¹ Le enu hunnɔwo godu ɔ yuɖatɔwo sɛnsɛn xwe ɖeka ɖuɖu va ɖo yi yesu yi zeluzalɛmu jugan mɛ. ² Le zeluzalɛmu lɔ ɔ wo ku eshidu gangan ɖeka ɖɛ do axa nɔ agbe ci yi wo yɔnɔ mɔ lɛngbɔwo gbo yi amowo va le nɔ eshi le mɛ wo yɔnɔ eshidu lɔ do eblegbe mɛ mɔ bɛtizata wo cu agba amɛtɔn trɔɔdo. ³ Edɔnɔ sugbɔ mlɔ nɔ anyi do agba lɔwo mɛ wowo domɛtɔ ɖewo nyi ŋkuvitɔntɔnnɔwo ebutɔwo koɖo ekplɛxotɔwo wo le enɔtɔxu lɔ yi sɔ nɔnɔɔ ete nɔ eshi lɔ a hwan. ⁴ Ɖo ɔ tohonɔ cigɔlɔtɔ ɖeka ɖiyɔ va eshidu lɔ mɛ hweɖonu yi va blunɔ eshi lɔ e yi nɔ edɔnɔ ɖe ɖo eshi ci yi wo blu lɔ mɛ doŋɔɔ edɔ lɔ ninɔ nii edɔ ɖe kpokpoi ci yi a nyi ɔ e ɖo a mi. ⁵ E yi edɔnɔ ɖeka le enɔtɔxu e le edɔ so exwe egban honyi (38ans) ke. ⁶ Ci yi yesu kpɔɛ le anyimlɔxwe yi gbe nya mɔ dɔnɔ yi nyi yi yi ɖe gbe shite ɔ e biɔɛ se mɔ e ji mɔ edɔ lɔ ɖe mi nɔ eye a. ⁷ Edɔnɔ lɔ ɖonu nii mɔ axwetɔ amɛɖe le ŋ shi yi a kɔ ŋ yi zin do ashidu lɔ mɛ le gacimɛ yi wo va hwanɔ eshi ba e yi nɔ ŋ teteɔ kpɔ mɔ na ɖo mɛ ɔ amɛbu va yi ɖonɔ mɛ doŋkɔ nɔ ŋ. ⁸ Yesu nu nii mɔ shite sɔ eba tɔ yi a zɔn zɔnlin. ⁹ Zeɖeka vɔ ɔ edɔ lɔ mi nɔ ŋsu lɔ yi esɔ eyi ba yi tɔ zɔnlin zɔnzɔn le gbɔngbɔn gbe. ¹⁰ Eyi yuɖatɔwo gawo nu nii mɔ gbɔngbɔgbe yɔ de ɖe egbe yi a dro eba tɔ o le azan cɛ ji go. ¹¹ Ŋsu lɔ ɖonu nɔ wo mɔ amɛ ci yi da edɔ nɔ ŋ yi nu nɔ ŋ mɔ sɔ eba tɔ o yi a zɔn zɔnlin. ¹² Gahunnɔmɛ yi yuɖatɔwo ga lɔwo va biɔɛ se le mɔ mɛ e yi nyi amɛ ci yi nu nɔ wu mɔ sɔ eba tɔo yi a zɔn zɔnlin ɔ. ¹³ Vɔ ɔ ŋsu ci edɔ mi nɔ lɔ ɖe jeshi amɛ ci yi da edɔ nii ɖɛ go do ɔ yesu bu do ahwa ci yi va cɔn wo le enɔtɔxu lɔ mɛ. ¹⁴ Le enu hunnɔwo goduɔ yesu va do ego ŋsu lɔ le Mawuxwe mɛ yi nu nii mɔ eyi ɔ edɔ mi nɔ wu ŋgbe gbe wa enuvɔin ke nɔ enu ci yi nyana sɔwu hunnɔ a va jɔ wu ji o. ¹⁵ Ŋsu lɔ vayi nu nɔ yuɖatɔwo ga lɔwo mɔ yesu yi da edɔ nɔ eye. ¹⁶ Eyi yuɖatɔwo tɔ yesu jiji yi a wa enu koɖi nɔ ci yi e da edɔ nɔ ŋsu lɔ le gbɔngbɔngbe taɖo. ¹⁷ Vɔ ɔ yesu nu nɔ wo mɔ edanyɛ gbe kpɔtɔ le edɔ waa tɛgbɛɛ yi enyɛ can ŋ le edɔ ji. ¹⁸ Enyɔ hunnɔ ci yi yesu nu dɔ mu yuɖatɔwo ga lɔ wo gbe va tɔ jiji do ji mɔ yowo a wii do wo nunuɔ mɔ yi ɖe nyi gbɔngbɔngbe lɔ ɖekɛ kɔ yi yesu gbe manyi go vɔ ɔ yi gbe nunuɔ mɔ Mawu nyi yedaye teŋ eyi yi sɔ yiɖeki ɖo Mawu mɔ ji. ¹⁹ Eyi yesu xɔ nuxu yi nu nɔ wo mɔ le nyɔnɔnui mɛ ɔ ŋ nunuɔ nɔ mi mɔ evi lɔ da sɛn eŋ wa enuɖe le yiɖeki shinu go yi kpɔnɔ enu ci yi ada wanɔ yi gbe wanɔ e yi han enu ciwo kpu yi ada wanɔ ɔ evi lɔ can gbe wanɔ wo hɛnnɛ. ²⁰ Ɖo ɔ Ada lɔn evi lɔ yi donɔ asɛ enu ciwo pleŋ yi yiŋtɔ wanɔ nii a gbe doasɛ enu gangan buwo nii sɔwu ecɛwo yi a wa yi mi a kpɔ yi kpaca mi. ²¹ Ɖo shigbe lehan yi Ada fɔnnɔ amɛkukuwo yi na nɔ agbe wo do nɛnɛ ɔ evi lɔ can na nɔ agbe amɛ ciwo droi hɛnnɛ. ²² Ada ɖe ɖonɔ kojo amɛ go vɔɔ e sɔ kojo ɖoɖo cɛ lɔ pleŋ jɔnɔ evi lɔ nɔ a ɖo kojo amowo. ²³ Eyi amɛshamɛ a do bubu evi lɔ nu shigbe lehan yi klo do bubu ada nu do nɛnɛ amɛ ci yi ɖe dodoɔ evi lɔ nuɔ ɖo dodoɔ bubu Ada ci yi dɔɛ ɖaɖa nu go. ²⁴ Yesu gbe yi ji nɔ wo le nyɔnɔnui mɛ ɔ ŋ nunuɔ nɔ mi mɔ amɛ ci yi seseɛ anyi nyɔwo yi xɔ Mawu ci yi dɔ ɖaɖa ji se ɔ a kpɔ agbemavɔ wo ɖa gbe o koji yi go vɔ ɔ e to sɔso ekumɛ yi agbemavɔ. ²⁵ Le nyɔnɔnui mɛ ɔ ŋ nunuɔ nɔ mi mɔ hwenu li gbɔgbɔ e yi ke ɖo yi amɛkukuwo a se Mawu eviɛ lɔ gbe. eyi amɛ ciwo yi a se egbe nii a kpɔ agbe. ²⁶ Ɖo lehan yi soxu nɔ agbe ɔ nɛ nɛ yi e gbe na acɛ evi lɔ mɔ e yɛ can a nyi agbe jɔxu nɛ. ²⁷ E sɔ kojoɖoɖo tɔ jo nɔ evi lɔ mɔ e yi yi a ɖo kojo koɖo agbetɔwo do ɔ e yi nyi agbetɔvi lɔ. ²⁸ Enyɔ cɛwo ŋgbe kpaca mi go do hwenu wi li gbɔgbɔ yi amɛ ciwo yi ku yi wo ɖyi ɔ a va se agbetɔvi lɔ gbe yi a to so yɔdumɛ. ²⁹ Eyi Mawu a fɔn amɛ ciwo yi wa enunyui yi a va agbemavɔ wo vɔ a fɔn amɛ ciwo yi wa enuvɔin nɔ wo wo a ɖo kojo koɖo wo yi a so ekuhwɛ nɔ wo. ³⁰ Eyi yesu gbe trɔ yi nu nɔ wo mɔ ŋ ɖa sɛn eŋ wa enuɖe le nyɛɖeki dromɛ o ŋ ɖonɔ kojo do lehan yi Mawu drii nɔ ŋ mɔ nyɛ ɖe ɖoi do nɛ ji yi anyi kojoɖoɖo nɔnɔ ɖo ŋ ɖe ji mɔ a wa enu ci yi amɛ ci yi dɔ ŋ ɖaɖa dro. ³¹ Nɔ nyɛŋtɔgbe va ɖeɖe kunnu nɔ nyɛɖekiɔ kpɔ wo ɖa lɔn a xɔ anyi kunnuɖeɖe. ³² Vɔ ɔ amɛbu yi ɖeɖeɛ kunnu nɔ ŋ yi ŋ va nya mɔ enyɔ ci yi e nunuɔ so ŋ nu lɔ nyi nyɔnɔnui. ³³ Mi dɔ amowo ɖaɖa zan gbɔ yi e ɖe kunnu so nyɔnɔnui lɔ nu nɔ mi. ³⁴ Vɔ enyɛ ɔ ɖe wudo ŋ mɔ agbetɔ a ɖe kunnu nu ŋ go vɔ ɔ nunuɔ nɛnɛ kpo nɔ ma sɛn ŋ hwlɛn mi gan. ³⁵ Sasa ɔ zan le shigbe kaɖgban ci yi wo tɔ yi a nɛn nan nɛnɛ eyi le majijiɖe mɛ ɔ mi lɔn yi kpɔ jijɔ le e yi klɛnklɛn lɔ nu. ³⁶ Vɔ enyɛ ɔ ŋ ɖo konnuɖenɔamɛ ɖeka ci yi wu egan zan tɔ e yi nyi kpɔ mɔ woko yi edɔ ciwo yi Ada dɔ ŋ yi ŋ waka ɖeɖeɛ kunnu nɔ ŋ yi dodoɔ asɛ mɔ Ada yi dɔ ŋ ɖaɖa. ³⁷ Ada ci yi dɔ ɖaɖa can ɖeɖeɛ kunu nɔ ŋ vɔ ɔ mi ɖe se e yi gbemɛ kpɔ yi mi ɖe kpɔ e yi ŋmɛ kpɔ gbeɖe yo. ³⁸ Mi ɖe xɔxɔ ɔ e yi nyɔwo ɖɛ do miwo jiwo jiwo mɛ go ɖo mi ɖe xɔ amɛ ci yi e dɔ ɖaɖa ji se o. ³⁹ Mi gbejenɔ Mawu nyɔ wemawo mɛ tri tritri. dɛo ɔ mi bunɔ mɔ wowo mɛ yi a kpɔ agbemavɔ le Mawu nyɔ wema hunnɔ lɔwo yi ɖeɖeɛ kunnu nɔ ŋ nɛ. ⁴⁰ Ganŋkegan ɔ mi ɖe ji a va ŋ gbɔ nɔ ma na agbe adoduitɔ lɔ mi go. ⁴¹ Ŋ ɖe ji mɔ agbetɔwo ɖe kankanfu ŋ go. ⁴² Vɔ ɔ ŋ jeshi mi ɖɛ nyuiɖe ŋ nya mɔ mi ɖe ɖo lɔnlɔn nɔ Mawu o. ⁴³ Ŋ va le edanyɛ nyikɔ mɛ yi mi gbe mɔ yowo ɖa xɔ ŋ go vɔ nɔ amɛbuɖe. ⁴⁴ Ji jɔ e nyinɔ nɔ mi mɔ mi a kankanfu miwonɔnɔwo vɔ ɔ kpɔ mi ɖe ji nɔ mɔ yowo a wa enu nɔ Mawu kuɖeta lɔ a kanfu mi go le yi mi a sɛn eŋ a xɔ ŋ ji se do. ⁴⁵ Mi ŋgbe bubudo mɔ enyɛ na va do ehwɛ nɔ mi le edanyɛ gbɔ o mɔ yizi ci yi ji yi mi sɔ miwo mɔkpɔkpɔ dado yi a va do ehwɛ nɔ mi. ⁴⁶ Nɔ e nyi kpɔ mɔ nɔ mɔyizi ji se nyaoɔ mi a xɔ enyɛ can ji hɛnnɛ do enyɛ nu yi mɔyizi ŋhwlɛ enu so do e nyi wema mɛ. ⁴⁷ Vɔ ɔ ci yi mi ɖe xɔ enu ci yi e ŋwlɛ lɔ ji se ɔ lehan yi mi a sɛn eŋ a xɔ anyi nyɔwo ji se do.