¹ Nyɛ Pɔlu apotru Jezu Klisi tɔn, ɖo Mawu hwɛnlɛngantɔ mitɔn kpo Klisi Jezu ke nyi jiɖiɖe mitɔn wɛ na un gbe. ² Timɔte, yɔ wɛ un le wlan nu na, yɔ ke nyi vi vivɛ na un le nuɖiɖi mɛ. Na Mawu ke nyi mye tɔ kpodo Klisi Jezu Aklunɔ mitɔn ni do na we, ye ni ɖe wan nyinyi yetɔn xlɛ we bo na we fifa. ³ Ɖi le ke un ɖɔ na we ɖo hwenu ke un le sɔn nyi Masedwani, nɔ Efɛzi. Le dɔn yisenɔ ɖe lɛ le kplɔn nu gbɔ mɛ lɛ. gbɛ na ye. ⁴ Na ye ni lɛkɔ sɔn otan lɛlo tɔn xɔn lɛ mɛ kpodo dagbo mitɔn ke ko ku xɔn lɛ we nyikɔ xixa mɛ! Nu exɔn lɛ wɛ nɔ hɛn xo kanse ɖejan ɖe lɛ do wa ke ma trɛ le tito Mawu tɔn lɛ mɛ. ⁵ NU ke un le ɖɔ na we le fikɔ wɛ nyi ɖɔ wan nyinyi ke sɔn ayixa mimɛ mɛ, linlin ɖagbe kpodo nuɖiɖi nujɔnu tɔn kpo. ⁶ Mɛɖe lɛ lɛkɔ sɔn omɔ lɔ ji, bɔ ye bu mɔ le nu wlaɖɔ ke mɔ nɔ na nuti gɛ lɛ mɛ. ⁷ Na do ɖɔ xo do osɛn Moyizi t ɔn wu, ye ba bo na nɔ nyi gan, amɔ ye ma mɔ do na nu ke ye le ɖɔ gɛ. Ye ma nyɔ do na nu ke ye le ɖɔ kpodo hɔnhlɔn geɖe geɖe xɔn kpo gɛ. ⁸ Ɛɛ, mye mi nywɛ, osɛn Moyizi tɔn nyɔ, na ye yi zan ɖi le ke e jɛ ɖo. ⁹ Mi ni nyɔ nu lokpo wi: Osɛn lɔ ye ma wlan na mɛ ke le gbeji na Mawu lɛ gɛ. Ye wlan na mɛ ke gbɛ tonu sise na Mawu lɛ, mɛ ke nɔ fɔn gu lɛ, hunylantɔ lɛ kpo do hwɛ hutɔ lɛ kpo wɛ ye wlan na. Osɛn lɔ nyi mɛ ke mɔ nɔ si Mawu kpo onu Mawu tɔn lɛ kpo gɛ, mɛ ke nɔ hu ye tɔ alo ye nɔ lɛ, alo mɛhutɔ lɛ. ¹⁰ Osɛn lɔ, mɛ ke nɔ zan gbɛ ɖejan, mɛ ke nɔ ɖo xo xa vikpɛvu, kpodo mɛ ke nɔ xɔ kannumɔnɔ lɛ kpo tɔn wɛ e nyi. Osɛn lɔ e lɛ vɔ nyi awoɖotɔ lɛ kpodo mɛ ke nɔ da kpa awonɔ tɔn lɛ kpo tɔn wɛ e nyi. Na do ɖɔ, osɛn lɔ, e lɛ nyi mɛ ke nɔ wa nu bo nɔ sɔta nu kplɔnmɛ jijlɔ lɛ. ¹¹ Nu kplɔn mɛ xɔn e le Wɛn Ɖagbe ke nɔ zɔn bɔ ye nɔ nyɔ Mawu ke gɔ kpo gigo kpo lɔ wi. ¹² Un do kpɛ na Klisi Jezu Aklunɔ mitɔn. E mɔ ɖɔ un jɛxa, bo do ze un na azɔn etɔn, bɔ e le na un hɔnhlɔn ke na do kpego bo na blo. ¹³ Co, le ɖ'anyi, un nɔ zun i, un sa ya n'i, un nyla hun do e. Amɔ Mawu ku lɛblanu ce. Un nɔ le blo ma do nyɔ nu ke un le blo lɛ. Na do ɖɔ, un ma ɖi nu na Klisi gɛ. ¹⁴ Amɔ nyinyɔ Aklunɔ mitɔn tɔn do wa dye klo bo dagba. UN nyi nuɖiɖi, bo lɛ nyi wan nyinyi ke sɔn Klisi Jezu de. ¹⁵ Xojɔxo lokpo ke bo le taji bɔ mi mɛ kpose ɖo na yi: Klisi Jezu wa anyihɔn lɔ mɛ na do hwlɛn hwɛhutɔ lɛ. Bɔ nyɛ wɛ nyi hwɛhutɔ titan lɔ. ¹⁶ Amɔ Mawu ku lɛblanu ce. Jezu Klisi xlɛ un sulu yiyi etɔn do wa dye, mɛ nukɔn le hwɛhutɔ lɛ mɛ. Kpɔndewu lokpo wɛ e nyi na mɛ ke na wa ɖinu ni lɛ, bo na yi gbɛ kpodo Mawu kpo kaka do yi. ¹⁷ Mɛ lɛ kposese ni do yɛyi tamɛ na Mawu bo ze gigo n'i na hwe lɛ kponu. Axɔlu ke ma ɖo vivɔnu gɛ wɛ e nyi, ke mɔ nɔ ku gbeɖe, ke mɛɖe mɔ nɔ mɔ, Mawu ke nyi ɖokpo ge! Ami. ¹⁸ Timɔte, ovi ce, nukplɔmɛ ke un le ze na we lɔ ke. E sɔgbe xa oxo ke xoyiɖɔtɔ lɛ ɖɔ do awuwe ɖ'anyi lɔ. Oxo xɔn lɛ na na we akɔnkpikpan, bɔ a na do kpego bo na fun ahwan ɖagbe lɔ ¹⁹ kpodo nuɖiɖi kpo, kpodo ayixa alo linlin ɖagbe kpo. Mɛɖe lɛ gbɛ ayixa yetɔn ɖoto, bɔ do le ye hɛn nuɖiɖi yetɔn bu. ²⁰ Le mɛ xɔn le mɛ, a na mɔ Imene kpo alɛsandri kpo. Un ze ye ze jo na awovi. Hwe exɔn nu ye na mɔ nukunnu jɛ e mɛ ɖɔ ye mɔ nɔ zun Mawu gɛ.