¹ Ye yi jɛ otɔ lɔ godo dɔn le Gerazeniɛn we tomɛ. ² Hwenu ke na Jezu tɔn sɔn tɔjihun lɔ mɛ, dahwe ke mɛ oyɛ mawe ɖokpo le wa bo wa kpe. Dahwe lɔ okuxwe wɛ e nɔ nɔ. ³ Yɔdo lɛ mɛ wɛ e nɔ nɔ. Gbɛtɔ ɖe mɔ nɔ kpego bo nɔ blɛ ɛ gɛ, kpodo caba kpo can. ⁴ Ye ko blɛ ɛ azɔn namu ɖe kpodo caba kpo, bɔ e gbo caba lɛ bisese, e na bɔ mɛti ma si hɛn do te gɛ. ⁵ Okle kpodo zanmɛ kpo, yɔdo lɛ mɛ wɛ e nɔ nɔ kpodo oso lɛ mɛ. A na nɔ mɔ ɛ le axwa nu bɔ e nɔ lɛ ze okpɛn ɖida do do afɔku eɖe. ⁶ Hwenu ke na e mɔ Jezu ɖo xlanle zɔ kpɛɖe, e do wezun jɛ nukɔn n'i bo jɛ klo le nukɔn n'i. ⁷ E do axwa ɖaxo ɖaxo ɖe bo ɖɔ: «Nutɛ wɛ le nyɛ kpo yɔ kpo mɛ, Jezu Ovi Davidi Mawu ke le oji bisese lɔ tɔn? Un le do kɛnklɛn na we ɖɔ, do Mawu wutu nɔ kpɔn wa nu nyinyla ɖe do un gɛ.» ⁸ Ɖo e le ɖɔ n'i ɖɔ: «Tɔn sɔn ɖahwe lɔ mɛ, oyɛ mawe.» ⁹ Bɔ Jezu le kanse wi i ɖɔ: «Naɖe nyikɔ towe nɔ nyi?» E yi gbe na Jezu ɖɔ: «Nyikɔ ce nɔ nyi mɛ susu.» ¹⁰ Ye le do kɛnklɛn na Jezu ɖe jɛ ɖe ji tɔn bo le ɖɔ n'i ɖɔ ni nɔ kpɔn nya mye lɛ do ozɔ na toxo lɔ gɛ. ¹¹ Bɔ le flɛn, hanvi susu ɖe lɛ le bo le ɖi osa gbɔn oso lɛ gblamɛ do le din nuɖuɖu. ¹² ye le do kɛnklɛn na Jezu do le ɖɔ n'i ɖɔ: «Nya mi do hanvi xɔn lɛ mɛ, jo mi do na mi ni byɔ hanvi xɔn lɛ mɛ.» ¹³ Jezu na gbe etɔn ye, bɔ oyɛ mawe lɛ tɔn sɔn dahwe lɔ mɛ bo byɔ hanvi lɛ mɛ. Hanvi ɖi afɔɖe donu awe lɛ kpokpo bɛ wezun sɔn oji bo byɔ tɔmɛ bo ku sese. ¹⁴ Hanvi nyi tɔ lɛ do wezun byɔ toxo lɔ mɛ kpodo fike kpo lɛ kpo bɔ nu ke ye mɔ, ye yi ɖɔ na gbɛtɔ lɛ, bɔ mɛ lɛ wa susu bo wa kpɔn nu ke Jezu blo. ¹⁵ Ye wa Jezu de, bɔ hwenu ke ye mɔ dahwe ke mɛ oyɛ mawe le ɖ'anyi lɔ sɔ nu ganji ɖi gbɛtɔ ganji ha, obu ɖi yemɛ kposese. ¹⁶ Ye mɛ ke mɔ nu ke jɔ do dahwe ke mɛ oyɛ mawe gɔ gbɛzan mɛ na ɖ'anyi lɔ, le ɖɔ na mɛ ke wa odin lɛ nu ke jɔ do e j'i kpodo nu ke jɔ do hanvi lɛ ji kpo. ¹⁷ Mɛ lɛ wa ɖɔ na Jezu bo le do kɛnklɛn n'i ɖɔ: «Tɔn sɔn oto mitɔn mɛ.» ¹⁸ Hwenu ke Jezu le byɔ tɔjihun mɛ, dahwe ke mɔ kantuntun yi lɔ le do kɛnklɛn n'i na do xo do e. ¹⁹ Jezu ma yi gbe etɔn n'i gɛ, bo le ɖɔ n'i ɖɔ: «Yi oxwe towe gbe le omɛ towe lɛ de bo yi ɖɔ na ye nu ke Mawu wa na we kpodo lɛblanu ku na mɛ Mawu tɔn ke a mɔ kpo.» ²⁰ Bɔ dahwe lɔ yi le nugbomɛ bo yi ɖɔ na toxo etɔn we mɛ lɛ nu ke Jezu wa n'i lɛ kposese, bɔ e kpaca mɛ lɛ. ²¹ Ke Jezu lɛ kɔ yi akpaxwe ɖyɛ na oxu lɔ, e le oxu lɔ to bɔ togun ɖaxo ɖe lɛlɛ do e. ²² Sisɛnxɔ lɔ we nukɔntɔ ke e nɔ ylɔ ɛ ɖɔ Jairusi wa bɔ hwenu ke na e mɔ Jezu, e jɛ klo le akɔnmɛ n'i. ²³ Bɔ e le do kɛnklɛn n'i taun do le ɖɔ: «Ovi nyɔnuvu ce ja kuku gbe. Wa ze alɔ towe do ota n'i Jezu, bo xo oɖɛ n'i na azɔn etɔn na gbɔ bɔ e na do ɖo ogbɛ.» ²⁴ Jezu yi gbe bo xo do e do hwe oxwe etɔn gbe. Gbɛtɔ lɛ su taun bo xo do e, ye jan yeɖe kaka bɔ tɛnmɛ ma le gɛ. ²⁵ Nahwe ɖokpo ka le bɔ bo le ɖi hun na oxwe wyawe. ²⁶ E ji ya taun le doto lɛ we alɔmɛ. Adɔkun ke e ɖo, e zan bi do azɔn lɔ mɛ, co vivɛsise lɔ fɔn bo le jɛ e ji n'i. ²⁷ Hwenu ke na e se bɔ mɛ lɛ le ɖɔ Jezu we xo, e gbɔn godomɛ na Jezu, bɔ le gan dido etɔn mɛ, e tɛnkpɔn kaka bo ze alɔ etɔn ze ɖo Jezu we awu ke e do lɔ go,le togun lɔ mɛ. ²⁸ Ɖo e le ɖɔ le eɖe mɛ ɖɔ: «Na un ɖo alɔ nu ke e do lɔ go, azɔn ce na gbɔ.» ²⁹ Hwenu ke nyɔnu exɔn ɖo alɔ nu ke Jezu do lɔ go, ohun ke nɔ le yi gbɔn e go lɔ ɖote, bɔ e mɔ le gbɛzan etɔn mɛ ɖɔ azɔn mye tɔn bo gbɔ. ³⁰ Jezu mɔ azɔn ɖokpo ɖɔ hɔnhlɔn ɖe bo tɔn sɔn mye mɛ, bɔ e lilɛ kɔ kpɔn togun lɔ bo le kanse ɖɔ: «Mɛ ɖo alɔ nu ke un do go?» ³¹ Ahwanvi etɔn lɛ le ɖɔ n'i ɖɔ: «A mɔ tohun ɖaxo kɔ le godo na we ɖo le bo nɔ ɖɔ mɛ ɖo alɔ mye go ja? ³² Jezu kpɔn mɛ ke le akpa etɔn lɛ bo na do mɔ mɛ ke ɖo alɔ e go lɔ. ³³ Nyɔnu lɔ nyɔ nu ke jɔ le gbɛzan etɔn mɛ, wa Jezu de adohunhun kpodo sisɔsisɔkpo. E jɛ klo le Jezu nukɔn bo ɖɔ xojɔxo lɔ kpokpo n'i. ³⁴ Jezu ɖɔ n'i ɖɔ: «Ovi nyɔnu ce, nuɖiɖi towe na we gbɛ. Yi kpodo fifa kpo le azɔnhɛngbɔ towe mɛ.» ³⁵ Hwenu ke Jezu le ɖɔ oxo na nyɔnu lɔ, mɛ lɛ sɔn Jayirusi we xwegbe bo wa le ɖɔ na Jayirusi ɖɔ: «Etɛ wutu a lɛ le do tagba na Jezu? Ovi nyɔnuvu towe ko ku.» ³⁶ Hwenu ke Jezu se owɛn ke na mɛ lɛ wa bo wa do na Jayirusi, e ɖɔ na sisɛnxɔmɛgan Jayirusi ɖɔ: «Nɔ kpɔn ɖi obu gɛ, vɛ ɖinu kpo un.» ³⁷ Pyɛɛ, Jaki kpodo nɔvyɛ Jaan kpo mɛ vo, e ma yi gbe bɔ mɛɖevo xodo ye yi xwe lɔ gbe gɛ. ³⁸ Hwenu ke Jezu kpodo Pyɛɛ, Jaki kpodo Jaan kpo le sɛkpɔ Jayirusi we xwegbe, ye mɔ gbɛtɔ lɛ le axwanu, avi kpodo vosisa kpo nu. ³⁹ Do byɔ xwe lɔ gbe, Jezu le ɖɔ na ye ɖɔ: «Etɛ wutu ayixa mitɔn gbado do le bɔ mi le vi avi? Ovi lɔ ma ku gɛ, amɔ amlɔ wɛ e le ɖɔ.» ⁴⁰ Bɔ ye jɛ nuɖejan ɖɔ do Jezu go ji. E nya ye mɛ kposese jɛ gaji, bo ɖɔn ovi lɔ otɔ kpodo onɔ, kpodo ahwanvi etɔn lɛ kpo bɔ ye byɛ xɔ ke mɛ ovi lɔ le. ⁴¹ jezu ze ovi lɔ we alɔ bo le ɖɔ n'i ɖɔ: «Ovi nyɔnuvi, un le ɖɔ na we, cite.» ⁴² Azɔn ɖɔkpo ovi oxwe wyawe mɛ vi lɔ cite ble un bo ɖi zɔnli. Bɔ e kpaca ye ɖaxo. ⁴³ Jezu ɖɔ ye ni bo blo nuɖuɖu n'i bɔ nɔ ɖɔ na mɛti ni mɔ do na nu ke jɔ gɛ.