¹ Ci yí gbɔngbɔngbe ŋkeke lɔ vayi vɔ, kuɛshilagbe nyidin ɔ, Mali Magidalatɔ kodo Mali eɖetɔlɔ yigɔ yɔdu lɔ kpɔ́ gbé. ² Eyi zeɖeka vɔ, nyigban hunhun sugbɔ yi Mawu dɔ la ɖekadyi so jiŋkushi yi vá bli ekpe lɔ só enu nɔ yɔdu lɔ yí nɔ anyinɔnɔ do ji. ³ Mawu dɔla lɔ nɔnɔmɛ klɛn shigbe ejiɖe gbe nɛnɛ yí yi wu ɣé shigbe ɖeci nɛnɛ. ⁴ Vɔnvɔn ɖó sɔja ciwo yi cɔcɔ yɔdu lɔ yi wo tɔ́ hunhunhun yí vá cí gbɛɖɛɛ shigbe 'mɛkukuwo nɛnɛ. ⁵ Eyí Mawudɔla nú nɔ́ nyɔnu lɔwo be: "Mí ŋgbe vɔn go. ŋ nya be Yesu, amɛ ci wo kán dó acisoga ji jiɛ yí mí le. ⁶ D'é le yɔdu lɔ mɛ go. É fɔ́n so ekuwodi shigbe lehanci yí é nui daɖɛ dó nɛnɛ. Mí vayi kpɔ fini ci wo sɔ́ mlɔ sasa ɖá. ⁷ Mí vayi nunɔ́ yi nukplanviwo kaba be yi fɔ́n so ekuwodi. Á le ete kpɔ mí le Galile 'kan mɛ. Hɔntɔxu ui mí kpɔ́ɛ le nɛ. Enyɔ ci yi le ŋ shi yí ŋ jijiɛ a nú nɔ́ mí nɛ." ⁸ Eyi bléŋ ɔ, wo só le yɔdu lɔ gbɔ́. wo caka le susu mɛ gankegan eji gbe jɔjɔ wo yí wo shí eju kpe Yesu nukplanviwo gbɔ a vayi do eŋɛ lɔ nɔ wo. ⁹ Zeɖeka vɔ, Yesu va dó ego wo yí dó egbe nɔ wo. Eyi nyɔnu lɔwo tegogoi yi lé afɔwo nii yí doŋdo nii yí siin. ¹⁰ Eyi Yesu nu nɔ́ wo bé : "Mí ŋgbe vɔn o. Mí nu nɔ́ nɔvinyɛwo bé wo lé yi galile 'kanmɛ. Hɔntɔxu yí wo a kpɔ́ ŋ le nɛ." ¹¹ Ci yí nyɔnu lɔwo le emɔ jí yí yigɔ ɔ, sɔja ciwo yí cɔcɔ Yesu yɔdu lɔwo domɛtɔ ɖekawo gbɔva jugan mɛ yi vá nú lehanci yí enyɔ lɔwo jɔ do nɔ́ avɔsatɔwo 'gawo. ¹² Eyi avɔsatɔwo 'gawo vá dó ego kodo mɛganwo yí wo sɔ́ gbeta be yewo a ná eho gangan ɖeka sɔjawo ¹³ yí a nú nɔ wo be: "Mí nu bé hwecinu yí yewo le alɔn dɔn ɔ, ŋsu lɔ nukplanviwo vá yí fin yi 'cɔ́ ezanmɛ. ¹⁴ Nɔ́ ekanjikpɔtɔ vá seɔ, mí wɛɛ kaka á xɔ egbe do mìwo 'nyɔ ji nɔ́ ŋgbé wa enuɖe kodo mí go." ¹⁵ Sɔja lɔwo xɔ eho lɔ yí wa do enyɔ ciwo yí wo nú nɔ́ wo jí. Eyi enyɔ hɔn kankan do yuɖatɔwo mɛ yí gbe li egbɛegbɛ viɛ. ¹⁶ Yesu nukplanvi wiɖeka lɔwo yi galile 'kan mɛ le eto ci ji yí Yesu nu nɔ́ wo sasa. ¹⁷ Ci yí wo kpɔ́ɛ ɔ, wo doŋdo nii. Vɔ ɔ, amɛɖewo le wo 'mɛ ci de kandoji bé Yesu yɔ go. ¹⁸ Eyi Yesu tegogo wo yí nú nɔ́ wo bé: "Mawu sɔ́ ŋsenwo pleŋ jó nɔ́ ŋ le jiŋkushi kodo nyigban jí. ¹⁹ Mí yi jukɔnwo pleŋ mɛ yí a ná nɔ́ amɛwo a trɔ́ nyaŋ nukplanviwo. Mí do Mawu shi 'ta nɔwo le Eda kodo Evi kodo Gbɔngbɔn kɔkɔɛ nyikɔ mɛ. ²⁰ Yí a kplan enu wo nɔ́ wo a wa do egbe ciwo yí ŋ ɖe nɔ mí ji. Enyɛ yɛ ɔ, ŋ le kodo mí kaka sɔyi xexe lɔ 'nuwuwu."