¹ Zetɔntɔ lɔ ke yi ŋ gbɔgbɔ yi a va yɔ mi kpɔ ke : « Enyɔ ɖekpokpui ci yi mi a xo ɔ, kunuɖetɔ amɛve alo amɛtɔn nuxu ji yi mi a nɔ yi a sɔ so kojo. » ² Hwenu yi ŋ va mi gbɔ zevetɔ lɔ vayi ɔ, ŋ nui yi egbɛ ci yi ŋ le azɔge nɔ mi ɔ, ŋ gbe nuinuiɔ ke nɔ amɛ ciwo yi wa enuvɔn vayi koɖo nɔ amɛ kpɛtɛwo pleŋ mɔ : Nɔ ŋ gbe va va mi gbɔ ede yɛ ɔ, ŋ d'a kpɔɛyi a wa nɔ amɛɖe go. ³ Ɖo ɔ, mi jijiɔ mɔ yewo a kpɔ jeshi ɖeka ci yi a doasɛ mɔ Kliso lɔ le nuxu xoxoɔ le enyɛ mɛ. Kliso lɔ ɖe nyi amɛklekle ɖaɖa mi gbɔ go. Vɔ ɔ, ŋsɛntɔ yi e nyi le miwo domɛ. ⁴ Nyao ɔ Klekle lɔ mɛ yi wo kiin do acisosa ji le. Bɔ ecɛyɛ ɔ, e le gbe sɔ todo Mawu ŋsɛn mɛ. Miwo can ɔ, mi nyi amɛ kleklewo le eye mɛ. Vɔ ɔ, mi a va nɔ agbe kodoi nɔ miwo sɔ todo Mawu ŋsɛn mɛ. ⁵ Miwoŋtɔwo mi gbeje miwoɖekiwa mɛ kpɔ yi a kpɔ nɔ mi le xɔse lɔ mɛ ba. Mi ɖo miwoɖekiwo kpɔ. Mi de do jeshii mɔ yesu Kliso le mi mɛ ba? Nɔ d' e nyi nɛnɛ go ɔ, a nyi ke mi gɛn nɔ tetekpɔ lɔ yɔ. ⁶ Gankegan ɔ, ŋ kpɔkpɔ emɔ mɔ mi aa va do jeshii mɔ miwo yɛ ɔ, gbe miwo de gɛn le tetekpɔ lɔ mɛ go. ⁷ Ci yi e le nɛnɛ can ɔ, mi ɖeɖeɔ kuku nɔ Mawu mɔ miwo ŋgbe va wa enudɔndɔn ɖe go. D' e nyi kpɔ mɔ mi ji mɔ mi a todo nɔtɔxu yi a sɔ doasɛ mɔ wo do mi kpɔ yi mi din yɔ go. Vɔ nɔ mi a wawa enunyui nɔ e gbe le shigbe mɔ miwo gen nɔ tetekpɔ lɔ nɛnɛ can. ⁸ Do ɔ, ŋsɛn de le mi shi yi mi a sɔ fɔn egu do Mawu nyɔnɔnui lɔ ji go. Vɔ ɔ, sɔ mi a sɔ ŋsɛn ci yi mi do wa edɔ nɔ nyɔnɔnui lɔ. ⁹ Eju jɔnɔ mi nɔ mi nyi Klekletyɔnɔwo yi miwo nyi ŋsɛntɔwo. Enu ci jijiɔ mi le nɔ mi yi nyi kpɔ mɔ miwo le mɛ vɛ. ¹⁰ E yi na taɖo ci yi ŋ de le mi gbɔ gbɔ go, ŋ ŋwlɛŋwlɛɔ wema cɛ ɖaɖa mi. Nɛnɛ nɔ ŋ va va mi gbɔ ɔ, enyɛ ŋ gbe sɔ acɛkpakpa ci yi Axwetɔ na ŋ sɔ tɔ enuɖe wawa koɖo mi veviɖe go. Axwetɔ sɔ acɛ lɔ na ŋ nɔ ma sɔ cu miwo habɔbɔ lɔ do ete; d'e nyi nɔ ma sɔ gbin yɔ go. ¹¹ Nɔ na sɔ vɔ anyi nuxu ɔ, nɔvinyɛwo, mi kpɔ jijɔ. Mi tekpɔ a nyi amɛ ciwo yi mɛ vɛ. Mi do ŋsɛn lanmɛ nɔ miwonɔnɔwo. Misɔ egbe ɖo eju. Mi nɔ fafa mɛ koɖo miwonɔnɔwo. Nɛnɛ ɔ, Mawu ci yi lɔnnɔ amɛ yi gbe nanɔ fafa amɛ a nɔ koɖo mi. ¹² Mi kpla ashi ekɔ nɔ miwonɔnɔwo yi a sɔ do egbe nɔ nɔnɔ le Mawu mɛ. Klisotɔwo pleŋ do egbe ɖaɖa mi. ^{13 14} Axwetɔ yesu kliso xomɛvunu Mawu lɔnlɔn koɖo gbɔngbɔn kɔkɔɛ ɖekawawa koɖo amɛ le nɔɔ koɖo mi pleŋ.