɛnɛ lɛɛ kpo mɛxo lɛɛ kpo lilɛ do e. Lɛngbɔvi lɔ ci ɖi hu wɛ e hui ɖɔhun; e ɖo azo canwe; nukun canwe lɛɛ wɛ nyi oyɛ Mawu tɔn canwe ke e ze ɖoxlan anyizan lɔ kpokpo ji lɔ. ⁷ Lɛngbɔvi lɔ sɛ yi nukɔn, bo yi wema lɔ le mɛ ke flɔn axɔluzinkpo lɔ ji lɔ we alɔ aɖisi lɔ mɛ. ⁸ Ke e yi wema lɔ ɔ, onu le gbɛ ɛnɛ lɛɛ kpo mɛxo oko-nukun-ɛnɛ lɛɛ kpo jɛ oklo le nukɔn etɔn. Ye mɛ ɖokpo ɖokpo hɛn agidigbo ɖokpo ɖokpo, bo lɛ hɛn sikakɔfo, bɔ azluya gɔ e mɛ. Azluya lɔ wɛ nyi oɖɛ ke mɛɖeɖovo Mawu tɔn lɛɛ nɔ xo lɛɛ. ⁹ Ye le ohan yɔyɔ ɖe ji ɔn bo ɖɔ: "A nyi mɛ ke e jɛ bo na yi wema lɔ, bo gba wuntun lɛɛ; ɖo e hu we, bɔ gbɔn ohun towe gblamɛ, a xɔ ogbɛ na gbɛtɔ lɛɛ na Mawu, le ogbe lɛɛ kpo mɛ, le togun lɛɛ kpo mɛ, le oto lɛɛ kpo mɛ. ¹⁰ A sɔ ye do blo avɔsannu-xwlemawutɔ lɛɛ we axɔluɖuto, bɔ ye ne wa azɔn na Mawu mitɔn, bo na ɖu axɔlu le anyizan ji." ¹¹ Un lɛ kpɔn bo se wɛnzangun susu geɖegeɖe ɖe lɛɛ we ogbe; wɛnzangun susu geɖegeɖe wɛ; ye lilɛ do axɔluzinkpo lɔ kpo onu le gbɛ lɛɛ kpo, kpo mɛxo lɛɛ kpo. ¹² Ye ze ogbe do oji bo le ɖiɖɔ ɔn ɖɔ: "Lɛngbɔvi ke e hu lɔ wɛ nyi mɛ e ejɛ bɔ e na yi acɛ, adɔkun, nunywɛ, hɔnhlɔn, yɛyi, susu kpo kpikpa kpolɔ." ¹³ Un lɛ se nuɖida ke le oji lɛɛ kpo, ke le anyizan ji lɛɛ kpo, ke le anyizan gɔ lɛɛ kpo, ke le oxu mɛ lɛɛ kpo; nudida ke gbɔn agosu ɛnɛ ogbɛ lɔ tɔn mɛ lɛɛ kpo le ɖiɖɔ ɔn ɖɔ: "Kpikpa, yɛyi, susu, kpo hɔnhlɔn kpo ni nyi mɛ ke le anyifinflɔn le axɔluzinkpo lɔ ji lɔ kpo Lɛngbɔvi lɔ kpo tɔn kaka sɔyi!" ¹⁴ Onu le gbɛ ɛnɛ lɛɛ yi gbe bo ɖɔ: "Ami! Bɔ mɛxo lɛɛ jɛ oklo bo e kɔ.