¹ Lehanci eŋɛnyui so Yesu Kliso, Mawu Eviɛ lɔ nú gɔnmɛjeje le do ge ² shigbe lehanci yí wo ŋwlii ɖɛ dó Mawu 'ŋɛdotɔ Ezayi wema mɛ do nɛnɛ ɔ, Mawu nu bé "na dɔ́ nyaŋ 'ŋɛdotɔ ɖaɖa keŋ nɔ́ á vayi dra emɔ dó ɖɛ nɔ́ eo. ³ Eŋɛdotɔ lɔ yí le axwa doɔ le zoxu sakli sakli ɖeka mɛ bé: "Mí dra mawu 'mɔ do, mí ɖe emɔ lɔwo nɔ́ wo a jɔ!" ⁴ Ahan yí Ʒan, amɛ ci yí wanɔ ʒinʒindotɔmɛ Mawutɔ nɔ amɛ to dó zogbe ɖeka mɛ do nɛ. É dodoɔ axwa yí nunuɔ be wo lé wa ʒinʒindotɔmɛ Mawutɔ a trɔ amɛɖeki a ji nɔ́ enuvɔnwosɔsɔke ⁵ ci yí ʒude 'kan mɛtɔwo koɖo ʒeluzalɛmu juganmɛtɔwo pleŋ se enyɔ cɛwo ɔ, wo vanɔ Ʒan gbɔ yí vá́ hunnɔ wowo 'nuvɔnwo mɛ le amɛshamɛ ŋmɛ yí Ʒan wanɔ ʒinʒindotɔmɛ Mawutɔ nɔ wo le ʒuludɛn 'tɔsasa lɔ mɛ ⁶ Ʒan donɔ awu ci yí wo sɔ́ esɔkpotɔnɔ 'fu lɔn. Kpablanu ci yí é bla ɔ gbaza yí wo sɔ wɛɛ. É ɖunɔ ejawo yi nunɔ enyishi ci wo ɖe le egbe mɛ do jí ⁷ Ʒan do axwa yí nunuɔ nɔ ahwakɔn lɔ bé : "Amɛ ci le godu nɔ́ ŋ yí gbɔ gbɔ ɔ sɛn eŋ sɔwu ŋ yí ŋ de je a ɖe yí fukpa 'kawo kpetii go. ⁸ Enyɛ ɔ, ʒinʒindotomɛ mawutɔ yí ŋ wa nɔ́ mí. Vɔ ɔ, eyɛ ɔ gbɔngbɔn kɔkɔɛ yí á sɔ lii nɔ mí" ⁹ Le ŋkeke hɔnwo jí ɔ, Yesu gbɔ so Nazalɛti, Galile 'kan kɔxwi ɖeka mɛ. Eyi Ʒan wa ʒinʒindotɔmɛ Mawutɔ nii le ʒuluɖdɛn 'tɔsasa mɛ. ¹⁰ Gacimɛ yí Yesu totoɔ lé eshi lɔ mɛ ɔ, é kpɔ jiŋkushi hun yí gbɔngbɔn kɔkɔɛ sɔ hwanlin nɔnɔmɛ yí ɖyi je ji. ¹¹ Eyi egbe ɖeka ɖyi só jiŋkushi bé "Eo yí nyí Evinyɛ vevi; eji jɔnɔ ŋ do eo nu." ¹² Zeɖeka vɔ ɔ, gbɔngbɔn kɔkɔɛ lɔ kplɔ́ Yesu yi zogbe ɖeka mɛ. ¹³ É nɔ zogbe lɔ mɛ ŋkeke eka yí Legba tii kpɔ. É le egbemɛ 'lanwo mɛ le zogbe lɔ mɛ yí Mawu dɔlawo va leleɛ ebu nii. ¹⁴ Ci yí wo lé Ʒan do gakpamɛ godu ɔ, Yesu va galile 'kan mɛ yí tɔ Mawu 'ŋɛnyui lɔ dodo nɔ́ amɛwo kodo axwa. ¹⁵ É nunuɔ nɔ wo bé: "Gamɛ ci yí Mawu ɖo lɔ sun yí jiŋkushi 'fiɔɖuɖu lɔ gogo vɔ. Mí trɔ míwoɖekiwo a ji keŋ a xɔ eŋɛnyui lɔ ji se!" ¹⁶ Ci yí Yesu zɔn Galeli 'xu 'tu yí vayigɔ ɔ, é kpɔ́ simɔ kodo nɔviɛ Anŋdre yí wo dada eɖɔ le axu lɔ 'tú. Ɖó ɔ, eɖɔdatɔwo yí wo nyí. ¹⁷ Yesu nu nɔ́ wo bé "Mí kplɔ ŋ do nɔ́ ma na nɔ́ mí a tɔ́ agbetɔ wo kplɔkplɔ gbɛ shigbe lehanci mí lenɔ kpaviwo gbɛ do nɛnɛ." ¹⁸ Zeɖeka ɔ, wo tashi wowo 'dɔwo ɖɛ yi so kplɔɛ do. ¹⁹ Ci yí Yesu zɔn yi ŋkɔ kankin ɔ, é kpɔ́ Ʒaki kodo nɔviɛ Ʒan ciwo yí nyí Zebede eviɛwo. Wo le etɔjihungangan mɛ hɛnnɛ yí le eɖɔwo dradogɔ. ²⁰ Zeɖeka vɔ Yesu yɔ wo. Eyi wo sogbe wowo 'da Zebede kodo yi lɛblɛdɔwatɔwo ɖɛ dó etɔjihungangan lɔ mɛ yí kplɔ Yesu do ²¹ Yesu kodo yi nukplanviwo vayi ɖo kafanawɔmu kɔkwimɛ. Le yuɖatɔwo gbɔngbɔngbe ɔ, Yesu ɖo Mawu sɛnxu yí tɔ́ enu kplankplan amɛwo. ²² Lehanci é kplankplan enu lɔ dó jí eŋ nɔ́ amɛwo. Ɖó ɔ, d'é kplinkplin shigbe esedɔwatɔwo nɛnɛ go. vɔ́ ɔ é kplinkplin kodo acɛ ²³ Gahɔnmɛ teŋ yí ŋsu ɖeka ci yí gbɔngbɔnvɔn ɖeka ɖeɖeɛ efun nɔ va ɖó mawusɛnxu lɔ mɛ nɛ. É tɔ́ axwa dodo ²⁴ bé "Nyi yí é jijiɛ a wa kodo mì ɔ, Yesu, Nzalɛtitɔ? Va è va mìwo 'kan gu gbe a ? Ŋ nya amɛ ci yí è nyi; eo yí nyí Amɛ kɔkɔɛ ci yí Mawu dɔ́ ɖaɖa!" ²⁵ Yesu je adam do gbɔngbɔnvɔn lɔ bé: "kaba bɔ enu yí a tó le ŋsu lɔ mɛ!" ²⁶ Eyi gbɔngbɔnvɔn lɔ hanhun ŋsu lɔ kodo ŋsɛn yí dó axwa cícící yí tó le mɛ ²⁷ É yí eŋ nɔ́ amɛshamɛ yí wo biɔbiɔ wowonɔnɔwo se be: "vɔ ɖee, nyi yí nyí enu lɔ yí jɔjɔ ɔ? Enu yoyu yí amɛ cɛ kplankplan kodo acɛ; hée! É ɖeɖeɛ egbe do gbɔngbɔnvɔnwo jí yi wo sisiɛ nii." ²⁸ Eyi zeɖeka ɔ, amɛshamɛ tɔ nuxu xoxo so lehanci yi Yesu wawa edɔ do nu le galile 'kan lɔ kekeŋ mɛ ²⁹ ci yí wo só le Mawusɛnxu lɔ zeɖeka ɔ, wo yi simɔ kodo anŋdre 'xwe mɛ. Ʒaki kodo Ʒan yi kodo wo hɛnnɛ. ³⁰ Wo nú nɔ́ Yesu be nɛnɛ yí vuvɔfu wawa simɔ ashɛnɔ kaka yi mlɔ́ anyi nɛ. ³¹ É tegogoi yí le alɔnu nii yí fɔin tɔ́ ete. Eyi vuvɔfu lɔ mi nii yí é xɔ wo mɛdru. ³² Fiɛshi, ci yí ewe yi exɔ ɖegbɔ ɔ amɛwo kɔ́ edɔnɔwo kekeŋ kodo amɛ ciwo mɛ yí gbɔngbɔnvɔnwo le va yesu gbɔ ³³ kafanawɔmu juganmɛtɔwo keŋkeŋ bɔdo Simɔ kodo Anŋdre 'xwe lɔ 'gbonu. Yesu da edɔ vovovowo nɔ́ edɔnɔ sugbɔ. Ahan lɔ ké yi é gbe nya gbɔngbɔnvɔn sugbɔ toi le amɛwo mɛ nɛ. ³⁴ Yesu de ná ŋmɛ gbɔngbɔnvɔn ɖé be yi le xo nuxu go. Ɖo ɔ, gbɔngbɔnvɔn lɔwo nyá amɛ ci ŋmɛ yí é nyi. ³⁵ Le i ŋkegbu fɔnfɔnmɛ do gacimɛ yi wo d'a kpɔ́ amɛ a jeshi ga ɔ, Yesu fɔn yí tó le Galile 'kan lɔ mɛ yí kpé afi jiji ɖeka ci yi amɛɖe de sɔ o. Ci yi é voyi ɖo ehɔn lɔ é tɔ́ gbedoɖa wawa. ³⁶ Simɔ kodo yi kpenawo vayi tɔ Yesu jiji kpɔ́. ³⁷ Ci yí wo vayi kpɔɛ ɔ wo nú nii be: "Amɛwo pleŋ jiji eo." ³⁸ Vɔ ɔ, Yesu ɖoŋci nɔ́ wo be : "mì na nɔ mì a yi afibuwo le kɔxwi ciwo yí trɔdo mì mɛ hɛnnɛ, nɔ́ ma vayi do eŋɛnyui lɔ kodo axwa. Ɖó ɔ, eyi ŋci yí ŋ to dó́." ³⁹ Ahan yi Yesu ɖyi esa to galile 'kan lɔ kpleŋ mɛ nɛ. E nunu ɔ Mawu 'nyɔ kodo axwa le Mawu sɛnxuwo yi nyanya gbɔngbɔnvɔnwo toi le amɛwo mɛ. ⁴⁰ Ekponɔ ɖeka vá je ekloji dó akɔnmɛ nɔ Yesu yí ɖe kuku nii be: "Nɔ è lɔn ɔ; à sɛ́n eŋ ná yí gbazamɛ a kɔ nɔ ŋ." ⁴¹ Yi 'nu wa ɖeka nɔ́ Yesu yí é vlu alɔ tɔɛ yi nu nii be: "ŋ lɔn, edɔ lɔ lé mí nɔ́ eo!" ⁴² Ci yi Yesu nu nɛnɛ zeɖeka vɔ, ekpo 'dɔ lɔ mí nɔ amɛ lɔ yi gbazamɛ kɔ nii ⁴³ Eyi Yesu nyui kodo adan zeɖeka be yi lé só yi, ⁴⁴ yi nu nii be "kpɔ́ nyuiɖe, ŋgbè vayi nu enu ci yi ŋ wa nɔ eo nɔ amɛɖe go. Gankegan ɔ, yì avɔsatɔ lɔ gbɔ́ keŋ a sɔ́ eoɖeki dansin nii yí a gbe wa enunana shigbe lehanci yí mɔyizi nui dó daɖɛ nɛnɛ. É yí a nyi kunuɖeɖe nɔ amɛwo be edɔ lɔ mí nɔ́ eo." ⁴⁵ É yi ŋsu lɔ soyi. Vɔ le i godu ɔ, é va yi tɔ le hanci yi Yesu da edɔ nii do nunu kodo axwa nɔ́ amɛwo le afishiafi. É yi na taɖo Yesu de gbe sɛn eŋ tó yigɔ jugan ɖe mɛ go. É cí azɔge, fini ciwo yí amɛwo de le o, yí amɛwo só texwe vovovowo yí vava gbɔ."