¹ Amɛ ciwo ji yi hwashi nyinyi gban le do a mɔŋje mɛ yowo ɖo a bubu gangan yowo xwetɔwo nu. Nɔ amɛwo ŋgbe va kpɔ enuvɔin ɖe yi a nu ɔ so Mawu nyikɔ koɖo enu ci yi mi kplankplan mi nu o. ² Hwashi ciwo xwetɔwo nyi xɔsetɔ ɖe ɖo gbe bubu mado nɔ wɔnɔ ci yi wo nyi le xɔse taɖo o . Vɔ nɔ anyɔ ɔ wo ɖo a wawa odɔ nɔ wo nyuiɖe sɔwu. ɖo amɛ hunnɔ ciwo yi ɖu ele nɔ wowo dɔ wawa nyi xɔsetɔwo ; Mawu lɔn wo.E nu ci yi e ɖo a kplan amɛwo yi a dɔ mɔ wo ɖe wa do ji nɛ. ³ Nɔ 'mɛɖe gbe va le enu bu ɖe wo kplan 'mɛɖewo le eha lɔ mɛ yi toɔ akpa akpa nɔ enyɔ adodui ciwo yi mixwetɔ Yesu kliso nu koɖo enu ci ji mi xɔse yi kplan ɔ mi ɔ, ⁴ Egoyitɔ yi nyi amɛ lɔ yi ɖe jeshi enu ɖekpokpui o. Fiŋge yi wo to yi dɔndɔn enyɔ koɖo amɛwo yi nɛnɛ mɛwo jinɔ yi a evu waa do enyɔ ciwo ji. ŋhwanwo, evu wawa wo, amɛzuzu wo koɖo enyɔkpadonunɔamɛ wo yi nɛnɛ nuwo dɔnnɔ va. ⁵ E eyi wo va tɔnɔ enyɔwo dɔndɔn kpɔ le wowo nɔnɔwo mɛ mamimami. ɖo ɔ, tagbɔ ɖegbe sɔ gbe nɔ wo nyuiɖe o, yi nyɔnui ɖekpokpui ɖe gbe le wo mɛ o.Wo bu ɔ mɔ nɔ wo xɔ Yesu ji se ɔ manu e nyi yi wo ato keŋ yi a je dɔku. ⁶ Nyɔnnɔnui yi e nyi mɔ nɔ wo xɔ Yesu ji se, dɔku jeje gangan le mɛ nɔ e nyi kpɔ mɔ enu ci yi le amɛ shi vɔ jejeŋ nɔ amɛ. ⁷ ɖo ɔ, mi ɖe hɛn enuɖe va xexe cɛ mɛ o yi mi ɖa sɛnŋ sɔ enuɖe hɛnyi o. ⁸ Ci yi e le nɛnɛ ɔ, e nyi mɔ mi wa enu ci yi mi a ɖu koɖo enu ci yi mi a do ɖɛ vɔ, hunnɔwo ɖo a sun mi . ⁹ Vɔ ɔ, amɛ ciwo yi ji ji ɔ mɔ yewo a je dɔku je nɔ tetekpɔwo mɛ.E dɔndɔn wo koɖo enuvɔin, enuvɔin wo tɔnɔ wo drodro yi wo jenɔ enu lɔwo fɛnca wo mɛ.Le vɔvɔnu, wo nyi gbannɔ ŋgo yi a trɔn. ¹⁰ Ɖo ɔ, ehɔ lɔnlɔn yi nyi ekɔ nɔ evɔin wo pleŋ. Eho kpɔkpɔ bia ŋkuvi nɔ amɛɖewo sugbɔ yi wo le axu nya ni nɛnɛ kaka yi bu kpanŋ le xɔse mɔ ji .Nɛnɛ ɔ, wo ku gbazavisese sugbɔ do ekɔ nɔ wowoɖekiwo. ¹¹ Vɔ ewɔ ɖe Timɔte, Mawu mɛ yi e nyi. shi nɔ enu dɔndɔn hunnɔwo. Tekpɔ axɔɛɛ ji yi a lɔn amɛwo. Do vevi enu yi a fa ecu . ¹² Wa ahwa nyui ci yi xɔse mɔ miwɔ le wa nɔ na kpɔ agbemavɔ .Mawu yɔ wu nɔ na jeshi agbemavɔ lɔ agacimɛ yi a hun enyɔ ci ji yi e xɔse mɛ nyuiɖe le kunuɖetɔ sugbɔ ŋmɛ. ¹³ Ecɛ yɛ ɔ, Timɔte , Mawu ci yi nanɔ agbe enu pleŋ koɖo Yesu kliso, amɛ ci yi hun enyɔ ci ji yi e xɔse gɔnmɛnyuiɖe le kanjikpɔtɔ, pɔnsu pilati ŋmɛ nyi anyi .Kunuɖetɔ wo, wowo ŋmɛ yi ŋ dɔɔ wu le mɔ, ¹⁴ Ewɔ le wa do anyi gbeɖeɖe wo ji afɛn alo agin ɖe manɔ nɛnɛ kaka a sɔdonɔ agacimɛ yi miwo xwetɔ Yesu kliso a ɖe yiɖeki doasɛ ¹⁵ Aɖeyiɖeki doasɛ le egaxoxo ci mɛ yi Mawu ɖo mɛ. Mawu ci ɖekɛ yi nyi efiɔ. E yi nyi shicuwo joxu; efiɔ ci kpaacɛ nɔ efiɔ wo yi nyi Axwetɔ ci yi kpacɛ nɔ axwetɔwo. ¹⁶ Yiɖekɛ yi ɖe kunɔ gbeɖe o. Enɔnɔ anyinɔnɔ do klɛnklɛn gangan ɖeka ci amɛɖe ɖa sɛnŋ gogo o mɛ. Amɛɖe ɖe kpɔɛ kpɔ o yi amɛɖe ɖa senŋ kpɔɛ hɛnnɛ o. Amɛ pleŋ le do ɔ bubu yi nu yi sɛnŋ anyi yiitɔ sɔyi tɛgbɛɛ. xoaɖyi! ¹⁷ Timɔte, gbe nɔ amɛ ciwo yi wa xexe cɛ mɛ dɔkunuwo ɖɛ mɔ wo ŋgbe yinɔ ego o. Gbe nɔ mɔ wo ŋgbe do ɔ dɔkunu hunnɔ. Ciwo yi ɖe ɖo kandoji o nu o.Vɔ ɔ wo le ɖoŋ. Mawu ci yi nanɔ enu pleŋ mi sunsuin ɖe yi mi a ɖu wowo gbe nu. ¹⁸ Nu nɔ wo mɔ wo le wa enyui. Edɔ nyui wo wawa le nyi dɔku ci yi woa ji. wo le nanɔ enu amɛ koɖo eji faa yi le egbesɔsɔ a manɔ wowo dɔkunu wo koɖo amɛ kpɛtɛwo. ¹⁹ Nɔ wo wɛɛ nɛnɛ ɔ, anyi wo xoxoɔtɛ dokunu adoduiwo ɖɛ nɔ wowo ɖekiwo nɔ esɔ ci yi gbɔgbɔ keŋ yi a sɛnŋ kpɔ agbe adodui lɔ. ²⁰ Timɔte, le enyɔ ci yi ŋ nu doashi nɔ ewo sɛnsinɖe .ze nɔ nuxu ciwo yi ɖe sɔ gbe koɖo xɔse nyɔ wo yi a gbe zenɔ amɛ ciwo xonɔ evi mɔ yewo nya ŋɖɛ yi a le enyɔwo gɔnmɛ ku ɔ kpɔ kpoŋ. ²¹ Le nyɔnɔui mɛ ɔ, amɛɖekawo buwɔ mɔ yewo nya ŋɖɛ yi e dɔ mɔ wowo klan so xɔse mɔ ji. Mawu le wa xomɛvu nu nɔ m!