¹ Anyi xlɔ veviwo, wema amɛve tɔ ke yi ŋ ŋwlɛŋwlɛ ɖaɖami vɔ ke. Le wema amɛve lɔwo mɛ ɔ, ŋ ɖoɖoɔ eŋui enu cɛwo nɔ mi, keŋ nɔ miwo susu a kpɔ enu jewo mɛ gbajɛ. ² Nɔ nɛnɛ ɔ, mi a ɖonɔ eŋui enyɔ ci yi Mawu ŋɛdotɔ kɔkɔɛwo nu vayi koɖo egbeɖeɖe ci amɛ ci yi nyi Axwetɔ kodo hwlɛngantɔ ɖe todo amɛdodoɔji. ³ Mi ɖo a nya vevi ɖe mɔ, le ŋkeke vɔvɔkpɛtɛ lɔ wo mɛ ɔ, amɛ ci wo yi nɔnɔ agbe shigbe lehan yi edro wo do nɛnɛ, a va to. Wa va kokoɔmi. ⁴ Yi wa va nunuɔ mɔ: «Fiŋge yi egbe ci yi Yesu Kliso do sɔ so e yi trɔtrɔgbɔ nu le ɔ? Ɖo, so hwenu yi miwo dawo ku xoxoxo, enuwo pleŋ gbe kpɔtɔ le lehan yi wo le do sɔso xexe gɔnmɛjejemɛ.» ⁵ Le enɔ ɔ, wo va ŋlɔbe mɔ sasa vayi ɔ, Mawu wa jeŋkui koɖo nyigban sɔ todo e yi nuxu mɛ. Eshi mɛ yi e ɖe nyigban tii le ; yi eshi yi e sɔ na nɔnɔmɛ nyigban lɔ. ⁶ Nɛnɛke yi e trɔn xexe xoxwito lɔ koɖo eshi gangan lɔ vayi do nɛ. ⁷ Mawu gbe sɔ e yi nuxu le jeŋkui kodo nyigban ciwo yi li le egbɛ mɛ yɛ ɖe nɔ ezododo. E gbe wo ɖɛ, yi a va trɔn wo le gbecigbe yi a va ɖo kojo enuvɔin watɔwo. ⁸ Keŋ ɔ, anyi xlɔ veviwo, enu ɖeka li yi mi ɖe ɖo a ŋlɔbe o. Eyi nyi mɔ ŋkeke ɖeka le shigbe exwe kotokun ɖeka nɛnɛ nɔ Axwetɔ, yi exwe kotokun ɖeka le shigbe ŋkeke ɖeka nɛne nii. ⁹ Axwetɔ ɖe dɔndɔn game nɔ e yi gbeɖoɖo ji wawa do shigbe lehan yi amɛɖowo buibuiɛ do nɛnɛ o. Vɔ ɔ, e xɔnɔ gbɔngbɔn do mi nu. Ɖo ɖeji mɔ amɛɖe a yi trɔntrɔnmɛ o ; e jinɔ mɔ amɛshiamɛ a kpɔ emɔ, yi a trɔ yiɖeki a ji blebu. ¹⁰ Ganŋke ɔ, Axwetɔ ŋkeke lɔ a va va le avomɛ shigbe lehan yi flafinnɔ vanɔ amɛ gbɔ do nɛ. Gbenɔgbe ɔ, jeŋkui a bu le axwa gangan ɖeka ɖyiɖyi mɛ. Ezo a bi wleciviwo le jeŋkui mɛ, yi a bebe ; wa klɔ so nyigban koɖo edɔ ciwo kpu yi wo wawa le ji nu. ¹¹ Ci yi enu lɔwo pleŋ a nyinyɔ a han ɖee, mi ɖo a nya agbe ci yi mi a nɔ nyuiɖe ! Agbenɔnɔ lɔ ɖo a yi ji koɖo amɛɖeki hɛnhɛn do kɔkɔɛɖe koɖo egbejinɔnɔ nɔ Mawu. ¹² Mi nɔ ete kpɔ Mawu ŋkeke lɔ, yi a gbe tekpɔ nɔ a va blaŋ. Gbenɔgbe ɔ, Mawu a sɔ ezo sɔ trɔn jeŋkui, yi wleciviwo a nyinyɔ. ¹³ Vɔ Mawu ɖo egbe mɔ, ye a wajeŋkui yoyu ɖeka koɖo nyigban yoyu ɖeka ciwo mɛ, yi wa wanɔ Mawu dro le. Enu hunnɔ yi miwo nɔnɔ ete kpɔ nɛ. ¹⁴ Anyi xlɔ veviwo, ci yi e le nɛnɛ taɖo ɖee, mi tekpɔ a nɔ agbe nyuiɖe nɔ Axwetɔ a va kpɔ mi le fafa mɛ, yi eɖyixoxo alo afɛn ɖe ɖa le mi nu o. ¹⁵ Mi xɔɛ mɔ miwo Xwetɔ gbɔgbɔ xɔxɔ mɛ yi miwo a kpɔ hwlɛngan le. Enyɔ hunnɔ ke yi miwo nɔvi vevi, Pɔlu ŋwlɛ ɖaɖa mi koɖo ŋununyanya ci yi Mawu nii mɛ nɛ. ¹⁶ Le e yi wemaŋwlɛŋwlɛ ciwo mɛ yi e xo nuxu so enyɔ ci yi e nunɔ nɛ. Akpaxwe ɖekawo li nɔ wema lɔwo, yi wo ɖe sɛnŋ yi mɔnje wo mɛ nyuiɖe o. Amɛ manyanuɖɛwo koɖo amɛ ciwo yi ɖe li eke le xɔse mɛ nyuiɖe wo trɔnɔ eta do egu nɔ gɔnmɛsese ci yi le enyɔ lɔwo shi shigbe lehan yi wo wɛɛni do koɖo Mawu nyɔ wema kpɛtɛwo nɛ. Ci yi wo le nɛnɛ waa ɔ, wo dɔndɔn wowoɖekiwo yi trɔntrɔnmɛ. ¹⁷ Vɔ anyi xlɔ veviwo, ecɛɛ ci yi wo ɖoafɔ afɔta nɔ mi ɔ, mi nɔ glaglaji nɔ mi ŋgbe tashi miwoɖekiwo ɖɛ nɔ enuvɔinwatɔ hunnɔwo a sɔ mi bu, yi a xɔ kankandoji miwotɔ le mi shi o. ¹⁸ Vɔ ɔ, mi kpɔtɔ a shinshin ɔ do ji le Mawu xomɛvunu mɛ koɖo le Yesu Kliso, miwo Xwetɔ kodo miwo hwlɛngantɔ jejeshi mɛ. E yitɔ yi nyi kanfukanfu sɔso egbɛ kaka sɔyi mavɔmavɔ. Axoaɖyi !