¹ Ekɔ wɛ nyi bibɛnu wɛn ɖagbe Jezu Klisi Ovi Mawu tɔn tɔn. ² Ɖi le ke ye wlan ɖo le wema oxoyiɖɔtɔ Ezayi tɔn mɛ:«Kpɔn un sɛ owɛndotɔ do nukɔn towe, mɛ ke na sɔ nu na omɔ towe.» ³ Mɛɖe le do axwa le gbetoto mɛ: «Mi blo omɔ ganji n'i.» ⁴ Jaan wa bo nylɔ mɛ lɛ do tɔmɛle gbetoto mɛ, bo lɛ ɖɔ xo do mɛ nylɔ do tɔmɛ lɛvɔjɔ na ohwɛ gbɛtɔ lɛ tɔn go. ⁵ Judee to lɔ kpokpo, Jeluzalɛmu to lɔ kpokpo le wa Jaan de bɔ e le nylɔ ye do tɔmɛ le Judɛn we otɔ lɔ to, hwenu ke ye le ɖɔ ohwɛ ye tɔn lɛ. ⁶ Jaan do osɔ kpotɔnɔ we agbaza bɔ ofun le go, bo do gojiblanu do e ji. Owui aku kpodo oxɛ lɛ kpo wɛ e nɔ ɖu. ⁷ E le la bo nɔ ɖɔ:«Nyɛ godo mɛ ke na wa lɔ ɖo hɔnhlɔn xu nyɛ, bɔ un trɛ jɛxa na tun afɔkpa kan etɔn lɔsu gɛ.» ⁸ Osin mɛ wɛ nyɛ nylɔ mi do, eyɔ na nylɔ mi do Oyɛ ɖeɖovo lɔ mɛ. ⁹ Bɔ Jezu sɔn Nazalɛti do le wa gletoxo Galile tɔn mɛ. Jaan nylɔ Jezu do Judɛn tɔ lɔ mɛ. ¹⁰ Hwenu ke Jezu le tɔn sɔn osin lɔ mɛ, e mɔ bɔ oji hun, bɔ Oyɛ ɖeɖovo lɔ jɛte ɖi ahwanlɛn xɛ ha bo wa jɛ do e ji. ¹¹ Ogbe ɖokpo sɔn oji bo le ɖɔ: «A nyi Ovi wannyinanɔ ce. A nyi awajijɛ ce gigɔ.» ¹² Azɔn ɖokpo, Oyɛ ɖeɖovo lɔ dɔn ɛ do yi gbetoto mɛ. ¹³ E blo azan kanɖe le flɛn onu ma ɖu osin ma nu, kpodo kanlin baɖabaɖa lɛ kpo bɔ wɛnzangun lɛ le sɛn. Hwe exɔn nu, awovi lɔsu le tɛn kpɔn. ¹⁴ Gbeɖokpo ye wle Jaan do gankpamɛ. Hwe exɔn nu, Jezu le la oxo Mawu tɔn le Galile. ¹⁵ Bo le ɖɔ: «Hwenu Mawu tɔn ko wa bɔ axɔluɖuta Mawu tɔn ko le akpa na mi. Mi ɖyɔ gbɛzan mitɔn bo ɖinu na oxo Mawu tɔn. ¹⁶ 16 Do le gbɔn Galile we oxuto, Jezu mɔ Sinmɔɔ kpo nɔvyɛ Andle kpo bɔ ye le da oɖɔ ɖo oɖɔdatɔ wɛ nyi ye. ¹⁷ Jezu ɖɔ na ye ɖɔ: «Mi wa bo xo do un na ma ze mi do trɔzun oɖɔdatɔ ke nɔ wle gbɛtɔ lɛ. ¹⁸ Azɔnɖokpo ye jo oɖɔ yetɔn lɛ do bo xodo Jezu. ¹⁹ Nukɔn yiyi Jezu tɔn mɛ kpɛɖe, e mɔ zebede we vi awe lɛ Jaki kpodo Jaan kpo le tɔjihun mɛ bɔ ye le blo oɖɔ yetɔn lɛ ɖo. ²⁰ Jezu ylɔ ye mɛ awe lɛ. Azɔnɖokpo ye jo yetɔ kpodo azɔn wa na mɛ tɔ yetɔn lɛ kpo do bo xo do e. ²¹ Bɔ ye wa Kapɛnawumu tomɛ. Le gbɔjɛzangbe, Jezu yi sisɛnxɔ mɛ bo le kplɔn nu mɛ lɛ. ²² Nukplɔnmɛ etɔn lɛ zun nukpaca na ye, ɖo e le kplɔn nu ye ɖi mɛ ke ɖo acɛ ɖe. Nukplɔnmɛ etɔn gbɔn vo na osɛn kplɔnmɛtɔ ɖyɛ lɛ tɔn. ²³ Hwe exɔn nu pɛpɛpɛ, dahwe ɖokpo le sisɛnxɔ yetɔn lɔ mɛ bo ɖo oyɛ mawe ɖokpo bo le axwa nu. ²⁴ Bo le ɖɔ: «Jezu Nazalɛti tɔn etɛ a le ba na mi? Awa fi na do hɛn mi gble wɛ? Un nyɔ gbɛtɔ ke a nyi. A nyi ɖeɖovo Mawu tɔn.» ²⁵ Jezu gbɛ nu na oyɛ mawe lɔ bo ɖɔ n'i ɖɔ: «Ma se nu, bo tɔn sɔn dahwe lɔ we gbɛzan mɛ.» ²⁶ Bɔ Oyɛ Mawe lɔ ze ze xu anyizanmɔ, bɔ tɔn sɔn gbɛzan etɔn mɛ kpo axwa ɖaxo ɖe kpo. ²⁷ Evivi na togun lɔ kpokpo, bɔ ye nɔ kanse yeɖe ɖɔ: «Etɛ nyi kɔ? nukplɔnmɛ ɖevo kpo acɛkpikpa ɖevo kpo wɛ? E nɔ zɔn nu oyɛ mawe lɛ lɔsu bɔ ye nɔ blo ɖo e ji n'i.» ²⁸ Bɔ nu exɔn ke Jezu blo, e gbakpe Galile we oto lɔ kposese mɛ azɔn ɖokpo. ²⁹ Hwenu ke e tɔn sɔn sinsɛnxɔ lɔ mɛ, ye zɔn kpodo Jaki kpo Jaan kpo do wa Sinmɔɔ kpodo Andle kpo we xwegbe. ³⁰ Pyɛɛ asyɛ nɔ ɖo zozo bo mlɔ anyi bɔ ye ɖɔ xo etɔn na Jezu. ³¹ Jezu wle aba etɔn hɛn bo ze e cite. Zozo lɔ tɔn sɔn emɛ ble un bɔ e yi jonɔ yetɔn. ³² Hwedo etɔn ke ohwe yi xɔ, ye bɛ mɛ ke le jɛ azɔn kpo mɛ ke oyɛ mawe le do tagba na lɛ susu wa n'i. ³³ Toxo lɔ kposese kple le xɔmɔ lɔ nu. ³⁴ Jezu gbɔ azɔn na mɛ ke le jɛ azɔn voɖevoɖe susu lɛ, bo nya oyɛ mawe susu, amɔ e ma na ogbe oyɛ mawe lɛ susu bɔ ye na do ɖɔ xo gɛ, ɖo ye nyɔ Jezu wi. ³⁵ E fɔn zan zanfunnu hwenu ke zinvlun le do kpɛɖe bo sɔ mɔ do gbetoto mɛ, bɔ le flɛn e ja oɖɛ xo ji. ³⁶ Sinmɔɔ kpodo mɛ ke le flɛn le kpo le ba ɛ na mɔ. ³⁷ Ye mɔ ɛ bo le ɖɔ n'i ɖɔ: «Mɛ lɛ kposese le ba na mɔ we.» ³⁸ Eɖɔ: Mi ni yi fiɖevo le gletoxo ke le akpa lɛ mɛ na ma do yi ɖɔ oxo Mawu tɔn na ye. Nu ke hɛn un wa fi xɛn.» ³⁹ E gbɔn Galile toxo lɔ kposese mɛ, do le ɖɔ oxo Mawu tɔn gbɔn sisɛnxɔ lɛ kposese mɛ bo do lɛ le nya oyɛ mawe lɛ lɔsu gba. ⁴⁰ Gudunɔ ɖokpo wa Jezu de, oklo jijɛmɛ bo le savo n'i ɖɔ: «A jlo hun, a na lɛ un zun we.» ⁴¹ Jezu gɔ kpodo lɛblanu kpo dlɛn alɔ etɔn bo ɖo alɔ ego bo le ɖɔ: «Un jlo ganji. Mɔ lɛwe yi.» ⁴² Azɔn ɖokpo, gudu lɔ jo e do bɔ e lɛ zun onu wiwe. ⁴³ Jezu ɖɔ xo na dahwe lɔ taun bo ɖɔ n'i ɖɔ ni bo sɔn, ⁴⁴ Jezu lɛ ɖɔ n'i ɖɔ: «Cɔ ɖewe, bo nɔ kpɔn ɖɔ xo ɖe na mɛɖe gɛ, amɔ yi bo ze ɖewe xlɛ avɔsanu xwle Mawu tɔ lɛ, bɔ nu ke a na na lɛwe towe wɛ nyi ɖɔ nu ke Moyizi zɔn, bɔ e na nyi kunnu ɖiɖe ha na ye.» ⁴⁵ Amɔ etɔn bo ja oxo lɔ ɖɔ na mɛ lɛ kposese ji. E ma oxo lɔ kaka bɔ Jezu ma si sɔ kpego bo na byɛ toxo ɖe mɛ kpodo fifa kpo ba gɛ. E gbɔ ci toxo ɖe mɛ le ogbetoto lɛ mɛ, bɔ mɛ lɛ sɔn filɛ kpo bo le wa ede.