¹ Onu ke le hwihwla, bɔ Jezu Klisi ze xlɛ ceɖeceɖe lɛɛ wɛ le wema ekɔ mɛ. Mawu ze onu exɔn lɛɛ xlɛ ɛ, bo na do xlɛɛ onu ke na jɔ le odin zanɖe lɛɛ wu mɛsɛntɔ etɔn lɛɛ. Jezu Klisi sɛ wɛnzangun etɔn do mɛsɛntɔ etɔn Jaan, bo ɖe onu lɛɛ xlɛ ɛ. ² Jaan ɖe kunnu na onu ke e mɔ lɛɛ bisese. Owɛn ke Mawu do, kpo xojɔxo ke Jezu Klisi ɖexlɛ lɔ kpo we xo wɛ e ɖɔ do fi. ³ Nu nyɔ na mɛ ke le xa wema ekɔ, bo nyɔ na mɛ ke ɖoto wɛn ekɔ lɛɛ ke Mawu do gbɔn gbeyitɔ etɔn lɛɛ ji, bo nɔ blo do eji lɛɛ. Ɖo hwenu ke Mawu ɖo bɔ onu exɔn lɛɛ kpokpo na do jɔ ko sɛ kpɔ. ⁴ Nyɛ Jaan wɛ sɛ wama ekɔ do agun cyanwe ke le tokpɔn azii tɔn mɛ lɛɛ: Mawu ke le din, bo ka ko le ɖ'anyi, bo na wa waa ni na fɛnu kpo fifa kpo mi; oyɛ cyanwe ke le axɔluzinkpo etɔn nukɔn lɛɛ ni na fɛnu kpo fifa kpo mi; ⁵ Jezu Klisi ke nyi kunnuɖetɔ gbejinɔtɔ, bo nyi omɛ nukɔntɔn ke Mawu fɔn sɔn ku, bo hu gan axɔlu ke le anyizanji lɛɛ ni na fɛnu kpo fifa kpo mi. Jezu Klisi nyi wan na mi; e hlɛn mi le ohwɛ ke mi hu lɛɛ mɛ, gbɔn ohu etɔn gbla mɛ; ⁶ bo ze mi do blo vɔsanu-xwlemawutɔ lɛɛ we axɔluɖuto, na mi na nɔ wa zɔn na Otɔɔ ke nyi Mawu. Susu kpo hɔnhlɔn kpo ni nyi etɔn kaka do yi mavɔ mavɔ! Ami. ⁷ Mi kpɔn! E ja le akpɔkpɔ mɛ! Mɛ lɛ kpo na mɔ ɛ; mɛ ke sɔ suhwan wi lɛ lɔsu na mɔ ɛ. Akɔta ke le anyizan ji lɛɛ kpokpo na na ale do eyɔ wutu. Xojɔxo wɛ, e na nyi le! Ami. ⁸ Aklunɔ Mawu nubiwukpetɔ ke le din, bo ka ko le ɖ'anyi, bo na wa lɔ ɖɔ: "Un nyi Alufa, bo nyi Omɛga; un nyi bibɛ, bo nyi vivɔnu." ⁹ Un nɔ nyi Jaan; mye nɔvi wɛ un nyi; ɖo ɖokpo lɔ ke mi nyi xa Jezu wutu, un le ji ya xa mi, bo le axɔluɖuɖu lɔ mɛ xa mi; un le te kpo suulu kpo xa mi. Un le tɔcɛncɛn we anyizan ke e nɔ ylɔ ɖɔ Patimɔsi lɔ ji, ɖo un jla Mawuxo lɔ bo ɖe kunnu na Jezu wutu. ¹⁰ Aklunɔzan gbe, Oyɛ ɖeɖovo lɔ wa ji e, bɔ un nɔ se ogbe sisyɛn ɖe le godo ce, bɔ ogbe lɔ nɔ ɖɔ nu ɖi kpɛn ɖaxo ɖe xa, ¹¹ bo nɔ ɖɔ: "Wlan nu ke a le mɔ lɛɛ do wema mɛ, bo sɛ wema lɔ do agun Klisi tɔn cyanwe kɔ lɛɛ: agun Efɛzi tɔn, Simiini tɔn, Pɛɛgamu tɔn, Tiatii tɔn, Saadu tɔn, Filadɛlfii tɔn kpo Lawodisee tɔn kpo." ¹² Un lilɛ, bo na kpɔn mɛ ke le ɖɔ xo na un; hwe exɔn nu, un mɔ sikazogbɛnhɛnnu cyanwe. ¹³ Nu ɖi gbɛtɔ ha ɖe le cɛncɛn mɛ na ye; e do awu gaga ɖe, bɔ awu lɔ ɖi ga kaka bo wa afɔ etɔn lɛɛ ji; e ze hunkɛnnublanu ke e ze sika do blo lɔ ze sin do akɔnnu. ¹⁴ Ota etɔn kpo oɖa etɔn lɛɛ kpo we ɖi sekanfun abi ala wewe ha; nukun etɔn lɛɛ nɔ taa ɖi ozo ha. ¹⁵ Afɔ etɔn le nɔ ta ɖi ogan ke le ozo mɛ ha, bɔ ogbe etɔn syɛn ɖi oxu we zingidi ha. ¹⁶ Le alɔ etɔn aɖisi mɛ, e hɛn sunvi weyawe. Ohi tlɔntlɔn ke onu awe lɛɛ kpo le gigan na nɔ tɔn sɔn onu etɔn mɛ. Nukunme etɔn nɔ ta bo nɔ klɛn ɖi ohwe xlɛ ta ha. ¹⁷ Hwenu ke un mɔ ɛ, un jɛ anyi le nukɔn etɔn ɖi mɛ kuku ha. Amɔ e ze alɔ aɖisi etɔn do ji e bɔ e ɖɔ: «Nɔkpɔn ɖi bu gɛɛ! Un nyi nukɔntɔn bo lɛ nyi godotɔn, ¹⁸ un nyi mɛ ke le gbɛ. Un ku ɖ'anyi, amɔ odin , un le gbɛ tɛgbɛ bɔ un ɖo acɛ do oku kpodo kutomɛ kpo ji. ¹⁹ Wlan onu ke a mɔ, nu ke le jɔ odin kpodo onu ke na wa jɔ kpo. ²⁰ Nu ke sunvi cyanwe ke a le amɔ le alɔ ce aɖisi lɔ me, kpodo zɔngbɛn cyanwe ke e yi sika do blo lɔ le ɖɔ lɛɛ ke: sunvi cyanwe lɛɛ nyi wɛnzangun agun cyanwe lɛɛ tɔn, bɔ zɔngbɛn lɛɛ nyi agun cyanwe lɛɛ.»