¹ Nu titan ke le zɔn mi lɔ wɛ nyi ɖɔ mi ni nɔ savo na Mawu; mi nɔ xo ɖɛ; mi nɔ byɔ nu Mawu, mi nɔ do kpɛ n'i; mi na nɔ blo nu exɔn lɛ, ɖo gbɛ lɛ kpo we tamɛ. ² Mi xo ɖɛ na axɔlu lɛ kpo mɛ ke we alɔ mɛ acɛkpikpa le lɛ kpo, bo na mi na kpego bo na nɔ vivo kpo fifa mɛ, ɖo sisi ganji ɖona Mawu kpo ninɔmɛ ɖagbe zizan kpo mɛ. ³ Ɖo nu ke nyi nu ɖagbe, bo le Mawu mitɔn hwlɛngantɔ we nukun mɛ lɔ yi xɛn. ⁴ Eyɔ wɛ jlo ɖɔ gbɛtɔ lɛ kpo ni mɔ hwlɛngan, bo na nyɔ nu xonugbo lɔ kpo wi ganji. ⁵ Ɖo Mawu ɖokpo gee wɛ le; ɖɛmɛnu ɖokpo wɛ le, Mawu kpo gbɛtɔ lɛ we tɛntin . Ɖɛmɛnu lɔ wɛ nyi Klisi Jezu ke nyi gbɛlɔ tɔ. ⁶ Klisi Jezu xɔn lɔ wɛ ze eɖee jo, bo do xɔ gbɛ na mɛ lɛ kpo. Ke hwenu ke Mawu ɖɔ wa su lɔ, le ke Mawu ɖe xlɛ ɖɔ e jlo ɖɔ gbɛtɔ lɛ kpo na mɔ hwlɛngan ɖo lɔ yi xɛn. ⁷ Nyɛ ma le dawo gɛ; xonugbo wɛ un le ɖɔ bo ɖɔ exɔn wutu wɛ Mawu ze mi wɛnsagun, bo ze mi mɛ ɖoxlan, bo zɔn mi ɖɔ ma kplɔn nu ke kan nuɖiɖi kpo xonugbo lɔ mɛ ke, ma nyi Juwifu lɛ gɛ. ⁸ Un jlo ɖɔ mɛ sunnu lɛ le filɛ kpo lɔ, ye ni nɔ xo ɖɛ, ye ni nɔ ze alɔ do ji , bo nɔ xo ɖɛ kpo ayixa mimɛ; ye ni kpɔn nɔ sin xomɛ gɛ, ye ni kpɔn nɔ ɖɔ jlɛ gɛ. ⁹ Un le ba ɖɔ nyɔnnu lɛ ye ni nɔ sɔnu le ke jɛ xa ɖo lɔ, ɖo yɛyi wɛ, le gbesisɔ mɛ. Nu ke nyɔnnu lɛ na ze ba acɔ na lɔ ma ja nyi ɖa gɛdɛ gɛdɛ biblo gɛ; sikanu dido, jɛ dido alo avɔ xɔ akwa gbigba gɛ; ¹⁰ vɔlɔ, nu ke ye na ze ba acɔ na lɔ wɛ nyi nu ɖagbe biblo, ɖi le ke e jɛ xa ɖɔ nyɔnnu ke nɔ si Mawu lɔ ɖo na blo lɔ ha. ¹¹ Nyɔnnu lɛ ni ɖo ɖa, bo ye nu ke ye le kplɔn ye lɛ, bo nɔ ze yeɖe hwe kpokpo. ¹² Nyɛ ma na gbe nyɔnnu ɖe ɖɔ ni kplɔn nu mɛ le agunmɛ gɛ alo ni kpa cɛ na sunnu ɖe gɛ. Ɖa wɛ ye na ɖo. ¹³ Ɖo Adamu wɛ Mawu da titan, hwɛ kpo bo wa blo Ɛva. ¹⁴ E ma nyi Adamu wɛ Awovi blɛ gɛ; Ɛva wɛ e blɛ, bo tafɔ osɛn ke Mawu blo ji. ¹⁵ E le lexa co, nu ke nyɔnnu ke ɖinu na Mawu, bo ɖo wan nyinyi na nɔzo, bo nyi mɛɖeɖovo, bo nɔ blo nu ganji lɔ, Mawu na hwlɛn gan le vijiji tɔn hwenu.