¹ Azan nukɔntɔn le Aklunɔzan gbla lɔmɛ le zanfunnu gbɔjɛzan wayi godo, Mali Madgala tɔn kpodo Mali ɖyɛ kpo wa na do kpɔn yɔdo lɔ mɛ. ² Na do ɖɔ, anyizan hunhun, ɖo wɛnzagun ɖokpo jɛte sɔn sɛxwe bo wa bli okpɛn ɖaxo ke ye ze do yɔdo lɔ nu bo flɔn okpɛn lɔ ji. ³ Ninɔmɛ etɔn, na do ɖɔ, e nyi nuɖe bo le klɛn, bɔ nu ke e do lɛ ciɖi sekanfun ha bo we pepepe. ⁴ Obu ɖi yɔdocyɔtɔ lɛ bɔ ye nɔ sisɔ bo ciɖi mɛ kuku ha. ⁵ Wɛnzagun lɔ le ɖɔ na nyɔnu ke le flɛn lɛ ɖɔ: «Mi nɔ kpɔn ɖi bu ɖekpekpe gɛ, un nywɛ ɖɔ Jezu ke ye kɛ Akluzu ji lɔ wɛ mi le ba. ⁶ E ma sɔ le fi ba gɛ, e ko fɔn fɔn mɛ kuku lɛ mɛ ɖi le ke e ko ɖɔ ɖo. Mi wa kpɔn fike ye ze ocyɔ lɔ ze mlɔn anyi ɖo. ⁷ Mi do wezun ble un bo yi ɖɔ na ahwanvi etɔn le ɖɔ: «Jezu ko fɔn sɔn ku bo le te kpɔn mi le Galile. Nu ke na ɖɔ na mi wɛ nyi ɖɔ mi yi dɔn mi na mɔ ɛ. ⁸ Nyɔnu lɛ bɛ wezun ble un adohuhu kpo awajijɛ kpo na do yi ɖɔ nu ke wɛnzagun lɔ ɖɔ kpodo nu ke ye mɔ kpo na ahwanvi Jezu tɔn lɛ. ⁹ Jezu kpe ye do mɔji bo le ɖɔ na ye ɖɔ: «Fifa ni nyi mitɔn.» Nyɔnu lɛ sɛkpɔ ɛ, bɔ afɔ hɛn na Jezu mɛ, ye jɛ gigo kpodo susu kpo ze n'i ji. ¹⁰ Bɔ Jezu le ɖɔ na nyɔnu xɔn lɛ ɖɔ: «Obu ni nɔ kpɔn ɖi mi gɛ. Mi ɖɔ na anɛ ɛ vi lɛ ɖɔ ye ni bo wa kpe un do Galile, ye bo na mɔ un le dɔn.» ¹¹ Hwenu ke na nyɔnu lɛ le sɔn, yɔdocyɔtɔ ke mɔ ke mɔ nu xɔn lɛ kposese byɔ toxo lɔ mɛ do yi ɖɔ na sisɛnxɔmɛgan lɛ nu ke jɔ lɛ kposese. ¹² Sisɛnxɔmɛgan lɛ yi mɔ mɛxoxo lɛ bɔ gbeta yetɔn wɛ nyi ɖɔ, ye ze akwa ɖaxo susu ze jo na sɔja ke mɔ nu lɔ lɛ. ¹³ Bo le ɖɔ na ye ɖɔ: «MI yi ɖɔ na gbɛtɔ lɛ ɖɔ, ahwanvi etɔn lɛ wa hwenu ke mi le d'amlɔ bo wa ze cyɔ Jezu tɔn lɔ.» ¹⁴ Na acɛkpatɔ we gan lɔ se le, na e byɔ tomɛ n'i, mi na fa ɛ bɔ hwe exɔn nu e ma sɔ na wa onu nyinyla ɖe do mi ba gɛ. ¹⁵ Sɔja lɛ yi akwa lɔ nugbo, bo blo e ɖi le ke ye zɔn ye ɖo pɛpɛpɛ. Kaka jɛ egbe din, otan xɔn gbɛ kpo le te tɛgbɛ. ¹⁶ Ahwanvi Jezu tɔn wo-ɖokpo lɛ yi Galile tomɛ nugbo le oso ke Jezu ɖɔ na ye lɔ ji. ¹⁷ Hwenu ke ye mɔ Jezu, ye je susu kpodo kpikpa kpo ze n'i ji, amɔ mɛɖe lɛ kpo le xo nu kpɔn. ¹⁸ Jezu sɛkpɔ ye bo le ɖɔ na ye ɖɔ: «Hɔnhlɔn kpodo acɛkpikpa lɛ kposese kpo wɛ un yi sɔn sɛxwe kpodo anyizan ji kpo.» ¹⁹ Mi yi bo ze akɔta lɛ kpokpo do trɔ zun ahwanvi ce lɛ, lo bo nylɔ ye do tɔmɛ Jaan tɔn le Otɔ, Ovi kpodo Yɛ Ɖeɖovo lɔ nyikɔ mɛ. ²⁰ Mi kplɔn ye nu ke un zɔn mi lɛ kposese. Nugbo mɛ, un le okpɔ xa mi hwe lɛ kposese nu kaka do yi vivɔnu ogbɛ lɔ tɔn.