¹ Bɔ Jezu le ɖɔ na togun lɔ kpo do ahwanvi etɔn lɛɛ kpo: ² «Osɛnkplɔnmɛtɔgan lɛɛ kpodo Falizinu lɛɛ kpo wɛ na tin osɛn Moyizi tɔn mɛ. ³ Hun, mi ɖo na se tonu na ye bo ɖo na blo onu ke ye ɖɔ na mi lɛ kpo sese, amɔ, mi nɔ kpɔn wa nu ɖi ye ha gɛ. Ye mɔ nɔ blo do onu ke ye ɖɔ ji gɛ. ⁴ Ye nɔ kple agban kpikpɛn ɖaxo lɛɛ bo nɔ bɛ do okɔ ji na mɛɖevo lɛɛ wɛ. Amɔ ye lɛɛ nɔ gbɛ alɔ ɖe wu, e na bo trɛ nyi alɔvi ɖokpo ge can. ⁵ Onu yetɔn wiwa lɛɛ kpo sese nɔ nyi ɖɔ gbɛtɔ lɛɛ ni kpɔn ye. Ɖo lee, hlɔba ovu ke ye hɛn do nukɔnnu kpo do alɔ ye tɔn wu lɛɛ wɛ ye le blo ɖɔ ni bo klo. Ye nɔ lɛ drɛn awu yetɔn lɛɛ we oto. ⁶ Ye nɔ ze tɛnmɛ nukɔntɔn le onuɖuɖu ɖaxo lɛɛ mɛ, bo nɔ ze okpo nukɔntɔn lɛɛ le oɖɛxoxɔ lɛɛ mɛ. ⁷ Ye nɔ nyi wan na ɖɔ ye na nɔ do gbe na ye le otokpletɛn lɛɛ, bɔ mɛ lɛɛ na nɔ ylɔ ye ɖɔ ogan. ⁸ Amɔ mye lɛɛ, mi nɔ kpɔn nɔ ba ɖɔ dandan mɛ e na nɔ ylɔ mi ɖɔ ogan gɛ. Ogan ɖokpo gee wɛ mi ɖo bɔ nɔvi nɔvi wɛ mi nyi. ⁹ Mi nɔ kpɔn nɔ ylɔ mɛti le anzizan ji ɖɔ Otɔ gɛ. Otɔ ɖokpo gee wɛ mi ɖo, mɛ ke le sɛxwe lɔ. ¹⁰ Mi nɔ kpɔn nɔ ba ye na nɔ ylɔ mi ɖɔ ogan gɛɛ. Ɖo Klisi ɖokpo nɔ wɛ nyi ogan. ¹¹ Mɛ ke nyi onu taji le mimɛ ni ciɖi mɛsɛntɔ ha. ¹² Mɛ ke jlo na ze eɖe do oji na mɛ lɛɛ kpo sese, na yi tɛnmɛ godo tɔn. Bɔ mɛ ke ze eɖe do tɛnmɛ godotɔn, e na ze e do oji na mɛ lɛɛ kpo sese. ¹³ Heelu na mi, mye osɛnkplɔnmɛtɔ lɛɛ kpodo Falizinu lɛɛ kpo, ɖo mi nɔ su oxɔluɖuta Mawu tɔn do gbɛtɔ lɛɛ; mi ma le byɔ mɛ mye lɛ lɔsu gɛɛ, bɔ mi lɛ le glɔn omɔ na gbɛtɔ lɛɛ na ye na do byɛ mɛ. ¹⁴ Heelu na mi Falizinu yɛmɛnuwatɔ lɛɛ! ɖo mi nɔ vun asukusi lɛ we xwegbe bo nɔ ɖu oɖɛ susu xo tɔ; exɔn wutu e na da ohwɛ na mi nujɔnu tɔn. ¹⁵ Heelu na mi mye osɛnkplɔnmɛtɔ lɛɛ kpodo Filizinu yɛmɛnuwatɔ lɛɛ! ɖo mi nɔ yi to lɛɛ mɛ gbɔn oxu lɛe ji kpo anyizan lɛe ji kpo bo mɔ nɔ kpego na do hwlɛn alindɔn ɖokpo gan lɔsu do gbɔn osɛn MOyizi tɔn mɛ gɛ. Bɔ hwenu ke e yi do le, mi nɔ ze mɛ lɛɛ ɖi mɛ ke xomɛsin Mawutɔn na kɔn ɖo ɖi azɔn hugan mitɔn. ¹⁶ «Heelu na mi! mi nyi kɔgɔnamɛtɔ nukungbanɔ hwenu ke mi nɔ ɖɔ: "Na mɛɖe xwle do gbɔn sinsɛnxɔmɛ, exɔn ma nyi onu ti gɛɛ. Amɔ na mɛɖe xwle do gbɔn sika sisɛnxɔtɔn lɔ mɛ, e ɖo na blo nu ke e xwle lɔ." ¹⁷ Mi nɔ kpɔn gu bo lɛɛ nyi nukun gbanɔ gɛ! Sika sisɛnxɔ lɔ tɔn wɛ, hun Mawu tɔn wɛ. Hun ɖe tɛ nyi onu taji? Sika lɔ alo sisɛnxɔ lɔ? ¹⁸ Mi nɔ lɛ ɖɔ: "Na mɛɖe xwle agbe, nu exɔn ma nyi nuti gɛɛ. Amɔ na mɛɖe xwle do gbɔn nunina ke le agbalɔ ji mɛ, e ɖo na blo nu ke e xwle lɔ." ¹⁹ Mi gba nukun! Nutɛ wɛ nyi onu taji lɔ? nunina lɔ alo agba ke nɔ ze onunina lɔ ze trɔzun onu dobu? ²⁰ Hun mɛ ke xwle do gbɔn lɔ mɛ, e xwle kpodo onu ke le agba lɔ ji kpo sese kpo. ²¹ Mɛ ke xwle do gbɔn sisɛnxɔ lɔ mɛ, e xwle sisɛnxɔ lɔ kpo do Mawu ke nɔ nɔ sisɛnxɔ lɔ mɛ kpo. ²² Mɛ ke xwle le oji nyikɔ mɛ, e xwle do gbɔn Mawu we fi ke e nɔ flɔn kpodo Mawu ke flɔn anyi le eji lɔ kpo. ²³ «Heelu na mi, mye osɛnkplɔnmɛtɔ kpo Falizinu lɛɛ kpo hwenu ke mi nyi gbɛtɔ awonɔ! Mi nɔ na madoawo atin ɖe lɛɛ tɔn wu mawu. Bɔ onu ke nyi onu le taji le osɛn lɔ mɛ mi nɔ jodo, na do ɖɔ nujijlɔ, onu ɖagbe kpodo ogbeji ninɔ. Co, onu exɔn lɛɛ wɛ mi ɖo na blo, bo ma si lɛ wɔn ɖyɛ lɛ gɛ. ²⁴ Mi nyi omɛkplantɔ nukungbanɔ! Mi nɔ hun osin na do ze omu ɖokpo, amɔ mi nɔ mi osɔ kɛtɛ. ²⁵ Heelu na mi osɛnkplɔnmɛtɔgan kpodo Falizinu lɛɛ kpo, hwenu ke mi nyi gbɛtɔ awonɔ! Mi nɔ klɔ kɔfo kpodo gannu kpo godo. Amɔ xomɛ etɔn, egɔ kpodo nu ke mi cɔn nu do lɛ kpo kpodo onu ke mi yi le mɛ lɛɛ si kpo. ²⁶ Falizinu nukungbanɔ! Klɔ xomɛ na gannu lɔ hwɛ, bɔ godo gannu lɔ lɔsu tɔn na wa we. ²⁷ «Heelu na mi ogan Falizinu lɛ ɖo gbɛtɔ awonɔ lɛɛ kɛɖɛ wɛ mi nyi! Mi ɖi yɔdo ke e sa osɛn wewe do. E ɖi onu ke jɔhun do awutu. Amɔ le xomɛ, e gɔ kpo do mɛkuku lɛɛ we xugloxu kpo kpo do onu ke ko gble lɛ kpo. ²⁸ Lexa ɖokpo lɔ le awutu etɔn le mɛ lɛɛ nukɔn, mi nɔ ɖi mɛ ke na se tonu na Mawu, amɔ le xo lɔ mɛ, mi gɔ kpo do awo kpo onu nyinyla lɛ kpo. ²⁹ «Heelu na mi osɛnkplɔnmɛtɔ kpo do Falizinu lɛɛ kpo ɖo gbɛtɔ awonɔ wɛ mi nyi! Mi nɔ gba yɔdo na oxoyiɖɔtɔ lɛɛ. Mi nɔ ɖo acɔ na yɔdo mɛ ke nɔ tonu na Mawu tɔn. ³⁰ Bɔ mi nɔ ɖɔ: "Na mi do zangbɛ le daagbo mitɔn lɛɛ we hwenu wɛ, mi ma sixu le gbesisɔ mɛ xa ye do hu oxoyiɖɔtɔ Mawu tɔn lɛɛ mɛ gɛ!" ³¹ Bɔ mi le ɖexlɛ mye lɔsu: Mɛ ke hu oxoyiɖɔtɔ lɛ we ovi wɛ mi nyi! ³² Hun mi gbɛnkan de nu! Mi lɛ ɖo nukɔn yiyi le emɛ hu daagbo mitɔn lɛɛ. ³³ Odan! Jakpata kunkan! Mi ma sixu hɔn na oba Mawutɔn gɛ! ³⁴ Wutu wɛ, mi ɖoto: Na sɛ oxoyiɖɔtɔ lɛe ɖoxlan mi, nunywɛtɔ lɛɛ, omɛ lɛɛ bɔ ye na kplɔn nu mi. Mi na hu mɛɖe lɛɛ, bo na kɛ ye do akluzu ji. Mi na ze ganba do xo mɛɖe lɛɛ le oɖɛxoxɔ mitɔn lɛɛ mɛ, bo na nɔ nya ye do gbɔn oto lɛɛ oto lɛɛ mɛ. ³⁵ Bɔ mye wɛ Mawu na ɖo ba na na tonusenitɔ ke mi hu lɛɛ. Ɖe wɛ nyi Abɛli ohwɛjijɔnɔ ke mi hu. Bɔ vivɔnu mi wa hu Zakali, Bakali we ovi. Mi hui le agba lɔ kpo do nɔtɛn mimɛ lɔ kpo cɛncɛn. ³⁶ Un le ɖɔ na mi, nugbo wɛ: Mawu na ɖo oba na omɛ egbedin tɔn lɛɛ ɖo onu exɔn lɛɛ kpo sese nu.» ³⁷ «Jeluzalɛmunu lɛɛ! Jeluzalɛmunu lɛɛ! Mi nɔ hu oxoyiɖɔtɔ lɛɛbo nɔ lɛɛ hu mɛ ke Mawu ze ɖoxlan mi lɛɛ kpo ohwan kpo. E nɔ jlo un ma do kple mi ɖi le ke koklo nɔ nɔnkple ovyɛ lɛɛ ɖo le alɔ etɔn gɔ, amɔ mi ma jlo gɛɛ. ³⁸ Hun, Mawu na jo sisɛnxɔ mitɔn do! ³⁹ Amɔ un le ɖɔ na mi, zanɖe din mi na ba un kpo kaka do jɛ gbe ke gbe na ɖɔ na mi ɖɔ: "Mawu ni do na mɛ ke ja le nyikɔ etɔn mɛ lɔ!"»