( ¹ - ² ) Nyɛn, Pɔlu, apotru, kpodo nɔvi yisenɔ sunu kpodo yɔnu ke le kpɔ xa un, un le wlan nu ekɔ na mi, agun ke le Galati. E ma nyi gbetɔ lɛ wɛ ze un apotru gɛ. Un ma nyi do gbɔn gbetɔ lɛ we agblamɛ gɛ, amɔ do gbɔn Jezu Klisi kpodo Mawu Otɔ lɔ ke fɔn ɛn sɔn ku lɔ kpo ³ Otɔ mitɔn kpodo Aklunɔ Jezu klisi kpo ni do na mi bo na mi fifa. ⁴ Aklunɔ Jezu Klisi ze ogbɛ etɔn ze jo do na mi hwɛnlɛngan sɔn ohwɛ mitɔn lɛ si. E hwɛnlɛn mi sɔn ayihɔn yiylan kɔ si ɖi le ke Mawu Otɔ mitɔn ba ɖo. ⁵ Mi ni ze gigo na Mawu mitɔn tɛ gbɛ! Ami! ⁶ Mawu ylɔ mi vɔnu do gbɔn Klisi mɛ, bɔ e nɔ kpaca un bɔ mi nɔ do godo wi ble un bo nɔ do yi Wɛn Ɖagbe ɖevo de. ⁷ E ma do nyi ɖɔ Wɛn Ɖagbe ɖevo do le gɛ, gbeɖe! Nu ɖejan wa tɔ lɛ kpo un wɛ le wa nu ɖejanle mi de bo jlo na dyɔ Wɛn Ɖagbe Klisi tɔn lɔ. ⁸ Mi ko la Wɛn Ɖagbe lɔ na mi. Na mɛ ɖevo alo mye lɛ lɔsu kabi wɛn zangun Mawu tɔn ɖe la Wɛn Ɖagbe ɖevo ɖe na mi, Mawu ni do nu wi. ⁹ Mi ko ɖɔ na mi, bɔ un le le ɖɔ na mi le odin: Na mɛdɛ lɛ la Wɛn Ɖagbe ɖevo ɖe na mi bɔ e gbɔn vo na ke mi se, Mawu ni do nu wi. ¹⁰ Un ba na yɔ na gbɛtɔ lɛ wɛ alo Mawu? Na un ba bo na yɔ na gbɛtɔ lɛ, un ma sɔ nyi azɔn wa na Klisi tɔ ba gɛ. ¹¹ Nɔvi yisenɔ sunu yɔnu, un le ɖɔ na mi ɖɔ Wɛn Ɖagbe ke un la ma sɔn gbɛtɔ lɛ de gɛ. ¹² Un ma yi alo un ma kplɔn sɔn gbɛtɔ lɛ de gɛ, Jezu Klisi wɛ na un bɔ un yɔ ɛn. ¹³ Mi se mɛ kunkun ce ɖa nyi hwenu ke un le xodo sisɛn Juwifu lɛ tɔn. Mi yɔ le ke un nɔ do vivɛ sise na agun Mawu tɔn kpodo danu kpo ɖo bo nɔ ba na lɛ hɛn gba. ¹⁴ Hwe exɔn nu, un do nukɔn yiyi le sisɛn JUwifu lɛ tɔn mɛ xu gan mɛ susu Juwifunu ke kpo nyɛ kpo ɖo xwe lokpo lɔ lɛ. Un xu gan ye hwenu ke un lɛ jɛ wun do hwɛn domɛnu daagbo mitɔn lɛ tɔn ji kpodo hɔnhlɔn kpo. ¹⁵ Amɔ Mawu ko cyan sɔn hwenu ke un le adɔmɛ na nɛ ce bɔ, le ɖagbe etɔn mɛ E ylɔ un. ¹⁶ Gbe lokpo, E jlo bo xlɛ ovi etɔn un na ma do la na mɛ ke ma nyi Juwifu gɛ lɛ. Co un ma byɔ nu kplɔ mɛ wu mɛti gɛ. ¹⁷ Un ma yi Jeluzalɛlu do yi kpe me ke nyi apotru je nu kɔn na un lɛ gɛ. Un sɔ mɔ azɔn lokpo bo yi Arabu, bo lɛ kɔ wa Damasi. ¹⁸ Xwe atɔn godo, un yi Jeluzalɛmu bo do yi yɔ Sefasi wi, bɔ un blo azan fɔtɔn le e de. ¹⁹ Un ma mɔ apotru dyɛ lɛ gɛ, Jaki Jezu nɔvi ɛ lɔ kpo nɔ wɛ un mɔ. ²⁰ Nu ke un le wlan na mi, un le dɔ le Mawu nu kɔn: E ma nyi awo gɛ. ²¹ Exɔn godo un yi oto Siri kpodo Silisi tɔn kpo mɛ. ²² Kple kple yisenɔ ke le Judee lɛ tɔn ma mɔ un gbeɖe gɛ. ²³ Nu ke ye se kpo wun yi ke: «Ɖa nyi dahwe kɔ nɔ do vivɛ sise na mi: Odin e wa le la Wɛn Ɖagbe nu ɖiɖi tɔn ke e jlo na hɛn gble da nyi lɔ.» ²⁴ Bɔ yisenɔ lɛ nɔ ze gigo na Mawu ɖo nyɛ wutu.