¹ Jezu wa lɛ sɔn flɛɛn, bo wle mɔ yi Judee gbe ji le Judɛɛn tɔ lɔ godo. Mɛ lɛɛ ka lɛ nyi ahwan bo xodo e, bɔ e jɛ nu kplɔn ye ji, le ke e ko nɔ blo ɖo lɔ. ² Falizyɛn ɖe lɛɛ ka wa xwetɔn, bo jlo na tɛn ɛ kpɔn; ye sɛ kpɔ ɛ, bo jɛ oxo kanse wi ji bo ɖɔ: "Osɛn mitɔn na gbe ɖɔ sunnu ni gbɛ asyɛ wɛ?" ³ Bɔ Jezu yi xo, bo kanse wu ye ɖɔ: " Etɛ wɛ Mɔyizi ka ɖɔ mi ni blo?" ⁴ Ye yi gbe n'i ɖɔ: "Mɔyizi na gbe bo ɖɔ e hɛn, e na wlan wema ɖɔ emye bo gbɛ ɛ, bo na nya ɛ." ⁵ Jezu ka yi gbe na ye bo ɖɔ: «Tolivivɛ mitɔn wɛ zɔn bɔ Mɔyizi gbɔ bo na osɛn exɔn wu mi. ⁶ Sɔn bibɛmɛ, hwekenu Mawu blo nu lɛe kpo vɔ, "e wa blo gbɛtɔ sunnu kpo nyɔnu kpo. ⁷ Exɔn wutu wɛ sunnu na jo otɔ kpo onɔ ɔ kpo do, bo na jɛ okpɔ xa asyɛ, ⁸ bɔ ye mɛ awe lɛɛ na trɔzɔn ɖokpo gee;" exɔn wutu, ye ma sɔ le omɛ awe nyi ɔ gɛ, amɔ, ye trɔzɔn ɖokpo gee. ⁹ Enyi lexa, hun gbɛtɔ ni bo nɔkpɔn klan onu ke Mawu dɔn ca gɛ.» ¹⁰ Ke ye wa xwe gbe, ahwanvi etɔn lɛɛ lɛ vɔ onu ɖokpo lɔ kanse wi do oxo exɔn wu, ¹¹ bɔ e ɖɔ ye ɖɔ: "Mɛ ke nya asyɛ bo ɖe nyɔnu ɖevo, acɛ wɛ e gba le nyɔnu nukɔntɔn lɔ wu. ¹² Lexa ke, enyi nyɔnu ɖe gbɛ aswɔ, bo yi ɖe ɖevo, oga wɛ e lɔ." ¹³ Mɛ ɖe lɛɛ kplan ovivu ɖe lɛɛ wa na Jezu bɔ e na xo ɖɛ do ye ji; ahwanvi etɔn lɛɛ ma ka yi gbe n'i gɛ, bo bɛ adan do mɛ lɛɛ ji. ¹⁴ Ke Jezu mɔ ye e, xomɛ sin ido ahwanvi etɔn lɛɛ wu, bɔ e ɖɔ na ye ɖɔ: "Mi jo ovikpɛvu lɛɛ do na ye ni wa di e; mi nɔkpɔn su omɔ do ye gɛ; ɖo axɔluɖuto Mawu tɔn, mɛ ke ci ye ɖɔhun lɛɛ tɔn wɛ. ¹⁵ Ma ɖɔ xojɔxo na mi: Mɛ ke ma na yi axɔluɖuɖu Mawu tɔn ɖi ovikpɛvu ɔhun gɛ ɛ, e ma na sigan byɛ e mɛ gɛ." ¹⁶ Ke e ɖɔ le e, e dɔn alɔ gbɔn ota na ye, bo xo ɖɛ do ye ji. ¹⁷ Omɔ wɛ Jezu sɔ pɛɛɛ, bo le sɔn , bɔ ovi ɖekajɛ bɛ wezun bo wa mɔ ɛ, bo jɛ klo le nukɔn n'i, bo kanse w'i ɖɔ: Mɛsi mɛ ɖagbwɛ, etɛ un ka ɖɔ na wa, bɔ Mawu na na un ogbɛ mavɔ mavɔ?" ¹⁸ Bɔ Jezu ka yi gbe n'i bo ɖɔ: "Etɛ wutu a ka ylɔ un ɖɔ mɛ ɖagbwɛ? Mɛ ɖe ma nyi mɛ ɖagbwɛ zɛ Mawu go gɛ. ¹⁹ A nyɔ osɛn lɛɛ wii: "Nɔkpɔn hu mɛ gɛ, nɔkpɔn lɔ aga gɛ, nɔkpɔn jɛ ajo gɛ, nɔkpɔn e kunnu agɔ gɛ, nɔkpɔn blɛ omɛ ɖe bo yi onu etɔn gɛ, nɔ si ta towe kpo nɛ towe kpo.» ²⁰ Bɔ ɖekajɛ lɔ ka yi gbe n'i bo ɖɔ: "Mɛsi, bɛ sɔn ovivu mɛ ce gbɔɔn wɛ un ko le nyi osɛn exɔn lɛɛ." ²¹ Jezu ka kpɔn ɛ, bɔ onu etɔn jɛ etɔn ji, bɔ e ɖɔ n'i ɖɔ: "Onu ɖokpo gee wɛ kpo na we: Yi, bo yi sa onu ke a ɖo lɛɛ kpo, bo ma akwa etɔn na wamamɔnɔ lɛɛ; exɔn tɔn, a na ɖo ɖɔkun le Mawu de; exɔn godo, bo wa, bo xodo un." ²² Amɔ, ke e se lexa, awu ku i, bɔ e sɔ omɔ awublawubla, ɖo adɔkunnɔ ɖaxo wɛ e nyi. ²³ Jezu ka kpɔn ahwavi etɔn ke lɛ do e lɛɛ bo ɖɔ: "Axɔluɖuto Mawu tɔn mɛ bibyɛ na vɛ awu na adɔkunnɔ lɛɛ kpɔn!" ²⁴ Oxo exɔn kpaca ahwanvi lɛɛ; Jezu ka lɛ yi xo, bo ɖɔ na ye ɖɔ: "Ovi ce lɛɛ, axɔluɖuto Mawu tɔn mɛ na vɛ awu lɔsu. ²⁵ Wɛnnyɛvi mɔ nu gbigbɔn na kpɔn te na osɔkɛtɛ hugan adɔkunnɔ na byɛ axɔluɖuto Mawu tɔn mɛ." ²⁶ Ke ahwanvi etɔn lɛɛ se lexa a, e lɛ kpaca ye, bɔ ye kanse Jezu ɖɔ: " Mɛ wɛ ka sigan mɔ hwlɛngan lɔ lo?" ²⁷ Bɔ Jezu kpɔn ye ɖoxlan, bo ɖɔ: "Gbɛtɔ lɛɛ wɛ onu exɔn glo, e ma ka le lexa na Mawu gɛ; ɖo Mawu kpe onu lɛɛ kpo wu. ²⁸ Piyɛɛ ka yi xo, bo ɖɔ n'i ɖɔ: "Mye lɛɛ xɛn ka jo nu lɛɛ kpo do, bo xodo we." ²⁹ Jezu ka yi xo, bo ɖɔ: "Ma ɖɔ xojɔxo na mi: mɛ ke na jo oxwe etɔn do, bo na jo nɔvyɛ nyɔnu, alo nɔvyɛ sunnu do, bo na jo otɔ kpo onɔ kpo do, bo na jo ovi do, bo na jo ogle etɔn do, ɖo nyɛ kpo owɛn Ɖagbe lɔ kpo wu u, ³⁰ e na wa mɔ oxwe, bo na mɔ nɔvi sunnu kpo nɔvi nyɔnu, bo na mɔ onɔ, bo na mɔ ovi, bo na mɔ ogle, bɔ onu exɔn ke e jo do lɛɛ, e na mɔ lexa tɔn donu kanwe ko le odin; e ka wa ya a, e na lɛ mɔ ogbɛ mavɔ mavɔ. ³¹ Mɛ ke jɛ nukɔn odin lɛɛ susu na wa ci godo, bɔ mɛ ke le godo odin lɛɛ susu na wa jɛ nukɔn." ³² Ye le omɔ ji, bo le fan okpo do le sɔn yi Jeluzalɛmu, bɔ Jezu le nukɔn na ye. Ado le hu mɛɖxlan lɛɛ, bɔ mɛ ke xodo ye lɛɛ le obu ji. Jezu ka ylɔ mɛ ɖoxlan etɔn wyawe lɛɛ le mɛ lɛɛ mɛ yi jɛ lagbe, bo jɛ onu ke na jɔ do e ji le yiya mɛ din lɔ tinmɛ na ye ji bo ɖɔ: ³³ "Mye ke le sɔn yi Jeluzalɛmu din; e na sɔ nyɛ ovi gbɛtɔ tɔn jo na avɔnu-xwlmawutɔgan lɛɛ, kpo osɛnkplɔnmɛtɔ lɛɛ kpo, bɔ ye na da okuhwɛ na un, bo na jo un na mɛ ke ma nyi Jwifu gɛ lɛɛ. ³⁴ Ye na ɖe adi bo na ko un; ye na tun otan kɔn nyi awu ye; ye na ze olanba do xo un, bo na hu un. Azan atɔngɔ lɔ gbe, un ka na fɔn sɔn ku." ³⁵ Exɔn godo, ovi zebedee tɔn ke nyi Jaki kpo Jaan kpo wa Jezu de, bo ɖe kpa n'i ɖɔ: "Mɛsi, mi jlo ɖɔ a na blo onu ke mi ja bibyɔ we gbe lɔ na mi." ³⁶ Jezu ka kanse ye ɖɔ: "Etɛ mi jlo ɖɔ ma blo na mi?" ³⁷ Bɔ ye yi gbe n'i ɖɔ: "Hwe ke nu a na wa le susu towe mɛ, na gbe, na mi mɛ awe lɛɛ na wa flɔn akpa na we; mɛ ɖokpo na flɔn aɖisi towe, bɔ mɛ awegɔ na flɔn amyɔ towe xwe." ³⁸ Jezu ka yi gbe na ye bo ɖɔ: "Mi na nyɔ onu ke mi le byɔ gɛ. Awuvɛ kɔfo ke nu gbe unja, mi na sigan nu xa un wɛ? Awuvɛ omɛnylɔ dotɔmɛ tɔn ke un na lɛɛ, mi na sigan lɛ?g" ³⁹ Ye ka yi gbe n'i ɖɔ: "Mi na kpe wu." bɔ Jezu ɖɔ na ye bo ɖɔ: "Mi na wa nu awuvɛ kɔfo ke nu gbe un ja lɔ, bo na lɛ awuvɛ omɛnylɔ dotɔmɛ tɔn ke lɛ gbe un ja lɔ xonugbo. ⁴⁰ Amɔ, aɖisi ce xwe alo amyɔ ce xwe ninɔ tɔn, e ma nyi nyɛ wɛ na na ogbe etɔn gɛ. Mɛ ke Mawu ko blo tɛnmɛ exɔn lɛɛ ɖanyi na lɛɛ tɔn wɛ." ⁴¹ Ke omɛɖoxlan awo ɖyɛ lɛɛ se nu ke Jaki kpo Jaan kpo byɔ lɔɔ, onu yetɔn vɛ le ye go. ⁴² Jezu ka ylɔ ye mɛ kpo kple, bo ɖɔ na ye ɖɔ: "Mi nywɛ ɖɔ mɛ ke e nɔ ylɔ ɖɔ togan le anyizan ji fi lɛɛ, acɛ ke jlo ye wɛ ye nɔ kpa na otovi yetɔn lɛɛ, bɔ oganhunutɔ lɛɛ lɔsu nɔ kpa acɛ na ye. ⁴³ Onu ma ka ɖo na nyi lexa le mye lɛɛ cɛncɛn gɛ; amɔ, mɛɖe kpekpe ke jlo na nyi ogan le mi mɛ, hun ni bo nyi omɛsɛntɔ mye lɛɛ tɔn. ⁴⁴ Mɛ ɖe ka jlo na nyi nukɔnnɔtɔ le mi mɛ, hun ni nyi kannumɔ na mɛ lɛɛ kpo. ⁴⁵ Ɖo nyɛ ovi gbɛtɔ tɔn, e na sɛn un wutu mɛ un wa gɛ; amɔ, omɛ sɛn gbe wɛ un tɔn bo wa, bo na ze ogbɛ ce sɔ jo bo na do xɔ ogbɛ na omɛ susu. ⁴⁶ Ye wa yi jɛ oto ke e nɔ ylɔ ɖɔ Jeliko lɔ mɛ, bɔ Jezu kpo ahwanvi etɔn lɛɛ kpo wa le tɔn sɔn toxo lɔ mɛ, bɔ omɛ susu ɖe lɛɛ ka wa cite , bo xodo ye. Omɛ nukuntɔnnɔ nubyɔɖutɔ ɖe le ote exɔn mɛ, bɔ e nɔ ylɔ ɛ ɖɔ Baatimɛɛ, tinmɛ etɔn wɛ nyi Timɛɛ we ovi sunnu. E le anyififlɔn le omɔ to. ⁴⁷ Ke e se ɖɔ Jezu Nazalɛtitɔn wɛ, e jɛ axwa do ji bo ɖɔ: "Jezu Ovi Davidi tɔn, ku nublawu na un!" ⁴⁸ Omɛ susu bɛ adan do e ji, bo ɖɔ n'i ɖɔ ni bo bɔ nu; amɔ, e nɔ lɛ do axwa d'e ji bo ɖɔ:"Ovi Davidi tɔn, ku nublawu na un. ⁴⁹ Jezu ka nɔ te, bo ɖɔ: "MI yi ylɔ ɛ wa!" Bɔ ye yi ylɔ ɛ, bo ɖɔ n'i ɖɔ: "Kpan akɔn, cite, e le ylɔ we." ⁵⁰ Bɔ nukuntɔnnɔ lɔ ɖe awu etɔn ɖaxo lɔ sɔ nyi gbe, bo do wezun yi Jezu de." ⁵¹ Jezu ka kanse w'i ɖɔ: "Etɛ wɛ a jlo na ma blo na we?" Omɛ lɔ ka yi gbe n'i ɖɔ: "Mɛsi, blo na ma lɛ vɔ mɔ nukunnu." ⁵² Jezu ka ɖɔ n'i ɖɔ: "Bo sɔn, onu ke a ɖi lɔ zɔn bɔ Mawu gbɔ azɔn na we." Tlolo, hɔn ɖo kpo o, nukun etɔn hun, bɔ e wle omɔ bo jɛ Jezu godo.