¹ Enyɛ ci yi nyi Yesu kliso mɛɖɔdɔ yi ŋwlɛ wema cɛ. Mawu, miwo hwlɛngantɔ koɖo Yesu kliso amɛ ci yi mi kpɔ kpɔ emɔ nɔ, yi ɖe egbe yi sɔ can ŋ nɔ ma nyi amɛdɔdɔ. ² Timɔte, evinyɛ vevi le xɔse mɛ, ewɔ yi ŋwlɛnwlɛn ɔ wema cɛ ɖaɖa. Eda Mawu koɖo miwo xwetɔ Yesu kliso ɖe wa xomɛvunu no wu; e yi agbe ku ŋshishi nɔ ; yi a na fafa wu. ³ Timɔte, shigbe le yi ŋ do ŋsɛn lanmɛ nɔ wo agacimɛ yi ŋyikɔ Masedwoini ɖɔ nɔ ewɔ ɖe nɔ Efeso jugan lɔ mɛ ɔ, wɛɛ nɛnɛ. Ɖo ɔ, amɛɖekawo le enɔ lɔ yi le enu dɔndɔn wo kplan eha lɔ mɛtɔwo. ⁴ Egbe nɔ wo mɔ wo ŋgbe gbe wa nɛnɛ wo. Egbe nɔ ke mɔ wo ŋgbe gbe lewɔ bu do exolɔlɔ dɔndɔnwo koɖo tɔgbiwo hlɛnhlɛn madolixo nu wo; Ɖo ɔ, enyɔ gbali dɔndɔnwo yi mɛ hunnɔwo hɛnnɛ va. wo ɖe dranɔ enuɖe do le totomɛ ci yi Mawu wa do mi nu yi mi sɔ toto xɔse mɛ nu. ⁵ Enu ciwo yi ŋ ji ɔ yi egbe ɔ enu hunnɔ wo yi nyi mɔ mi ɖo a lɔn miwo nɔnɔ koɖo xomɛ, ayiha nyui koɖo xɔse ayimɛnumawa. ⁶ Amɛkawo gbe enu hunnɔ wo yi tran emɔ do enyɔ maɖotawoji . ⁷ Wo jinɔ mɔ yoo a nyi ese dɔwatɔwo vɔ kpɔ wowoŋtɔ ɖe mɔŋje enyɔ ci yi wo nunu ɔ mɛ wo. Kpɔ wo ɖe nya enu ci ji yi wo tɛtɛ egbe koɖo ŋsɛn hɛnnɛ wo. ⁸ Mi nya nyuiɖe mɔ ese lɔ nyi enunyui nɔ e nyi kpɔ mɔ waɖaŋ ziin ziin ɔ shigbe le yi je do nɛ. ⁹ Mi gbe nya hɛnnɛ mɔ, wo ɖe do ese ɖe nɔ amɛjɔjɔɛwo o. Vɔ ɔ, edanuwatɔwo koɖo esejimadotɔwo koɖo, Mawumashitɔwo koɖo enuvɔinwatɔwo, amɛxoɖyixodyiwo koɖo amɛnɔwutɔwo, yi wo ese lɔ nɔ. ¹⁰ Wo do ese lɔwo nɔ hetelitɔnɔwo, nɔ ŋsu ciwo yi dɔnnɔ nyɔnu buwo gbɔ koɖo nyɔnu ciwo yi dɔnnɔ ŋsu buwo gbɔ, amɛlesahwashitɔwo, nɔ evihotɔwo, egbalidotɔwo, koɖo nɔ amɛciwo pleŋ enu blublu ciwo yi dowɔ ahɛn ekplan adoduii ci yi nana mi lɔ. ¹¹ Ekplan hunnɔ lɔ sɔgbe koɖo eŋɛnyui ci Mawu klɛnklɛn dokasɛ. Mawu ci yi ji ɔ, miwo nyui yi sɔ eŋɛnyui cɛ doashi nɔ ŋ. ¹² Ŋdo akpe nɔ miwo xwetɔ Yesu kliso. Ɖo ɔ, e do ŋsɛn ŋ nɔ ma yii dɔ . Ŋdo akpe nii nɔ ci e kpɔ mɔ enyɛ, ŋ je yi a wa yi dɔ. ¹³ Gankegan, vayi ɔ, ŋ nunɔ enyɔ dɔndɔn wo yi cinɔ yumɛ nɔ amɛ yi gbe zunɔ amɛ. Vɔ ɔ, Mawu ku ŋshishi nɔ yi ɖe kpɔ do enu hunɔtɔwo nu o. ¹⁴ Eyi miwo xwetɔ xomɛvu , xɔse koɖo lɔnlɔn ciwo yi le Yesu kliso mɛ le ŋ ji sugbɔ. ¹⁵ Nyɔnɔnui yi e nyi amɛ pleŋ ɖo akando ji mɔ Yesu kliso va xexe lɔmɛ yi a va hwlɛn enuvɔinwatɔ gan. Enyɛ yi nyi enuvɔinwatɔ sɔwu enuvɔinwatɔ pleŋ. ¹⁶ Vɔ ɔ, enu ci taɖo yi Mawu ku ŋshishi nɔ ŋ yi na yi Y esu kliso doasɛ le yi e gbɔnnɔ eji ɖɛ blɛwu do todo ŋji doŋkɔ nɛ. Agahunnɔ mɛ ɔ, ma nyi kpɔwɛ nɔ amɛ ciwo yi a va xɔɛ ji yi a kpɔ agbemavɔ lɔ. ¹⁷ Amɛ pleŋ de do bubu Mawu makumaku, efiɔ mavɔmavɔtɔ nu. yiɖekɛ yi nyi Mawu ci yi amɛɖekpokpui ɖe kpɔnɔno. Mi buini yi a kanfuini sɔyi mavɔmavɔ! ami. ¹⁸ Evinyɛ timɔte, ŋ sɔ enukplanmɛ hunnɔ ciwo yi sɔ gbe koɖo enyɔ ciwo yi Mawu ŋɛdotɔwo nu sa so wu nu dodo ashi nɔ wu. Enyɔ lɔwo le do ŋsen wu nɔ na senŋ a wa ahwa nyɔnuitɔ. ¹⁹ kpɔtɔ a xɔ Yesu kliso ji se yi gbe ɖo ayixa nyui. Amɛɖekawo gbe mɔ yoo ɖa ɖo eto ayixa nyui hunnɔ nyɔwoo yi wowo xɔse trɔn. ²⁰ Imɛnɛ koɖo Alɛsandri le amɛ hunnɔ wo mɛ. ŋ sɔ wo doashi nɔ legba nɔ a dɔn eto nɔ wo nɔ wo a mi enyɔ dɔndɔnwo nunu so Mawu nu.