¹ Nyɛ Pɔlu, un nyi apotru Jezu Klisi tɔn, ɖo Mawu jlo. Un nyi mɛke na ɖɔ ogbɛ ke Jezu Klisi do akpagbe etɔn bo na na mi. ² Timɔtee, ovi ce wannyinanɔ, yɔ wɛ un le wlan nu na. Mawu, Otɔ lɔ kpodo Jezu Klisi Aklunɔ mitɔn ni do na we. Ye ni ɖe wanyinyi yetɔn xlɛ we bo na we fifa. ³ Le zanmɛ kpodo okle kpo, na un le xo ɖɛ, un nɔ flin we jɛnwɛ. Bɔ un nɔ lɛ do okpɛ na Mawu kpodo ayixa mimɛ kpo, ɖi le ke daagbo ce lɛ bolo ɖo. ⁴ Na do le flin avi towe lɛ, e jlo wun tawun bɔ na do mɔ we bo na do gɔ kpo awajijɛ kpo. ⁵ Un flin nuɖiɖi xojɔxo tɔn ke le yɔ mɛ. E ciɖi mama towe Loyiki kpodo nɛn towe Enisi kpo tɔn ha, bɔ nuɖiɖi xɔn lɔ le yɔ lɔsu mɛ, un kan de ji. ⁶ yi wɛ zɔn un le flin nukɔ we: Hɛn nu nina Mawu tɔn do gbɛ ganji, nu nina ke a yi hwenu ke un ɖo alɔ ta na we. ⁷ Na do ɖɔ, Yɛ Ɖeɖovo ke Mawu na mi mɔ nɔ zɔn bɔ mi nɔ ci kuu gɛ. Na do ɖɔ, Yɛ Ɖeɖovo xɔn gɔ mi kpodo hɔnhlɔn kpo, wannyinyi kpo kpodo hwihwɛ mɛɖe kpo. ⁸ Wunya ni nɔkpɔn nɔ wa we do kunnu ɖiɖe do Mawu Aklunɔ mitɔn go gɛ, bɔ wunya ni nɔkpɔn wa we do nyɛ ke le ganmɛ do Aklunɔ go gɛ. Se vivɛ kpo nyɛ kpo na Wɛn Ɖagbe kpodo hɔnhlɔn Mawu tɔn kpo. ⁹ Mawu hwlɛn mi gan bo lɛ ylɔ mi naa mi na donyi etɔn. E ma blo do walɔ mitɔn lɛ wutu gɛ, ɖo E ze gbeta we zɔn. Nu nina vɔnu wɛ e nyi bɔ E blo na mi le Jezu Klisi mɛ, hwɛkpo bɔ ogbɛ lɔ do wa jɔ. ¹⁰ Odin nu nina xɔn wa zun hihɔn hwenu ke hwɛnlɛngantɔ, Jesu Klisi wa. E wɛ ɖe acɛ etɔn sɔn oku ji bɔ, do gbɔn Wɛn Ɖagbe mɛ, E na bɔ ye nyɔ ogbɛ ke mɔ nɔ ku gɛ lɔ wi. ¹¹ Mawu na un bɔ na do la Wɛn Ɖagbe xɔn ɖi apotru, bo na do le klɔn mɛ. ¹² Yi wutu wɛ un le ji ya odin, amɔ e ma nyi wunya na un gɛ. Na do ɖɔ, un nyɔ mɛ ke mɛ wɛ un ze jiɖide ce ɖo. Bɔ un ɖo kandeji tawun, Mawu ɖo hɔnhlɔn do le bo na cɔn alɔ do nuke E ze na un ka do yi azan godo tɔn gbe. ¹³ Ze ɖi kpɔndewu oxo ɖagbe ke a yi le dye lɛ. Ayi kpodo nu ɖiɖi kpo, kpodo wanyinyi ke Jezu Klisi na mi lɔ kpo. ¹⁴ Dɔkun ɖaxo wɛ ye ze do asi na we na we. Hɛn kpodo alɔgɔ Yɛ Ɖeɖovo lɔ tɔn ke le mi mɛ kpo. ¹⁵ A nywɛ ganji, mɛ ke le Azi lɛ kpokpo jo un do. A nɔ mɔ Figɛli kpo Ɛmogɛni kpo . ¹⁶ Na Mawu ni ɖe nyinyɔ etɔn xlɛ hwɛndo Onezifɔ tɔn. Na do ɖɔ, e nɔ ya wu do gan namɛ na un, bɔ wunya mɔ nɔ wɛ do nyɛ go gɛ, nyɛ ke le gankpa mɛ. ¹⁷ Na do ɖɔ, hwenu ke e do wa Rlɔwu, e ba un gbɔn filɛ bisese bo mɔ un. ¹⁸ Na aklunɔ Jezu Klisi ni na ɛn le hwɛ da zangbe xomɛ nyinyɔ Mawu tɔn! Ɛɛ, a nywɛ ganji mɛ sɛntɔ ke e na un le Efɛzi lɛ.