¹ Le hwehɔnwonu ɔ, Hlɔmu 'fiɔgangan seza Woguisi ɖe gbeta tii be wo le hlɛn ame kpɔ to Hlɔmu 'fioɖuxu 'junyigban gangan lɔ pleŋji. ² Wo wa amɛhlɛnhlɛn 'dɔ ŋkɔtɔ cɛ do gacimɛ yi kiliniwusi nyi sili 'kanjikpɔtɔ. ³ Amɛshiamɛ yiyiɛ yi ŋtɔ ju mɛ yi vayi na nyikɔ yi wo sɔ dodoɔ wema mɛ. ⁴ ʒozefu can je emɔ sé Nazalɛti jugan mɛ le ʒude 'kan mɛ. Jugan hɔn mɛ yi efiɔ Davidi so nɛ. ɖo Davidi jijimɛviwo domɛtɔ ɖeka yi é nyi ⁵ Yi Kodo nyɔnuvi, Mali ci yi le efu yi vá jugan lɔ mɛ yi a va na nyikɔ. ⁶ Hwecinu yi wo le Bɛtɛlɛhɛmu jugan lɔ mɛ ɔ, azan va sun nɔ Mali yi a ji. ⁷ Eyi é ji evi ŋsuvi deka, eviɛ ŋkɔtɔ. É sɔ eɖo trodoi yi va sɔ yi mlɔ elanwo 'nuɖuɖugban mɛ; ɖó ɔ, wo de kpɔ texwe le exɔ lɔ mɛ go. ⁸ Lankukplɔtɔ ɖekawo le ekan hɔn lɔ ke mɛ yi le ezan cɔ ɔ, le wowo lankuwo gbɔ le nukanwo mɛ ⁹ Zeɖeka vɔ, Mawudɔla ɖeka va ze do wo ji yi Mawu klɛnklɛn kɔ pewleŋ do fini ci yi wo le lɔ. Eyi vɔnvɔn gangan ɖeka ɖó wo. ¹⁰ Vɔ ɔ, Mawudɔla lɔ nu nɔ wo be : "Mi ŋgbe vɔn go; ɖó ɔ, eŋɛnyui ɖeka ci yi a do jijɔ gagan nɔ jukɔn lɔ pleŋ dó gbé yi ŋ va nɔ mi. ¹¹ Egbɛ cɛyɛ ɔ, wo ji Honametɔ ɖeka nɔ mi le jugan Daviditɔ mɛ É́ yi nyi Kliso, Axwetɔ lɔ. ¹² Enu ci yi mi a kpɔ yi sɔ do jeshii yi nyi be mi a va kpɔ vefin ɖeka ci yi wo sɔ eɗo trodo yi sɔ mlɛ elanwo 'nuɖugban mɛɔɔ ¹³ Zedeka vɔ, wo kpɔ jiŋkushi 'hwakɔn metɔ sugbɔ ɖekawo va bɔdo Mawudɔla lɔ ci yi vá dó eŋɛ nɔ wo nu yi wo tɔ́ Mawu kafukafu yi nunuɔ be : ¹⁴ ''Wo a kafu Mawu ci yi le eji boo yi fafa lé vá nyigban ji nɔ amɛ ciwo yi Mawu lɔnnɔ.'' ¹⁵ Gacimɛ yi Mawudɔla lɔwo so le lankukplɔtɔ lɔwo gbɔ yi trɔkpe jinkushi ɔ, lankukplɔtɔ lɔwonú nɔ wowonɔnɔwo be : ''Nɔ é le nɛnɛ mi na nɔ mì a yi Bɛtɛlɛhɛmu jugan lɔ mɛ yi a yi Mawu dansin nɔ mì lɔ.'' ¹⁶ Eyi wo ɖe eblɛ yí vayi kpɔ Mali kodo ʒosɛfu kodo vefin lɔ yi sɔ mlɛ anyi do lankuwo 'nuɖugban mɛ. ¹⁷ Ci yi wo kpɔ vefin lɔ ɔ, wo nu enyɔ ciwo yi Mawudɔla lɔ nu nɔ wo so nu nɔ amɛwo. ¹⁸ É jijiɛ eŋ nɔ amɛ ciwo pleŋ yi seseɛ enyɔ ci yi lankukplɔtɔ lɔwo nunuɔ. ¹⁹ Mali enyɔ hɔn lɔwo pleŋ do susu mɛ yí bubuɔ tamɛ kpɔ so wo nu haan. ²⁰ Lankukplɔtɔ lɔwo trɔ yí kpe wowo nɔxu yi le lehanci yi Mawu gangan do nuɔ yi kakafui do enu ciwo pleŋ yi wo se yi gbe kpɔ ŋci. Ðó ɔ, enu lɔwo pleŋ vayi do lehanci yi Mawudɔla lɔ doŋkɔ yi vá núi nɔ wo dó ji. ²¹ Ci yi wo ji devi lɔ, yi ŋgenyi mɛ ɔ, wo vá yi a vá so evo nii. Wo sɔ nyikɔ nii be Yesu shigbe lehanci yi Mawudɔla lɔ doŋkɔ yi núi nɔ Mali gbɔxwe yi a va fɔ efu lɔ do nɛnɛ. ²² Gacimɛ yí wo ɖo a wa eɖyiklɔklɔ 'kɔnu ci yi ese ci yi Mawu sɔ to Mɔyizi ji nɔ wo nú be wo le wa va ɖo ɔ, Ʒosefu kodo Mali hɛn ɖevi lɔ vayi Mawuxwe le Ʒeluzalɛmu yi a sɔ dansin nɔ Mawu. ²³ Wo ŋwlɛ daɖɛ do Mawu 'se wema mɛ be : ''wo ɖo a sɔ evi ŋsuvi ŋkɔtɔwo pleŋ ci yi wo ji le xomu ɖeka ɖeka mɛ sɔ ɖo akpo nɔ Mawu.'' ²⁴ Wo ɖó a sɔ́ xlexu amɛve alo hwanlivi amɛve sɔ sa avɔ hɛnnɛ shigbe lehanci yí Mawu 'se lɔ nui do nɛnɛ. ²⁵ Ŋsu ɖeka le Ʒeluzalɛmu hwehɔnwonu. Wo yɔɛni be Simɔ. Amejɔjɔɛ yi é nyi. É nɔnɔ egbe ji nɔ Mawu yi kpɔkpɔ emɔ nɔ lehanci yi Mawu a vá fá akɔ nɔ Israyɛli jukɔn lɔ dó. ²⁶ Gbɔngbɔn kɔkɔɛ nu nii vayi daɖe be Kliso ci yi Mawu a va ɖo ɖaɖa lɔ yi yi a kpɔ gbɔxwe yi a ku. ²⁷ Mawu Gbɔngbɔn lɔ kplɔkplɔ Simɔ yi é va Mawuxwe lɔ mɛ. Eyi gacimɛ yi evida lɔ kodo evinɔ lɔ hɛn Yesu va yi a wa akɔnu ciwo yi Mawu 'se lɔ na egbe be wo le wa nii ɔ, ²⁸ Simɔ xɔɛ do yi 'lɔwo mɛ yi do akpe nɔ Mawu yí nu be : ²⁹ ''Ecɛyɛ ɔ, Mawu, è wa do egbe ci yi è ɖo nɔ enye, ao, dɔwavi jí. Ðè emɔ nɔ̀ ma yi le fafa mɛ shigbe lehanci yi è nui do nɛnɛ. ^{30 31 32} Ðó ɔ, nyaŋ ŋkuviwo kpɔ ao xɔxɔ ci è hɛn vɛ nɔ mi lɔ. È ɖo xɔxɔ hɔn lɔ 'gbe, yi drɛɛdo dɛ́ nɔ́ jukɔnwo pleŋ. É yi nyi klɛnklɛn ci yi a kɔ yí a dansin eo, Mawu nɔ jukɔn manyi Yudatɔwo keŋkeŋ yi a gbe na ŋcikɔkɔɛ ao jukɔn, Israyɛli'' ³³ Enyɔ ciwo Simɔ nunuɔ do ɖevi lɔ nu kpaca ɖevi lɔ edalɔ kodo enɔlɔ sugbɔ. ³⁴ Simɔ yira wo. Le i godu mɛ ɔ, é nu nɔ Mali, Yesu 'nɔlɔ be : ''Mawu cán ɖevi hɔn lɔ daɖɛ nɔ Israyɛlivi sugbɔ a to ji yi a jannyi yi sugbɔ a gbe to ji yi a fɔn. Á va jeshi ci yi so Mawu gbɔ́ yi agbetɔwo a gbé. ³⁵ À klɛn do susu ciwo yi amɛ sugbɔ ɖeɖeɛ yi amɛ sugbɔ le do wowo 'ji mɛ ji. Vɔ eo Mali yɛ ɔ, à vá se vevi sugbɔ shigbe wo tɔ dekpui ɖaɖɛ eji nɔ eo nɛnɛ. ³⁶ Nyɔnu Mawu 'ŋɛdotɔ deka can le Ʒeluzalɛmu ehɔntɔxu lɔ. Wo yɔɛni be Ana Fanuwɛli ci yi so Asɛ 'kɔta mɛ eviɛ yi é nyi. Éku nyoxo haan. Gacimɛ yí é hun cugbejɛ ɔ, wo sɔ na asu. Vɔ ci yi wo ɖe nɔnɔ kaka é wa exwe amadrɛ godu ɔ, asuɔ lɔ ku. ³⁷ Eyi so gahɔnmɛ ɔ, é trɔ kposhi amɛ bu ɖe maɖe kaka va ɖoɖoɔ exwe ekave honɛ. D'é tenɔ so Mawxwe lɔ nu go. É va sennɔ Mawu ezan kodo kede yi blanɔ enu yi donɔ egbeɖa nɔ Mawu. ³⁸ Eye can va ɖoɖoɔ Mawuxwe lɔ mɛ ahan dó gacimɛ pɛpɛpɛ yi Yesu jilawo sɔ dandan sin nɔ Mawu dó yi tɔ akpe dodo nɔ Mawu. É gbe tɔ nuxu xoxo so devi lɔ nu nɔ́ amɛ ciwo pleŋ yi le emɔ kpɔɔ nɔ lehanci yi Mawu a va xɔ nɔ Ʒeluzalɛmu do. ³⁹ Gacimɛ Yesu 'dalɔ kodo enɔlɔ enu lɔwo pleŋ shigbe lehanci yi Mawu 'se lɔ ji so wo gbɔ do nɛnɛ degbɔ ɔ, wo trɔ kodoi yí yi Nazalɛti, jugan ci mɛ yi wo nɔnɔ le Galile 'kan mɛ. ⁴⁰ Ðevi lɔ shinshiɛn yi le agan kpɔ. É ɖɔ kodo Mawu ŋununyanya yi Mawu gbe wa afenu nii. ⁴¹ Exwekpekpe ɖeka dúú ɔ, Yesu 'dalɔ kodo enɔlɔ yinɔ Ʒeluzalɛmu jugan mɛ yi vayi ɖunɔ A tadodoamɛxwe ⁴² ci yi Yesu ɖo exwe wive ɔ, wo kplɔe vayi shigbe lehanci yí é nyi akɔnu nɔ wo yi wo wanɔ nɛnɛ. ⁴³ Gacimɛ yi wo ɖu exwe lɔ ɖegbɔ ɔ, Yesu 'dɔlɔ kodo enɔlɔ trɔ kpe axwe. Yesu ɖevihwɛ lɔ yɛ ci Ʒeluzalɛmu. Vɔ ɔ, kpɔ wowo le ŋkuvi do nu go. ⁴⁴ Wo bu nɔ be yi le amɛ yi bɔ zon kodo yewo me. Wo zon emɔ lɔ ŋkeke ɖeka yi sɔ jijiɛ kpɔ le wowo 'mewo kodo le wowo 'xlɔwo gbɔ. ⁴⁵ Vɔ ɔ, wo de kpɔɛ go. Eyi wo trɔva Ʒeluzalɛmu yi kpɔtɔ yi jijiɛ kpɔ. ⁴⁶ Yi nyisɔ mɛ ɔ, wo va sɔ yi kpɔ le Mawuxwe lɔ mɛ yi é le anyinɔnɔ le esedɔwatɔwo dodomɛ yi ɖoɖoɔ eto wo yi gbe biɔbiɔ enyɔwo se. ⁴⁷ Lehanci yi é ɖoɖoɔ enyɔ lɔwo ŋci do kpakpa ca amɛ ciwo pleŋ yi seseɛ doŋci ciwo yi é nanaa. ⁴⁸ Hwecinu yí edalɔwo va kpɔɛ ɔ, é wu enu wo. Eyi enɔlɔ nu nii be : ''Evi, nyi yi jɔ yi e wa nɛnɛ kodo mì ɔ ? Kpɔ́ ɖa ! Enyɛ kodo Edao mì le jikasoi ji yi jijiɛ eo kpɔ.'' ⁴⁹ Vɔ ɔ, é ɖoŋci nɔ wo be : ''Nyi yi jɔ taɖo mi yi mi jijiɛ ŋ kpɔ ɔ ? Mi de nya be ŋ ɖo a le edanyɛ 'xwemɛ ba ?'' ⁵⁰ Vɔ ɔ, edalɔ kodo enɔlɔ de se enyo lɔ ci yí é́ nu nɔ ́wo gɔnmɛ go. ⁵¹ Le i godu ɔ, Yesu trɔyi Nazalɛti kodo wo. É seseɛ etonu nɔ wo. Enɔlɔ kpɔtɔ le enu lɔwo ciwo yi jɔ do tamɛ. ⁵² Yesu shinshiɛn ŋnunya gbe jeje ŋununyanya ji nii. Yi nu kpé nɔ Mawu yi gbe kpekpeɛ nɔ agbetɔwo sugbɔ.