¹ Enyɛ Pɔlu ɔ, édró Mawu yi é yɔ ŋ nɔ́ ma nyi Yesu Kliso mɛdɔdɔ. Enyɛ koɖo miwo nɔvi Sosutɛnu yi ŋwlɛŋwlɛ wema cɛ ² ɖaɖa Mawu há ci yi le Kolɛnti jugan mɛ. Amɛ ci yi wo ɖe do akpo nɔ Mawu le Yesu Kliso mɛ, yi wo le kɔkɔɛɖe toto yɔyɔ lɔ ci yi wo xɔ mɛ. Wo nyi Mawutɔ. Mawu can wowo koɖo amɛ ciwo pleŋ yi yɔnɔ miwo Xwetɔ Yesu Kliso nyikɔ le afishafi nɔ́ wo a nyi yitɔ blebu. Axwetɔ Yesu Kliso lɔ nyi wowo Xwetɔ yi gbe nyi miwotɔ. ³ Mawu, miwo Da koɖo Axwetɔ Yesu Kliso lé wa xomɛvunu nɔ́ mi, yi a ná fafa mi. ⁴ Ŋ donɔ akpe nɔ́ anyi Mawu nɔ́mi tɛgbɛɛ nɔ xomɛvunu ci yi é wa nɔ mi le Yesu Kliso mɛ. ⁵ Nyao, ci yi mi wa ɖeka koɖo Kliso do ɔ, Mawu ná dokunuwo pleŋ mi, dɔkunu ciwo pleŋ yi le nuxuxoxo koɖo enunyanya mɛ. ⁶ Kunu ci yi wo ɖe soso Kliso lɔ nú nɔ́ mi li eke le mi mɛ nyuiɖe. ⁷ Ci yi é le nɛnɛ ɔ, Mawu nunana xomɛvutɔ ɖe de hwedo míwo ciwo yi lete kpɔ mìwo Xwetɔ Yesu Kliso vava o. ⁸ Eyɛ yi aná yi mí a ʒin góŋgóŋ kaka a sɔ́ yi vɔvɔnu. Nɛnɛ ɔ, amɛɖe d'a kpɔ́ ehwe ɖe yi a dó nɔ́ mí le ŋkeke ci yi mìwo Xwetɔ Yesu Kliso a vá o. ⁹ Mawu ci yi yɔ mí, yi mí wa ɖeka koɖo Eviɛ Yesu Kliso mìwo Xwetɔ, je nɔ kankandoji. ¹⁰ Nɔvinyɛwo, ŋ dodɔ ŋsɛn lanmɛ nɔ mí toto Axwetɔ Yesu Kliso nyikɔ mɛ mɔ míwo pleŋ le wa ɖeka. Mí ŋgbé ma o. Egbé lé nɔ eju nɔ mí nyuide lesusuɖeɖe koɖo gbetasɔsɔwo mɛ. ¹¹ Nyao ɔ, nɔvinyɛwo, Klowe xomumɛtɔwo nú nɔ́ ŋ mɔ, míwo ɖe kpekpe o. ¹² Enyɔ ci yi ŋ nunuɔ gɔnmɛ yi nyi mɔ́ amɛ le míwo domɛ yi nunuɔ mɔ : "Pɔlu ji yi ŋ le" , amɛ bu nunuɔ mɔ "Apolosu ji yi ŋ le" , amɛ bu gbe nunuɔ mɔ : "Cefasi ji yi ŋ le" , amɛ bu gbe nunuɔ mɔ : "Kliso ji yi ŋ le". ¹³ Kliso lo va má yɔ́ a ? Pɔlu yi wo kán dó acisosa ji do eta nɔ mí a ? Alo Pɔlu nyikɔ mɛ yi wo le Mawushi nɔ mí le a ? ¹⁴ Akpe nɔ mawu mɔ ŋ de le Mawushi nɔ amɛɖe le mi mɛ to akpa nɔ klisipusu koɖo gayiyusi o. ¹⁵ Nɛnɛ ɔ mɛɖe d'a sɛn nu mɔ anyi nyikɔ mɛ yi wo le Mawushi nɔ mi le o. ¹⁶ Aáán! ŋ ɖo eŋuii mɔ́ ŋ gbe le Mawushi nɔ sitefanasi xomumɛtowo hɛnnɛ. Amɛ kpɛtɛ wowo ɔ, ŋ de bu mɔ ŋ gbe le Mawushi nɔ amɛbu dé o. ¹⁷ Dó d'ényi Mawushi lele nɔ amɛ gbe yi kliso lɔ dɔ́ ŋ ɖaɖa o. vɔ ɔ,eŋɛnyui lɔ kakaka gbe yi é dɔ́ ŋ ɖaɖa o. D'é dɔ́ ŋ ɖaɖa hɛnnɛ mɔ́ ma vayi so agbetɔ ŋununyanya nyɔwo kaka o. Éle nɛnɛ nɔ́ ŋgbé va ɖe gɔnmɛsese kpɔtɔ nɔ kliso cisosa lɔ o. ¹⁸ Nyao ɔ, eku ci yi kliso lɔ kú dó́́́ acisosa ji nyɔ nyi sukujeje hano le ŋmɛ nɔ amɛ ciwo yi bumɔ vɔ yi nyi Mawu ŋsɛn nɔ́ miwo ciwo yi le hwlɛngan mɔ́ ji. ¹⁹ Wo ŋwlɛndo Mawu nyɔ wema ɖeka mɛ mɔ́; "na gban ŋununyanya nɔ́ ŋununyatswo, yi a gu enudɛnyanya nɔ́ enudɛnyatɔwo" ²⁰ Wenɔnu ɖe, fini yi ŋununyatɔ lɔ a le ɔ ? Esedɔwatɔ lɔ ɖe ? fini yi xexe cɛ mɛ nyɔhwlɛntɔwo le ɔ ? Mawu ɖe ɖó asɛ mɔ́ xexe ce mɛ ŋununyanya nyi sukujeje ba? ²¹ Nɔ́ ci yi xexe lɔ mɛtɔwo de sɛ́n eŋyisɔ́ xexemɛ ŋununyanya sɔ jeshi Mawu le. Mawu ŋununyanya mɛ o ɔ, é dró mawu mɔ́ eye a soto enyɔ lɔ nunu koɖo axwa ci yi nyi suku nyɔ han o nɛ,yi a hwlɛn amɛ ciwo yi xɔɛ ji se ga? ²² Yuɖatɔwo biɔnɔ jeshiwo yi glɛkitɔwo jinɔ ŋununyanya. ²³ Miwo yɛ ɔ, kliso lɔ ci wo kćn dó́́ acisosa ji nú yi miwo xonɔ nuxu soso nɔ́ amɛwo koɖo axwa.Eku ci yi kliso lɔ kú dó acisosa ji hunnɔ yi nyi afɔklɛnnu nɔ́ yudatɔwo yi nyi suku nyɔ han o nɔ́ amɛmanyi yuɖatɔwo ²⁴ vɔ nɔ́ amɛ ciwo yi Mawu cán le yuɖatɔwo koɖo amɛmanyi yuɖatɔwo mɛ wowo ɔ, kliso lɔ nyi Mawu ŋsɛn koɖo Mawu ŋununyanya. ²⁵ Dó ɔ, ŋununyanya le Mawu sukujeje mɛ swu agbetɔwo ŋununyanya yi hlɔnhlɔn le Mawu klekle mɛ sɔwu agbetɔwo hlɔnhlɔn. ²⁶ Nɔvinyɛwo, mi kpɔ, lehan yi Mawu yɔ́ mí do ɖá ! Le agbetɔ nukpɔkpɔ mɛ ɔ, ŋununyatɔ nɛ, ŋsɛntɔ nɛ alo bubumɛ nɛ ɔ, sugbɔ de le mí mɛ o. ²⁷ Vɔ ɔ, Mawu can enu ciwo yi nyi suku nuwo le xexe lɔ mɛ yi a sɔ́ dó ŋkpɛn ŋununyatɔwo. Ecán enu ciwo yi kle le xexe lɔ mɛ yi a sɔ́ dó ŋkpɛn amɛ ciwo ɖó hlɔnhlɔn. ²⁸ Enu ciwo yi dyi enude kpoŋwo le xexe lɔ mɛ, enu ciwo yi wo gbalinɔ, enu ciwo yi de ɖó eta do enu nɔ xexe lɔ o ɔ, Mawu cán wo yi sɔ́ wo dó ahɛn enu ciwo yi xexe lɔ nú mɔ́ yi nyi enu. ²⁹ Nɛnɛ ɔ, agbetɔ ɖé d'á sɛŋ geze le Mawu ŋmɛ o. ³⁰ Keŋ ɔ, Mawu yi ná yi mí le Yesu Kliso mɛ. Kliso lɔ trɔ́ nyi ŋununyanya ci yi so Mawu gbɔ nɔ mi. Kliso lɔ ji Mawu to yi sɔ́ mi wa amɛjɔjɔɛwo, amɛɖedoakpowo koɖo amɛhwlɛnganwo. ³¹ E wɛɛ ahan shigbe lehan yi wo ŋwlɛ Mawu nyɔ wema ɖeka mɛ mɔ : " Nɔ́ amɛɖe a geze, le geze le Axwetɔ lɔ mɛ. "