¹ Kliso kpekpedonu dɔ ci yi mi a wa ɖaɖa xɔsetɔ ciwo yi le ʒude kan mɛ nu ɔ, e' eʒian duu mɔ na ŋwlɛ enu soso nu nɔ mi go. ² Nyao ɔ, ŋ jeshi edronyui ci yi mi ɖo, ci yi na yi ŋ vovoɔ eŋ fɛɛ do mi nu le Maseɖuwanu kanmɛtɔwo gbɔ yi nu mɔ : « Nɔvi ciwo yi le Akayi kan mɛ le egbessɔɔ kɔnmɔlike ɖii yi a wa enunanawo. » Nɛnɛ ɔ, miwo dronyui lɔ de ezo lanmɛ nɔ amɛ sugbɔtɔ le Maseduwanu kan lɔ mɛ. ³ ŋ ɖoɖoɔ nɔvi hunnɔ lɔwo ɖaɖa mi gbɔ. ŋ de ji mɔ lehan yi mi vo eŋ fɛɛ do mi nu do a va nyi gbali hwenu yi wo a va ɖo mi gbɔ go. E yi na taɖo mi nɔ egbesɔsɔ nyɔnɔnyuitɔ shigbe lehan ŋ nui do nɛ. ⁴ Alo ŋɔ Maseduwanu kanmɛtɔwo va zɔn kodo ŋ yi va migbɔ yi va kpo mɔ miwo de le egbesɔsɔmɛ go ɔ, ŋkpɛn a nyi nɔ mi alo ŋkpɛn lɔ a nyi nɔ miwo can hɛnnɛ. ⁵ E yi na taɖo yi ŋ kpɔ mɔ yi ʒian mɔ na do ŋsɛn lanmɛ nɔ nɔvi lɔwo nɔ wo a jeŋkɔ nɔ ŋ yi a va ɖo migbɔ. Nɛnɛ ɔ, wo a va kpedo mi nu nɔ mi le edroafaa nunana ci gbe mi ɖo mɔ yewo a wa mɛ. Gahunnɔmɛ ɔ, enunana lɔwo a le egbesɔsɔ shigbe edrofaa nunana nɛ yi d' a nyi eguitɔwo nuwawa ɖe go. ⁶ Le mɛ ɔ, amɛ ci yi do jinuku kankin ɔ, kankin yi e gbe vayi ɖenɔ yi amɛ ci yi do sugbɔ haan ɔ, sugbɔ haan ke yi e gbe vayi ɖenɔ. ⁷ Ci yi e le nɛnɛ ɔ, amɛɖeka amɛɖeka le na enu faa shigbe lehan e drɔɛ do le yi ji mɛ nɛ, vevemase, ejiʒinʒinmanɔmɛ. Ɖo ɔ, Mawu lɔnnɔ amɛ ci yi nana enu kodo jijɔ. ⁸ ŋsɛn le Mawu shi yi a na yi enunyui hamɛhamɛwo pleŋ a sin mi shi madoŋdonu. Nɛnɛ nɔ ci yi enu le mishi hweɖekpokponu le nɔnɔmewo pleŋ mɛ taɖo ɔ, enu ciwo pleŋ yi a nyi eʒan a gbe sun mishi gɔɖɔɔ doji sɔɖɛ nɔ zanzan do edɔ nyui ɖekpokpoi mɛ. ⁹ E le nɛnɛ shigbe lehan yi wo ŋwlii daɖɛ do nɛ mɔ : « Ema yi nunyuiwo, e na enu ayanɔwɔ; yi jɔjɔɛnyinyi li sɔyi tɛgbɛɛ. » ¹⁰ Eyi mɛ ɔ, amɛ ci yi nanɔ kunado jinukunotɔ koɖo enuɖudu ci yi a ɖu yi a na jinu kunado mi. A na yi a ji do yi a na yi miwo jɔjɔɛnyinyi kusɛnsɛn a shin. ¹¹ Nɛnɛ ɔ, a na yi mi a je dɔku sugbɔ haan le enushan mɛ nɔ mi a kpɔtɔ a dodoɔ asɛ enunanamɛfaa jijɔ ci yi le mi shi. Nɛnɛ ɔ, amɛ sugbɔ a le akpe dodoɔ nɔ Mawu do enunana lɔwo ciwo yi a hɛnva nɔmi taɖo. ¹² Do ɔ, d'é nyi kpɔ mɔ enu maleanmɛshiwo duwo ɖekɛ yi enunana dɔwawa cɛ vayi cucuɔ nɔ xɔsetɔ lɔwo go. VVɔ ɔ, e gbe na yi amɛ sugbɔ wawa akpedodo kuifanwo nɔ Mawu. ¹³ Ci yi amɛwo kpɔ kpɛnkpɛnmɛ ci yi le edɔ hunnɔ ci yi mi wawa shi ɔ wo kannɔfu Mawu nɔ etonu ci yi mi seseɔ nɔ kliso lɔ ŋɛnyui l ɔyi kakakɛ. Wo gbe kannɔfu Mawu hɛnnɛ nɔ edro nyui ci yi mi sɔ wanɔ novi koɖo wowo kioɖ amɛ kpɛtɛwo pleŋ. ¹⁴ Nɔvilɔnlɔn gangan ŋtɔ yi wo sɔ wanɔ kuifan nɔ Mawu do miwo ta do xomɛvunu manumanu ci yi Mawu wa nɔ mi gɔɖɔɔ taɖo. ¹⁵ Kanfukanfu nɔ Mawu do yi nunana manyaadre hunnɔ taɖo.