¹ Ci yi Blu koɖo Banabasi vayi ɖo Ikonowɔmu jugan mɛ ɔ, wo yi Yuɖatɔwo gbedoxɔmɛ hɛnnɛ, yi xo nuxu le enɔtɔxu kaka Yudatɔ can, amɛ manyi Yuɖatɔ can, wowo sugbo trɔ xɔsetɔ. ² Vɔ ɔ, Yuɖatɔ ɖekawo gbe mɔ yowo ɖ'a xɔ Pɔlu koɖo Banabasi nyɔ ji se, Trɔ trɔ ɔ susu nɔglɛkitɔwo amɛ manyi Yuɖatɔwo yi wo tɔ enyɔ vɔin wo drɔdrɔ do nɔvi xɔsetɔ lɔwonu. ³ E le nɛnɛ ganɔ Pɔlu koɖo Banabasi nɔ enɔ lɔ nyuiɖe, yi ɖeɖeɛ kunu so lehan yi Mavɔmavɔtɔ lo nyi xomɛvutɔnɔ do no wo koɖo ŋsɛn. E doasɛ mɔ ŋshishi kuku nɔ amɛ yetɔ li, eyi e to wo ji yi wa Jeshi kodo enujijiŋ sugbɔ. ⁴ Eyi jugan lɔ mɛ tɔwo ma do amɛve. Mɛɖekawo le Yuɖatɔ lɔwoji yi mɛɖekawo le amɛdɔdɔ lɔwo ji. ⁵ Amɛmanyi Yuɖatɔwo koɖo Yuɖatɔwo sɔ kpenɔ wowo gawo sɔ gbeta mɔ yowo a ɖe eƒun nɔ Pɔlu koɖo Banabasi yi a xoxo ɔ ekpe wo kaka wo a ku. ⁶ Vɔ ci yi dɔla lɔwo siiɔ, wo shi yi yi Likawoni kan mɛ yi vayi Lisitɔ koɖo Dɛbe juganwo mɛ koɖo kɔxwi ciwo yi trɔde wo mɛ. ⁷ Yi va yi tɔ eŋɛnyui lɔ dodo le enɔtɔxuwo. ⁸ Ŋsuxukplɛ ɖeka le Lisitɔ jugan lɔ mɛ. Ci yi wo jii ɔ, d'e zɔn zɔnlin kpɔ o. ⁹ Gbeɖeka ɔ, e ɖo eto yi seseɛ Pɔlu le nuxu xo ɔ. Pɔlu yɛ le ŋkuvi do nu yi kpɔkpɔ mɔ yi xɔ Mawu ji se, mɔxɔse lɔ a hwlin gan dru. ¹⁰ Eyi Pɔlu do axwa yi nu mɔ: « So a nɔ ette le afɔ tɔwo wowo ji» Ŋsu lɔ le e yi ƒɔwo ji yi tɔ zɔnlin zɔnzɔn. ¹¹ Ci yi ahwakɔn lɔ kpɔ enu ci yi Pɔlu, wo do axwa yi nu le Likawoni gbe mɛ mɔ: « gbɔngbɔnkɔnwo sɔ agbetɔ nɔnɔmɛ yi ɖyiva mi gbɔ» ¹² Eyi wo sɔ gbɔngbɔnkɔn ci yi wo nɔ mɔ zesu nyikɔ na Banabasi yi sɔ ci yi tɔnɔ mɔ Hɛmɛsi Nyikɔ na Pɔlu. Ɖo e yi xonɔ nuxu do eju nɔ wo. ¹³ Zesu xɔ le ŋkɔ nɔ ejɔ lo gbonu. Amɛ ci yi sa nɔ avɔ nii wayi le nyibu su ɖekawo va voju xɔ lɔ hɔn nu wo sɔ seesewo ɖo nɔ nyibu lɔwo ɖo ɔ yi koɖo ahwakon lɔ jiji a sa avɔ nɔ Banabasi koɖo Pɔlu. ¹⁴ Vɔ ci yi dɔla lɔwo, Banabasi koɖo Pɔlu sii ɔ, wo drɛn awuwo so ekɔ yi shi eju yi ɖo wo mɛ yi do axwa mɔ: ¹⁵ « Emi wo xlɔwo ŋde yi nyi enu nɔwo yi mi wawa ɔ? Agbetɔwo yi mi nyi shigbe miwo han nɛnɛ. Nɔnɔmɛ ɖeka yi mi ɖo. Mi jijiɛ a va do eŋɛnnyui lo mɔ mi, nɔ mi a tashi enugbali hunnɔwo keŋ yi a va Mawu agbeagbe ci yi wa jeŋkui nyigban, axu koɖo enu ciwo pleŋ yi le wo mɛ gbɔ. ¹⁶ Le blema mɛ ɔ, Mawu tashi jukɔnwo pleŋ yi wo nɔ agbe le wowo ŋtɔwo shinu. ¹⁷ Vɔ ɔ, Mawu wa enyui hweshiahwenu yi sɔ donɔ asɛ mɔ ye li. E nanɔ yi eshi janɔ do gamɛ yi jinuku miwa tɔwo nyɔnɔ yi mi ɖunɔ, yi kpɔ nɔ jijɔ. ¹⁸ D'é ƒa gbɔxwe yi Pɔlu koɖo Banabasi va nu enyɔ cɛwo yi sɔ xe emɔ nɔ amɛ lɔwo mɔ xo ŋgbe sa avɔ nɔ yowo. ¹⁹ Yɖatɔ ɛkawo so antiwɔshi le Pisidi kan mɛ, yi ɖekawo so ikoninɔmu kan mɛ yi va enɔ lɔ. Wo na yi ahwakɔn lɔ ɔn wowo nyɔ ji, yi xo ekpe Pɔlu kaka dɔin ti le eju lɔmɛ. Ɖo ɔ, wo bu mɔ yi kuo. ²⁰ Vɔ ci yi nukplaviwo va trɔdii ɔ, eƒɔn yi gbe trɔva eju lɔ mɛ yi le ŋkegbu ɔ, yi koɖo Banabasi yi Dɛbe jugan mɛ. ²¹ Ci yi Pɔlu koɖo Banabasi va do Dɛbe jugan lɔ mɛ ɔ, wo do eŋɛnnyui lɔ nɔ amowo yi amɛ sugbɔ trɔ nukplavi. Le eyi godu ɔ, wo trɔyi Lisitrɔ jugan koɖo. O do ŋdɛn lanmɛ nɔ nukplavi lɔwo nɔ wo a li eke le xɔse mɛ. ²² Wo nu nɔ wo mɔ: « Mi ɖo a to vevesese sugbɔ mɛ gbɔxwe yi a yi Mawu fiɔɖuxu lɔ mɛ.» ²³ Wo ɖo ehamɛmɛganwo do enu nɔ Mawu hawo ɖeka ɖeka. Ci yi wo bla enu yi do egbe ɖaɖa ɖegbɔ ɔ, wo sɔ hamɛmɛgan lɔwo do alɔmɛ nɔ Mavɔmavɔtɔ ci ji yi wo ɖo xɔxe do. ²⁴ Le e yi godu ɔ, wo to Pisidi kan mɛ yi va Parfili kann mɛ. ²⁵ Ci yi wo nu Mawu nyɔ le pɛze jugan mɛ eɖgbɔ, wo yi Ataliya jugan mɛ. ²⁶ Ci yi wo so le enɔ ɔ, wo trɔva Antiwɔshi, jugan ci mɛ yi wo sɔ do alɔmɛ nɔ Mawu dɔmɛnyɔnyɔ, le edɔ ci yi wo wawa ɖegbɔɛ mɛ. ²⁷ Gacimɛ yi wo va ɖo Antiwɔshi ɔ, wo bɔ Mawu hamɛ tɔ lɔwo pleŋ yi nu enyɔ ciwo kpu yi Mawu wa to do wo ji nɔ wo, yi gbe nu lehan yi Mawu hun emɔ yi amɛmanyi Yuɖatɔwo Yuɖatɔwo can xɔ Mawu ji se do nɔ wo hɛnnɛ. ²⁸ Blu koɖo Banabasi nɔ nukplavi lɔwo gbɔb le Antiwɔshi sugbɔ.