¹ Hwenu ke anyi hɔn tlolo ɔ, vɔsanu-xwlemawutɔgan lɛɛ kpo, kpo tomɛxo lɛɛ kpo kple, bo ɖe gbeta tɔn, bo ɖɔ ye na hu Jezu. ² Ye bla Jezu, bo kplan ɛ yi ze jo na tokpɔngan Pilatu. ³ Ke Judasi ke sa Jezu lɔ mɔ ɖɔ e ɖo okuhwɛ n'i ɔ, nu ke e wa lɔ wa vɛ n'i, bɔ e ze akwagan gban lɔ yi jo na vɔsanu-xwlemawutɔgan lɛɛ kpo kpo tomɛxo lɛɛ kpo, ⁴ bo ɖɔ: " un hu hwɛ; mɛ ke un jo na mi ɔ, xomɛvɔnɔ wɛ e nyi. ye ka nyi gbe n'i bo ɖɔ: "Etɛ wɛ kan mi le emɛ? Yɔ wɛ exɔn kan." ⁵ Judasi ka bɛ akwagan gban lɛɛ bo sɔ nyi do sinsɛnxɔ mɛ, bo lɛkɔ bo sɔn. wexɔn godo, e yi do kan kɔ bo ku. ⁶ Vɔsanu-xwlemawutɔgan lɛɛ ka yi cyan akwa lɛɛ, bo ɖɔ: "Le osɛn mitɔn mɛ ɔ, e ma ɖo na ze akwa exɔn yi do sinsɛnxɔmɛ kwa ji gɛ, ɖo akwa e e na bo na do hu mɛ wɛ." ⁷ Ke ye gbeje kpɔn kaka ɔ, ye wa ɖo ogbe kpɔ, bo ze akwa lɔ do yi xɔ ozɛnmɛtɔ ɖe we ogle, bo do blo okuxwe na mɛ ke ma nyi Jwifu gɛ lɛɛ. ⁸ Nu ke wu e nɔ ylɔn anyizan exɔn ɖɔ kanjɔgle kaka jɛ egbe ɔ xɛn. ⁹ Onu nyi le, nɛ oxo ke Mawu ko ɖɔ d'anyi gbɔn gbeyiɖɔtɔ etɔn Jelemii ji ɔ na do jɛ; e wɛ nyi ɖɔ: "Ye bɛ akwagan gban lɛɛ; akwa exɔn ji wɛ ovi Izlayɛli tɔn ɖyɛ lɛ ɖɔ gbo do, bo do xɔ Jezu. ¹⁰ Ye ze akwa lɔ do xɔ zɛnmɛtɔ ɖe we ogle, leke Aklunɔ ko ɖɔ ɖo na un d'anyi lɔ." ¹¹ Ke Jezu wa tokpɔngan Pilatu we nukɔn ɔ, tokpɔngan lɔ kanse wi ɖɔ: "Yɔ wɛ nyi Jwifu lɛɛ we axɔlu u?" Jezu ka yi gbe n'i ɖɔ: "Yɔ wɛ dɔ." ¹² Amɔ, hwenu ke vɔsanu-xwlemawutɔgan lɛɛ kpo tomɛxo lɛe kpo le ohwɛ do Jezu wɛ le Pilatu we nukɔn ɔ, Jezu ma kɛ nu gɛ, ¹³ bɔ Pilatu ɖɔ n'i ɖɔ: "A se ohwɛ geɖe geɖe ke do we wɛ ye le?" Etɛ wɛ a mɔ d'e wu?" ¹⁴ Jezu ma ka kɛ nu do oxo ke ye ɖɔ do ewu lɛɛ ɖe kpekpe wu gɛ, bɔ e kpaca tokpɔngan lɔ kaka. ¹⁵ Dindin wayi we oxwe hwenu tɛgbɛ ɔ, tokpɔngan hlɔma tɔn lɔ nɔ ɖe ogantɔ ke ahwan lɛ si gan byɔ ɔ ɖokpo nyi te. ¹⁶ Hwe exɔn nu ɔ, ogantɔ ɖokpo ka le ogankpa lɔ mɛ, bɔ e nɔ ylɔ ɛ ɖɔ Balabasi. Ogantɔ exɔn ɔ, oto lɔ kpokpo wɛ nywɛ wu. ¹⁷ Ke otogun lɔ wa kplee, Pilatu kanse ye ɖɔ: "Mɛ wɛ mi jlo ɖɔ ma ɖe nyi te na mi le ogantɔ lɛɛ mɛ? Jezu Balabasi lɔ wɛ, alo Jezu ke e nɔ ylɔ ɖɔ Klisi lɔ wɛ a?" ¹⁸ Ɖo e nywɛ ganji ɖɔ mɛnuvɛlemɛwu wɛ zɔn bɔ ye wle Jezu Klisi wa na emye. ¹⁹ Ohwɛ lɔ wɛ Pilatu le ɖɔ, bɔ asyɛ do owɛn sɛ do e bo dɔ: "Nuɖe ni nɔ kpɔn kan we le omɛ exɔn we oxo mɛ gɛ, xomɛvɔnɔ wɛ. Ɖo ozan ekɔ mɛ, un ku dlɔ baɖabaɖa ɖe do ewu, bo mɔ awuvɛ tawun le amlɔ mɛ." ²⁰ Vɔsanu-xwlemawutɔgan lɛɛ kpo tomɛxo lɛɛ kpo ka blo kaka bɔ ahwan lɔ yi do oxo yetɔn ji, bo byɔ ɖɔ e ni jo Balabasi, bo hu Jezu. ²¹ Tokpɔngan lɛ wa yi xo, bo kanse ye ɖɔ: le omɛ awe ekɔ lɛɛ mɛɔ, mɛ wɛ mi jlo na ma ɖe nyi te na mi?" Ye ka yi gbe n'i ɖɔ: "Balabasi." ²² Pilatu ka kanse ye ɖɔ: "Jezu ke e nɔ ylɔ ɖɔ Klisi lɔɔ, naɖe un ka na wa onu etɔn do?" Bɔ ye mɛ bi yi gbe bo ɖɔ: "Ka ɛ nyi Akluzu ji." ²³ Pilatu ka lɛɛ kanse ye ɖɔ: "Onu nyinyla tɛ wɛ e ka wa?" Ye ka do axwa sinsyɛn bo ɖɔ: "Ka ɛ nyi Akluzu ji." ²⁴ Ke Pilatu mɔ ɖɔ oxo lɔ ma le kpa ɛ gɛ, bɔzingidi ahwan lɔ tɔn ka le jɛ eji jɛn wɛ ɔ, e ze osin, bo klɔ alɔ le ye mɛ kpokpo we nukunmɛ, bo ɖɔ: "Un ma nyɔ nuti do le omɛ ekɔ we oku mɛ gɛ; mye wɛ e kan." ²⁵ Bɔ ahwan lɔ kpokpo yigbe bo ɖɔ: "Omɛ exɔn we ku ni nɔ kɔ na mye kpo ovi mitɔn lɛɛ kpo. ²⁶ Ohwe exɔn nu, Pilatu ɖe Balabasi nyi te na ye, bo ka zɔn bɔ bɔ e xo Jezu kpo oba kpo. Exɔn godo, e jo e na sɔja lɛɛbo dɔ ye ni yi ka ɛ ɖo akluzu ji. ²⁷ Tokpɔngan we sɔja lɛɛ ka kplan Jezu yi hɔnmɛ, bo kple ahwankpa lɔ kpokpo do ewu. ²⁸ Ye ɖe awu ke e do lɛɛ kpo sɛ le kɔ n'i, bo ka ze awu vɛvɛ ɖaxo ɖe bo do n'i. ²⁹ Ye ze owun bo do lɔn axɔlugbakɔn ɖokpo, bo ze xwe n'i, bo ba fantin ɖokpo do alɔ etɔn aɖisi tɔn mɛ, bo nɔ jɛ klo le nukɔn n'i, bo nɔ le ɖɔ sramɛ n'i, bo nɔ le ko e, bo nɔ ɖɔ: "Miɖe kɔ na axɔlu Jwifu lɛɛ tɔn!" ³⁰ Ye nɔ tun tan kɔn nyi ewu, bo nɔ yi fantin lɔ sɔ alɔ mɛ n'i, bo nɔ do ota n'i. ³¹ Ke ye ɖɔ sramɛ n'i bo ko e vɔ, ye wa ɖe awu vɛvɛ ɖaxo lɔ sɛ le kɔ n'i, bo lɛ ze awu elɔsu tɔn lɛɛ do n'i. Ye kplan ɛ, bo na yi ka ɛ ɖo akluzu ji. ³² Hwenu ke ye tɔn sɔn toxo lɔ mɛ, ye kpe Slemɛɛnu ɖokpo, bɔ e nɔ ylɔ ɛ ɖɔ Sinmɔɔ. Sɔja lɛɛ hugan ɛ, bo ɖiɖa ɛ akluzu Jezu tɔn. ³³ Ke ye jɛ otɛn ke mɛ e nɔ ylɔ ɖɔ Gɔlugɔta do Ebleegbe mɛ; Gɔlgɔta we tinmɛ wɛ nyi "Takago tɛnmɛ." ³⁴ Ye ba vɛɛn bo kɔn nuvivɛ ɖe do e mɛ, bo na Jezu ɖɔ ni nu. Ke e do nu, e gbɛ nunu. ³⁵ Sɔja lɛɛ ka Jezu ɖo akluzu ji; ye nyi akɔ do awu etɔn lɛɛ ji, bo ma. ³⁶ Exɔn godo ɔ, sɔja lɛe flɔn anyi, bo jɛ cicɔ ɛ ji. ³⁷ Bo na ɖe nu ke we okuhwɛ e ɖo n'i ɔ xlɛ ɔ, e wlan nu ekɔ, bo ka do akluzu lɔ wu le ota etɔn bo ɖɔ: "Jezu, axɔlu Jwifu lɛɛ tɔn lɔ ke." ³⁸ Ye ka ajotɔ nudidawatɔ awe ɖo akluzu lɔji gɔna Jezu: ɖokpo le aɖisi xwe etɔn, bɔ mɛ ɖokpo le amyɔ xwe etɔn. ³⁹ Mɛ ke le dindin wɛ lǝɛ nɔ hunhun ta, bo nɔ le zun i, ⁴⁰ bo nɔ ɖɔ: "Yɔ mɛ ke ɖɔ emina gba sinsɛnxɔ Mawu tɔn, bo na ze azan atɔn ɖote, bo na vɔ gba ɖevo lɔ ke? hwlɛn ɖewe gan o! E nyi Mawu vi jɛn a nyi, hun jɛ te sɔn akluzu lɔ ji." ⁴¹ Le jɛn wɛ vɔsanu-xwlemawutɔgan lɛɛ, kpo sɛnkplɔnmɛtɔ lɛɛ kpo, kpo tomɛxo lɛɛ kpo lɛ le sramɛ ɖɔ n'i wɛ, bo nɔ ɖɔ: ⁴² "E hwlɛn mɛ ɖevo lɛ gan, bo ka ma sigan hwlɛn eɖe gan gɛ. Alo Axɔlu Izlayɛli tɔn mɛ e nyi bo ɖɔ? Ni bo jɛ te sɔn akluzu lɔ ji o! E xɔntɔn, mi na ɖi nu n'i. ⁴³ E ɖeji do Mawu wu; nɛ nyi Mawu lɔ nyi wan n'i xonugbo o, hun ni bo hwlɛn ɛ gan nɛ mi na kpɔn; ɖo e ɖɔ: "Un nyi ovi Mawu tɔn." ⁴⁴ Lexa ke wɛ ajotɔ ke e ka ɖo akpa n'i lɛɛ lɔsu le zunzun i wɛ ɖo. ⁴⁵ Sɔn ogan wyawe mɛ kaka wa jɛ ogan atɔn mɛ hwe lɛkɔ ɔ, zinvlu cyɔn oto lɔ kpokpo. ⁴⁶ ke e wa jɛ hwelɛkɔ ɔ, Jezu do axwa sinsyɛn ɖe, bo ɖɔ: "Eli, Eli, lama sabakitani!" (Tinmɛ etɔn wɛ nyi: "Mawu ce, naɖe e nyi ɖo bɔ a jo un do?") ⁴⁷ Mɛ ke le flɛn lɛɛ ɖe se oxo ke Jezu ɖɔ exɔn lɔ, bo ɖɔ: "E le Elii ylɔ ɔn." ⁴⁸ Tlolo ɔ, me ɖokpo do wezun, bo ze xumɛkoca bo nylɔ do vɛɛn ke hwan nyanya mɛ, bo dlɛn do Jezu bo ɖɔ ni nu. ⁴⁹ Mɛ ɖevo lɛɛ ka ɖɔ na mɛ ke le na vɛɛn wi lɔ bo ɖɔ: "Jo e do nɛ mi na kpɔn ɖɔ Elii na wa hwlɛn ɛ gan wɛ ja." ⁵⁰ Jezu lɛ do axwa ɖaxo ɖe bo bɔnu. ⁵¹ Azɔn ɖokpo ɔ, avɔ ɖaxo ke le sinsɛnxɔ mɛ ɔ ma ɖo awe, sɔn oji wa do; anyizan hunhun, bɔ okpɛn lɛɛ zɛ. ⁵² Yɔdo lɛɛ hun, bɔ mɛɖeɖovo Mawu, tɔn ke ko ku lɛɛ susu fɔn. ⁵³ Ye tɔn sɔn yɔdo lɛɛ, bɔ ke Jezu fɔn godo, ye byɛ Jeluzalɛmu to ɖeɖovo lɔ mɛ, bɔ mɛ susu mɔ ye. ⁵⁴ Ke sɔja kanwekohwangan kpo sɔja ke le cɔ Jezu xa ɛ lɛ kpo mɔ le ke anyizan hunhun ɖo ɔ, obu ɖaxo ɖe jɛ ye ji, bɔ ye nɔ ɖɔ: "Omɛ ekɔ, ovi Mawu tɔn jen wɛ e nyi xonugbo." ⁵⁵ Nyɔnu ke nɔ xodo Jezu bo nɔ do alɔ ɛ lɛɛ susu xodo e sɔn Galilee wa flɛn. Ye le te, bo le nu ke le jijɔ ɔn kpɔn ɖoxlan wɛ. ⁵⁶ Mali Magidalanu lɔ, Mali ke nyi Jaaki kpo Jozɛfu kpo we nɔ ɔ, kpo ovi Zebedee tɔn lɛ we nɔ kpo le ye mɛ. ⁵⁷ Cobɔ ohwe na yi xɔ ɔ, omɛ akwanɔ ɖe wa; omɛ exɔn, Alimateenu wɛ, bɔ e nɔ ylɔ ɛ ɖɔ Jozɛfu; ahwanvi Jezu tɔn wɛ nyi elɔsu gba. ⁵⁸ E wa yi mɔ tokpɔngan Pilatu, bo byɔ ɛ Jezu we cyɔ. Pilatu ka nagbe sɔja lɛɛ, na ye na jo cyɔ lɔ n'i. ⁵⁹ Jozɛfu ka ɖe cyɔ lɔ sɔn akluzu ji, bo lilɛ akwanuvɔ yɔyɔ ɖe do e, ⁶⁰ bo ze e yi ɖi do yɔdo yɔyɔ ke e kun do oso xomɛ d'anyi na elɔsu lɔ mɛ, bo bli okpɛn ɖaxo ɖe do yɔdo lɔ nu, bo sɔn. ⁶¹ Mali Magiɖalanu lɔ kpo Mali ɖyɛ kpo flɔn anyi le flɛn, bo kpan nukɔn tɔn yɔdo lɔ. ⁶² Ayihɔngbe etɔn ke jɛ do gbɔjɛzan gbe Jwifu lɛe tɔn godo ɔ, vɔsanu-xwlemawutɔgan lɛɛ kpo Falizei lɛɛ kpo zɔn kpɔ bo yi tokpɔngan PIlatu de. ⁶³ Bo ɖɔ n'i ɖɔ: "Aklunɔ, mi flin ɖɔ hwenu ke omɛ mɛblɛɖutɔ exɔn kpo le gbɛ ɔ, e ɖɔ azan atɔngɔ ɔ gbe ɔ, emi na fɔn sɔn ku wa gbɛ." ⁶⁴ Exɔn wutu ɔ, na gbe, nɛ sɔja lɛɛ na yi cɔ yɔdo lɔ ganji kaka jɛ azan atɔngɔ lɔ gbe. E ma nyi lexa gɛɛ, ahwanvi etɔn lɛɛ taa wa yi fin cyɔ etɔn bo ze sɔn, bo na ɖɔ na oto lɛɛ ɖɔ: "E ko fɔn ku; lɛlo exɔn ke ye na kpa ɔ na nyla xugan nukɔntɔn lɔ." ⁶⁵ Pilatu ka dɔ na ye ɖɔ: "Sɔja lɛɛ ke, mi bo kplan ye na ye ni yi cɔ yɔdo lɔ le ke mi jlo ɖo." ⁶⁶ Ye ka su yɔdo lɔ ganji, bo ɖo wuntun i, lobo ɖo sɔja lɛɛ flɛn.