¹ Tito, ci yi kan eo yɛ , kplan enu ciwo yi sɔ kodo enukplanplan nyuitɔ lɔ. ² Nu nɔ ŋsu shinshinwo nɔ wo a lenɔ wowo ɖekiwo nyuiɖe. wo ɖo yi a nyi amɛ ciwo nu yi wo a donɔ bubu yi wo ɖo yi a bunɔ tamɛ kpɔ gbɔxwe yi a xonɔ nuxu. Wo ɖo a sɛnŋ le xɔse, lɔnlɔ kodo jigbɔɖɛ blɛwu mɛ. ³ Nɛnɛke ɔ, kplan enu nyɔnu shinshinwo nɔ wo a nɔnɔ agbe shigbe amɛcancanwo nɛnɛ. Wo ŋgbe sɔ woɖekiwo dzo nɔ amɛnyɔ nunu kodo aha numu go. Wo le nanɔ ekplan nyuiwo amɛwo. ⁴ ( Nɛnɛ ɔ) Nɔ wo kplannɔ enu nyɔnuvi ciwo yi ɖe asu be wo le lɔn wowo 'suwo kodo wowo 'viwo. ⁵ Wo le lenɔ wowoɖekiwo nyuiɖe yi gbe nyi nyɔnu mɛiwo. Wo le lenɔ ebu nɔ axomɛ 'dɔwawawo yi a nyi nyɔnu nyuiwo nɔ wowo 'suwo yi a gbe senɔ etonu nɔ wo. Nɛnɛ ɔ amɛɖe d' kpɔ enyɔvɔn ɖe a nu so Mawo nyɔ lɔ nu go. ⁶ Nɛnɛ ke ɔ, do ŋsɛn lanmɛ nɔ ɖajɛviwo nɔ wo a lenɔ wowoɖekiwo nyuiɖe. ⁷ Le enushianu mɛ ɔ, eo, Tito ŋtɔ nyi kpodonu nɔ ɖajiɛvi kpɛtɛwo le enunyuiwawa mɛ. Le wao 'nukplankplan mɛ ɔ, nyi nyɔnɔnui nutɔ nɔ amɛwo a do bubu eo nu. ⁸ Wao nuxuwo le nyinɔ nuxu jɔjɔɛwo yi a gbe nyinɔ nuxu ciwo yi amɛɖe d'a sɛn eŋ do aci axɔ nɔ go. Gahɔnmɛ ɔ, amɛ ciwo yi kpe eta kodo mì d' va kpɔ enyɔ vɔnɖe yi a nu so mì nu go nɔ eŋu a kpɛn wo. ⁹ Amɛ ciwo yi hwashiwo le se etonu nɔ wo 'xwetɔwo le enushianu mɛ. wo le wa nɔ enu ci yi jɔnɔ eji nɔ wowo 'xwetɔwo yi wo ŋgbe dɔnnɔ enyɔ kpɔ kodo wo go ¹⁰ alo a finnɔ enuɖe le wo shi go. wo le ɖeɖeɛ dan sin tɛgbɛɛ be yewo nyi amɛkandojitɔwo. Nɛnɛ ɔ, wo a na yi Mawu, mì xɔnamɛtɔ lɔ ' nyɔ ci yi mì kplan kplan amɛwo a kɔ̀kɔ̀ le enu shia nu mɛ. ¹¹ Ɖo ɔ Mawu dansin lehanci yi e wa afenunuwo do. Afenu Hɔn mɛ yi agbetɔwo pleŋ a sɛn eŋ kpɔ xɔxɔ le nɛ. ¹² Afenu nɔn gbe kplankpplan enu mì be mìwo le gbe enu so wana vɔnwo kodo xixeɛ mɛ drowo gbɔ. Nɛnɛ ɔ, mì a sɛ eŋ lenɔ mìwo ɖekiwo yi a wanɔ enujɔjɔɛ yi a gbe nɔ agbe shigbe lehanci yi mawu dro do nɛnɛ. ¹³ Enu hunwo yi mì ɖo a wawa nɛ yi a sɔ le emɔ kpɔɔ nɔ nyɔna ŋkeke ci ji yi Yesu Kliso, amɛ ci yi nyi mìwo Mawugangankodo mìwo xɔnamɛtɔ, a va trɔ gbɔ yi a ze le yi klɛnklɛn gangan lɔ mɛ. ¹⁴ E sɔ yiɖeki na yi wo wui do mìwo 'ta keŋ yi ɖe mì ti le evɔn mɛ yi sɔ mì sɔ jukɔn mɛmi nɔ yiɖeki, jukɔn ci yi bianɔ ŋkuvi do edɔ nyuiwowawa nu. ¹⁵ Enyɔ hɔn ciwo yi ŋ ŋwlɛn ɖaɖa eo, wowo yi é ɖo a kplan amɛwo. Sɔ wao 'cɛkpakpa do ŋsɛn lanmɛ nɔ wao nysetɔwo yi a gbe sɔ gbe enyɔ nɔ wo. ŋgbe lɔn nɔ amɛɖekpokpoi a gbali eo go.