¹ Jezu ɖɔ na ahwanvi etɔn lɛɛ ɖɔ: "Mi nɔ kpɔn na ayi mitɔn ni gbado gɛ. Mi ɖi nu na Mawu, bo ɖi nu na nyɛ lɔsu. ² Nɔtɛn susu geɖegeɖe wɛ le Ta ce xwe bɔ un na yiblo tɛnmɛ o ɖ'anyi na mi; enyi onu ma nyi le gɛɛ, un ma le ɖɔ na mi gɛ. ³ Na un ko yi blo nɔtɛn ɖo ɖ'anyi na mi vɔ lo, un na lɛkɔ wa kplan mi, bɔ fi ke un le lɔ ɔ, mye lɔsu na nɔ flɛɛn. ⁴ Mi ko nyɔ omɔ ke kplan mɛ yi fi ke un xwe lɔ." ⁵ Tɔmaa ka ɖɔ: "Aklunɔ, mi ma nyɔ fi ke a xwe lɔ gɛ, naɖe mi ka na nyɔ omɔ lɔ wi ɖo?" ⁶ Jezu ka yi gbe n'i ɖɔ: "Nyɛ wɛ nyi omɔ lɔ, bo nyi xojɔxo lɔ, bo ka lɛ nyi ogbɛ lɔ. Mɛɖe kpekpe ma sigan yi Ta ce de nyɛ mɛ vo gɛ. ⁷ Enyi mi nyɔ un wii, mi na nyɔ Ta ce lɔsu wii, bɛ sɔn odin, mi nywɛ wii, bo mɔ ɛ. ⁸ Filipu ka ɖɔ n'i ɖɔ: "Aklunɔ, xlɛ Otɔ lɔ wu mi; onu ke mi le din lɔ kpokpo xɛn. ⁹ Jezu ka yi gbe n'i ɖɔ: "Filipu, sɔn tɛgbɛ wɛ un ko le okpɔ xa mi, bɔ a ma ka nyɔ un wii kaka jɛ odin gɛ. Etɛ wutu a ka ɖɔ: "Xlɛ Otɔ lɔ wu mi?" ¹⁰ A ma ɖi un le otɔ lɔ mɛ, bɔ Otɔ lɔ le nyɛ lɔsu mɛ gɛ wɛ? Oxo ke un le ɖɔ na mi lɛɛ, e ma nyi ayi ce mɛ wɛ un nɔ kpɔn kpoun, bo nɔ ɖɔ gɛ; amɔ, Otɔ ke le nyɛ mɛ lɔ we onuwiwa wɛ, ¹¹ mi ɖi oxo ke un le ɖɔ na mi, bo ɖɔ: Un le Otɔ lɔ mɛ, bɔ Otɔ lɔ ka le nyɛ lɔsu mɛ lɔ. Enyi mi ma ka jlo bo na ɖi oxo ce gɛɛ, hun mi bo kpɔn ɖo onu ke wa wɛ un le lɛɛ wu vivɔ, bo ɖi nu na un. ¹² Ma ɖɔ xojɔxo na mi: mɛ ke ɖi nu na un, e na jlɛ nu ke un le jlɛ lɛɛ, bo na lɛ jlɛ hugan le; ɖo un ko xwe otɔ lɔ de. ¹³ Bɔ onu ke mi na byɔ le nyikɔ ce mɛ lɔ ɔ, un na na kpokpo sese wu mi, na Otɔ lɔ na sigan xɔ susu gbɔn Ovi lɔ ji. ¹⁴ Enyi mi ylɔ nyikɔ ce, bo byɔ nu ɖekpekpe e, un na blo na mi.» ¹⁵ "Na mi yi wan na un, mi na nyi osɛn ce lɛɛ. ¹⁶ Nyɛ ka na fan kwe na Otɔ lɔ, bɔ e na ɖo gbɔ do namɛtɔ ɖevo ɖoxlan mi, bɔ e na nɔ kpɔ xa mi tɛgbɛ. ¹⁷ Eyɔ wɛ nyi Oyɛ xonugbo tɔn, bɔ mɛ ke nyi ogbɛ lɔ tɔn lɛɛ ma sigan yi i gɛ; ɖo ye ma sigan mɔ ɛ gɛ; ye ma ka sigan nywɛ wi i gɛ. Mye lɛɛ, mi ka ko nywe wii, ɖo e le kpɔ xa mi, bo le mi mɛ." ¹⁸ "Un ma le jo mi do sɔ nyi otɔyɔvi onɔcyɔvi we gbɛ mɛ gɛ; un na le wa mi de. ¹⁹ Zaanɖe diin, mɛ ke nyi ogbɛ lɔ tɔn lɛɛ ma sɔ na mɔ un gɛ; amɔ, mye lɛɛ, mi na mɔ un; ɖo un le gbɛ, bɔ mye lɔsu mi na nɔ gbɛ. ²⁰ Azan exɔn gbe ka wa suu, mi na nywɛ ɖɔ un le Ta ce mɛ, bɔ mi le nyɛ mɛ, bɔ nyɛ le mi mɛ. ²¹ "Mɛ ke hɛn osɛn ce lɛɛ ɖo ayi mɛ, bo nɔ nyi ye lɛɛ, omɛ exɔn wɛ yi wan na un. Ta ce na yi wan na mɛ ke yi wan na un, bɔ nyɛ lɔsu na yi wan n'i, bo na ɖe nyɛɖe xlɛɛ." ²² Jwifu ka kanse wu Jezu ɖɔ: "Aklunɔ, naɖe e nyi ɖo bɔ mye lɛɛ kɛɖɛ jɛn a na ɖe yɔ ɖe xlɛ, bo ma ka na ɖe yɔ ɖe xlɛ gbɛtɔ lɛɛ kpo gɛɛ?"(E ma ka nyi Judaa Isikaliɔti wɛ gă.) ²³ Bɔ Jezu ka yi gbe n'i ɖɔ: "Enyi mɛɖe yi wan na un, e na blo oxo ce lɛɛ ɖ'e ji, bɔ Ta ce na yi wan n'i, bɔ mi na wa e de, bo na nɔ kpɔ xa ɛ. ²⁴ Mɛ ke ma ka yi wan na un gɛɛ, e mɔ nɔ blo oxo ce lɛɛ ɖ'e ji gɛ. Nyɛ lɔsu de mɛ oxo ke un le ɖɔ na mi lɛɛ ka nɔ sɔn gɛ, Ta ce ke ɖo un ɖoxlan lɔ de wɛ oxo exɔn lɛɛ nɔ sɔn." ²⁵ "Un ɖɔ oxo exɔn lɛe na mi, hwe ke nu un kpo le kpɔ xa mi lɔ. ²⁶ Amɔ, mɛ ke na d'alɔ un lɔ ɔ, Oyɛ ɖeɖovo ke Ta ce na ɖoxlan mi le nyikɔ ce mɛ lɔ wɛ; e na kplɔn nu lɛɛ kpo wu mi, bo na flin nu ke un ɖɔ na mi lɛɛ kpo wu mi." ²⁷ «Fifa wɛ un jo do na mi; fifa ce wɛ un na mi. Un ma na mi ɖi le ke ogbɛ lɔ nɔ na mɛ ɖo ha gɛ; ado ni nɔkpɔn hu mi gɛ; mi nɔkpɔn ɖi bu gɛ. ²⁸ Mi se bɔ un ɖɔ na mi ɖɔ: "Un le sɔn; un ka na lɛkɔ wa mi de." Enyi ɖɔ mi yi wan na un wɛ ɛ, xomɛ wɛ na ko hun un, ɖo Otɔ de ke un xwe lɔ wutu, ɖo Otɔ lɔ hugan nyɛ. ²⁹ Un ko ɖɔ onu exɔn lɛɛ na mi odin, hwɛkpo bɔ ye na wa jɔ, na ye wa jɔ, mi na ɖi nu. ³⁰ Un ma sɔ na ɖɔ oxo susu xa mi gɛ, ɖo axɔlu ogbɛ ekɔ tɔn lɔ ko ja; e ma ɖo acɛ ti ɖo ji e gɛ. ³¹ Amɔ, na gbɛtɔ lɛɛ na do nywɛ ɖɔ un yi wan na Otɔ lɔ ɔ, un na wa nu ɖi le ke Otɔ lɔ zɔn un ɖo ha; mi ci te na mi na lɛ le fi.»