¹ Nɔvinyɔɛwo, enyɔ ɖe ɖe gbeli yi mi a ŋwlɛ ɖaɖa mi so ŋkeke koɖo hwenu ci ji enu hunnɔwo a va jɔ le nu o. ² Ɖo ɔ, miwoŋtɔwo mi nya nyuiɖe mɔ hwecinu yi Axwetɔ lɔ trɔgbɔ le shigbe yi flanfinɔ vanɔ amɛ gbɔ le ezanmɛ do nɛ. ³ Hwecinu yi amɛwo a nunu ɔ, mɔ yewo le fafa le nɔxuwo, gbe enu ɖa jɔ o ɔ, aghunnɔnu yi jɔgbevɔin ɖeka a do wo mɛ yi ɖa gli amɛ ɖe do o nɛ. A le shigbe le dɔmɛ tɔnɔ nyɔnu funɔ ɖuɖu kpataa do hanwo nɛ. ⁴ Nɔvinyɛwo, miwo yɛ ɔ,miwo ɖe le zinzinmɛ yi ŋkeke hunnɔ a va cu mi le avomɛ shigbe le flanfinɔ vanɔ amɛ gbɔ do nɛ o. ⁵ Ɖo ɔ, klɛnklɛn koɖo kede viwo mi pleŋ nyi yi ɖe nyi zinzin koɖo ezanmɛ viwo yi mi nyi o. ⁶ Ci yi e le nɛnɛ ɔ, mi ɖe ɖo a dɔn alɔn shigbe amɛ kpɛtɛtɛwo nɛ o. V ɔ ɔ, mi a nɔ zanŋte yi a mi suka nu ji ji.

⁷ Ezanmɛ yi wo dɔnnɔ alɔn. Ezanmɛ lɔ ke yi wo nunɔ aha yi munɔ. ⁸ Miwo yɛ, ci mi nyi kede mɛ viwo taɖo ɔ, mi ɖe ɖo a ji suka nu o. Mi a kpɔtɔ a xɔnɔ Mawu ji se, yi a lɔn amɛ. Ɖo ɔ, e le shigbe mi sɔ akɔncnnuga do hanci nɛ. Mi a kpɔ kpɔ emɔ Yesu kliso. A va hwlɛn mi gan. Ɖo, emɔ kpɔ kpɔ hunnɔ nyi ahwakuku hanci. ⁹ Mawu ɖe yɔ mi yi sɔ yi homɛsin trɔn mi o. Vɔ ɔ, yɔ e yɔ mi keŋ a hwlɛn migan so todo Axwetɔ Yesu kliso ji. ¹⁰ Yesu kliso hunnɔ, ku miwo ta. Agahunnɔmɛ nɔ mi le agbe can alo nɔ mi ku can, mi a nɔ eju koɖyi. ¹¹ Ci yi e nɛnɛ ɔ, mi do eji exo nɔ miwonɔnɔwo yi a do alɔ miwonɔnɔwo le xɔse mɛ shigbe le yi mi wɛɛ wɛɛ do vɔ nɛ. ¹² Nɔvinyɛwo mi biɔbiɔ so gbɔ mɔ miwo bu amɛ ciwo wawa edɔ, le mi mɛ. wowo i kplɔnɔ mi le Axwetɔ mɛ yi gbe ɖonɔ afɔ afɔta nɔ mi. ¹³ Mi ɖo bubu nɔ wo sugbɔ yi a lɔn wo do edɔ ci wo wawa taɖo. Mi nɔ agbe le fafa mɛ koɖo miwonɔnɔ. ¹⁴ Nɔvinyɛwo, mi gbe biɔbiɔ so mi gbɔ mɔ miwo le nu nɔ dyiɖɔnɔwo nɔ wo a mi ɖyiɖo wawa. Mi do eji exo nɔ vɔnvɔntɔ, a do alɔ amɛ ciwo gbɔjɔ yi a xɔnɔ jigbonɖɛ ɖaɖa amɛ pleŋ gbɔ. ¹⁵ Mi kpɔ nyuiɖe! Amɛɖe ŋgbe wa enuvɔin do enuvɔin tɔxu o.Vɔ le agasiagamɛ ɔ, mi kpɔtɔ a wanɔ enyui ɖaɖa miwo nɔnɔwo koɖo amɛ pleŋ gbɔ. ¹⁶ Eji le jɔnɔ mi tɛgbɛɛ, ¹⁷ Yi mi a mi a donɔ egb ɖaɖa mamimami. ¹⁸ Mi donɔ akpe nɔ Mawu nɔnɔmɛ ɖekpokpui mɛ. Enu ciwo yi Mawu jiji ɔ so mi gbɔ le miwo gbenɔnɔ koɖo Yesu kliso lɔ mɛ nɛ. ¹⁹ Mi ŋgbe xe emɔ nɔ Ggbɔngbɔn kɔkɔɛ o. ²⁰ Mi ŋgbe gbanɔli Mawu ŋɛdotɔwo nyɔwo o. ²¹ Vɔ ɔ, mi ŋgbe enuwo pleŋ mɛ kpɔ yi a can ci yi nyɔ, ²² Yi a ze enuvɔin alɔkpa alɔkpawo pleŋ. ²³ Mawu ci yi nanɔ fafa amɛ le wɛɛ nɔ mi a nyi blebu .Le sɔ alɔ cɔn agbetɔ ɖeka ɖeka ji, agbetɔ lɔ gbɔngbɔn, yi se koɖo yi lankpu nɔ wo a nɔ sɛnsinɖe, nɔ wo ŋgbe va ehwɛ ɖe a do wo gbecigbe yi miwo xwetɔ Yesu kliso trɔva o. ²⁴ Wo a kando amɛ ci yi can mi ji .E yi lɔ ke yi a wɛɛ nɔ mi. ²⁵ Nɔvinyɛwo, mi do gbe ɖaɖa do eta nɔ miwo hɛnnɛ. ²⁶ Mi kpla ashi ekɔ nɔ miwo nɔviwo yi a sɔ do egbe nɔ wo. ²⁷ Ŋ ɖe kuku nɔmi le Axwetɔ nyikɔ mɛ mɔ miwo le hlɛn wema cɛ nɔ ehamɛvi lɔwo pleŋ. ²⁸ Miwo xwetɔ Yesu kliso xomɛvu le nɔ koɖo mi.