¹ Enyɛ Simɔn Piyɛ ɔ, ŋnyi Kliso dɔwavi kodo yi dɔla. Ŋwlɛ wema cɛ ɖaɖa amɛciwo yi Mawu sɔ to jɔjɔɛnyinyi wawa koɖo hwlɛngantɔ Yesu Kliso ji, yi na yi waɖo xɔse. Wowo xɔse lɔ xɔ ashi sigbe miwo tɔ nɛ. ² Xɔmɛvunu koɖo fafa ɖegbe sugbɔ nɔ mi do ji gɔdɔɔ, nɔ ci yi mi jeshi eyɛ Mawu koɖo miwo Xwetɔ Yesu ɖɛ taɖo. ³ Tɔhonɔ sɔ enuciwo pleŋ yi wudomi nɔ agbenɔnɔ koɖo ekacaca adodui koɖo Mawu sɔ na mi sɔ todo e yi ŋsɛn ci so Mawu gbɔ lɔ mɛ ji. E na yi mi jeshi amɛ ci yi yɔ mi todo klɛnklɛn gangan lɔ mɛ le yiŋtɔ hlɔnhlɔn mɛ. ⁴ Sɔ todo enuhunnɔwo mɛ ɔ, ewa do egbeɖu ciwo yi le ŋkɔ nɔ egbeɖuwo koɖo ciwo yi nyi gangantɔ ciwo yi e wa nɔ mi sasa ji. E wɛɛ nɛnɛ keŋ nɔ enu hunnɔ lɔwo le mi shi ɔ, ahɛndodo ci mɛ yi xexemɛ nudroamɛ dɔndɔn kplɔ nɔ amɛ yi a to akpa nɔ mi. Eyi ɔ, mi a kpɔ akpaxwe miwo tɔ axɔ le Mawu jɔjɔmɛ. ⁵ Do enyɔ hunnɔ taɖo teŋ ɔ, mi je agblawo pleŋ yi a sɔ nɔnɔmɛ nyui bɔdo miwo xɔse nu, yi a gbe sɔ Mawu jeshi bɔdo miwo nɔnɔmɛ nyui lɔ nu. ⁶ Mi sɔ amɛɖekijinunu bɔdo Mawu jejeshi nu, yi a sɔ vevidonu bɔdo amɛɖekijinunu. Mi sɔ ekacaca adodui koɖo Mawu bɔdo vevidonu nu. ⁷ Mi sɔ nɔviwawa bɔdo ekacaca adodui koɖo Mawu nu, yi a sɔ lɔnlɔn bɔdo nɔviwawa lɔ nu. ⁸ Nyao ɔ, nɔ wana nyui hunnɔwo le mi mɛ, yi zezeɛ le mi mɛ ɔ, wo ɖa na yi mi a ci edɔmawa mɛ alo ekumasen mɛ o. Ɖo mi jeshi miwo Xwetɔ Yesu Kliso ɖɛ. ⁹ Vɔ ɔ, amɛ ci yi shi enu hunnɔwo ɖe le ɔ, yɛ nyi ŋkuvitɔntɔnnɔ. Ŋkuviwo cu nii, yi e ŋlɔbe mɔ Mawu klɔ ye nuvɔinwo sii nɔ eye vayi. ¹⁰ Hɛnnɛ ɖee, nɔvinyɛwo, mi do ŋsɛn, yi a ɖo ekpe, yɔyɔ ci Mawu yɔ mi koɖo cancan ci yi e can mi ji. Nɔ mi wɛɛ nɛnɛ ɔ, mi ɖa va klɛn afɔ gbeɖe o. ¹¹ Nɛnɛ yi wo a hun miwo Xweto koɖo miwo Hwlɛngantɔ Yesu Kliso fiɔɖuxu mavɔmavɔ lɔ gbowo nɔ mi gbajaa, nɔ mi a ɖo mɛ do nɛ. ¹² Enu ci yi na taɖo, yi na kpɔtɔ a ɖoɖoɔ eŋui enu hunnɔ lɔwo nɔ mi tɛgbɛe do nɛ. Ci yi mi jeshi wo ɖɛ vɔ, yi gbe li eke le nyɔnɔnui lɔ ci yi mi xɔ mɛ can ɔ, ŋkpɔtɔ a ɖoɖoɔ eŋui nɔ mi. ¹³ Nɔ ŋkpɔtɔ le lankpu cɛɛ ci yi nyi enukuku cɛ mɛ duu ɔ, ŋ kpɔ mɔ yi nyi enujɔjɔɛ mɔ nana yi mi anɔ ezanŋte sɔ todo enuɖoɖoŋui lɔwo mɛ. ¹⁴ Ɖo ɔ, ŋ nya nyuiɖe mɔ gacimɛ yi na to le lankpu cɛɛ mɛ do, gogo, shigbe lehan yi miwo Xwetɔ Yesu Kliso sɔɛ doase nɔ ŋ vayi do nɛ. ¹⁵ Na tekpɔ a wɛɛ, yi nɔ ŋ va so can ɔ, mi a kpeji yi a ɖonɔ eŋui enyɔhunnɔ lɔwo hweɖekpokpoi nu. ¹⁶ Nyao ɔ, ɖe nyi gbɛmɛ nyɔnunu vivi ciwo yi wo wadaŋ to ɖɛ mɛ yi mi to yi sɔ dre miwo Xwetɔ Yesu Kliso ŋsɛn koɖo eyi trɔtrɔva nyɔ nɔ mi o. Vɔ ɔ, miwoŋtɔwo yi kpɔ e yi gangangan tɔxu koɖo miwo ŋkuviwo. ¹⁷ Ɖo ɔ, e xɔ kanfukanfu koɖo gangangan le Mawu Eda gbɔ, hwecinu yi egbe lɔ ɖyiɖyiɛ nii sɔ so klɛnklɛn gangan lɔ mɛ mɔ: «Amɛ cɛ yi nyi evinye vevi ci yi ŋ ɖe lɔnnɔ enu le ekɔ nɔ ke.» ¹⁸ Miwoŋtɔwo se egbe lɔ ci yi ɖyi so jeŋkuimɛ, hwenu yi mi le koɖyi le ekpo kɔkɔ lɔ ji. ¹⁹ Nɛnɛ ɔ, mi kpɔtɔ yi kpɔkpɔ Mawu ŋɛdotɔ nyɔ do enyɔ vevi teŋ ji. Eyi ci yi mi nɔnɔ ezanŋte do enyɔ lɔ nu shigbe kaɖigban ci yi jejeɔ le ʒinflumɛ ɛnɛ ɔ, mi wɛɛ nyuɖe. Ɖe nɔ tɔtɔ kaɖigbantɔ hanwo kaka a sɔ je hwecinu yi eŋ a ke, yi wlecivi nyidintɔ a tɔ klɛnklɛn do miwo ji mɛ. ²⁰ Mi nya nyuiɖe doŋkɔ nɔ enuwo pleŋ mɔ, le Mawu nyɔ wemawo mɛ ɔ, amɛɖe ɖa sɛnŋ sɔ yiɖekɛ susu ɖe gɔnmɛ nɔ Mawu ŋɛdotɔ nyɔɖe o. ²¹ Nyao ɔ, Mawu ŋɛdotɔ nuxu ɖe de va kpɔ yi e nyi agbetɔ dro mɛ yi e to so o. Vɔ ɔ, Gbɔngbɔn Kɔkɔɛ yi na yi agbetowo xɔnɔ eŋɛ sɔso Mawu gbɔ yi do nɔ.