¹ Le gɔnmɛjeje lɔ mɛ ɔ, Enyɔ lɔ li. Enyɔ lɔ li kodo Mawu yí Enyɔ lɔ nyí Mawu. ² Eyi so gɔnmɛjeje lɔ mɛ ɔ, Enyɔ lɔ li kodo Mawu. ³ Mawu wa enuwo pleŋ sɔto Enyɔ lɔ jí yí d'é wa enuɖe Enyɔ lɔ manɔ mɛ go. ⁴ É yí mɛ yí agbe le yí agbe lɔ nyí klɛnklɛn ci yí nanɔ yí agbetɔwo kpɔnɔ enu. ⁵ Klɛnklɛn lɔ kɔdo fini ci yí vivici do le. Vɔ ɔ, vivici lɔ de sɛ́n eŋ yí wa enuɖe nii go. ⁶ Mawu dɔ́ amɛɖeka ɖaɖa. Wo yɔɛni bé Ʒan. ⁷ Ʒan va shigbe kunuɖetɔ nɛnɛ yí a vá ɖe kunu so klɛnklɛn lɔ nú nɔ́ sɔ́ to yí kunuɖeɖe lɔ mɛ ɔ, amɛ shamɛ a xɔ klɛnklɛn lɔ jí se. ⁸ D'é nyi Ʒan yí nyi klɛnklɛn lɔ go. Vɔ ɔ, é vá yí a vá ɖe kunu nɔ klɛnklɛn lɔ yɔ́. ⁹ Enyɔ lɔ ci yí nyí Klɛnklɛn adoduitɔ lɔ ci yí klɛnklɛn nɔ́ agbetɔwo. É vá xexe lɔ mɛ. ¹⁰ Enyɔ lɔ le xexe lɔ mɛ sasa.Mawu wa xexe lɔ sɔto jí. Gankegan ɔ xexemɛtɔwo de jeshii ɖɛ go. ¹¹ É vá yitɔwo mɛ yí yitɔwo de xɔɛ go. ¹² Vɔ ɔ, amɛ ciwo yí xɔɛ ji se ɔ, & ná acɛ wo nɔ́ wo a trɔ́ Mawu eviɛwo. ¹³ D'é nyí ehunmɛvi yí wo nyi go; d'é nyí ŋcilan 'dro mɛ yí wo ji wo so go; d'é nyí agbetɔ yí ɖó edro yí ji wo go. Vɔ ɔ Mawu ŋtɔ yí lɔn yí sɔ́ wo wa eviɛwo. ¹⁴ Enyɔ lɔ vá trɔ́ agbetɔ yí vá nɔ mìwo domɛ; xomɛvunuwawa kodo nyɔnɔnuitoto mɛ yí é le koŋ. Mì kpɔ́ yí kɔkɔ gangan lɔ, kɔkɔ gangan ci yí Evi akogu lɔ xɔ so Edalɔ gbɔ́. ¹⁵ Ʒan ɖe kunu so nú yí do axwa bé: «Eyɛ nú ŋ xo nuxu so bé: "amɛɖeka le ŋgbe nɔ́ ŋ yí gbɔgbɔ. Vɔ ɔ, é nyí mɛgan nɔ́ ŋ. Ɖo ɔ, é li xoxoxo gbɔxwe na vá jɔ́» ¹⁶ Mì pleŋ xɔ yi dɔkunuwo yí é wa xomɛvunu nɔ́ mì eɖe kplɔ eɖe do. ¹⁷ Mawu ná ese mì sɔto Mɔyizi ji. Vɔ ɔ é wa xomɛvunu nɔ́ mì yí gbe ɖe nyɔnɔnui lɔ mɛ nɔ mì sɔto Yesu Kliso ji. ¹⁸ Amɛɖekpokpoi de kpɔ́ Mawu kpɔ́ go. Vɔ Eviɛ akogu lɔ ci yí nyí Mawu yí nɔnɔ Mawu Eda 'kɔnmɛ ɖekɛ yi dansin amɛ ci yí Mawu nyí nɔ́ m̀. ¹⁹ Kunu ci yí Ʒan ɖe ge: É ɖe nɛnɛ kunu hwecinu yí Yuɖazalɛmu 'gá ciwo yí le Ʒeluzalɛmu jugan mɛ dɔ avɔsatɔ kodo Levi jijmɛviwo ɖaɖa gbɔ́ nɔ́ wo a vayi biɔɛ se be mi yí mɛ. ²⁰ Ʒan xɔ egbe do jí; d'é gbe go; é xɔ egbe do jí be: «Ŋ de nyí Kliso go.» ²¹ Wo biɔ́ɛ se be: « Mi è nyi téŋ ɔ? Eo yí nyí Eli a?» Ʒan ɖoŋci nɔ́ wo bé: « Oo, ŋ de nyí go.» Wo gbe biɔɛ se be: «Eo yí nyí Mawu 'ŋɛdotɔ lɔ a?» Ʒan ɖoŋci nɔ wo bé: «Oo». ²² Eyi wo vá biɔ́ɛ se be: «ucucu ɖee, mi è nyi ɔ? Mì ɖó a hɛn enyɔ ɖeka yi nɔ amɛ ciwo yí dɔ́ mì ɖaɖa. Mi è nunɔ bé ye nyí ɔ?» ²³ Ʒan ɖoŋci nɔ́ wo bé: Enyɛ yí nyí «amɛ ci yí le axwa doɔ le zogbeji be: "Mi dra Axwetɔ 'mɔ dó nɔ́ á jɔ́."» nɛnɛ yí Mawu 'ŋɛdotɔ Ezayi nui dó vayí nɛ. ²⁴ Falisitɔ ɖekawo le amɛ ciwo yí wo dɔ́ ɖaɖa Ʒan gbɔ mɛ. ²⁵ Wowo vá biɔ Ʒan se ke bé: «Ci yí d'è nyí Klisolɔ go, d'è nyí Eli go yí d'è nyí Mawu 'ŋɛdotɔ lɔ go ɖee, nyi yí ná taɖo yí è wawa ʒinʒindotɔmɛ mawu tɔ nɔ amɛwo ɔ? ²⁶ Ʒan ɖoŋci ń wo bé: «Enyɛ yɛ ɔ, eshi yí ŋ sɔ wawa ZinZindotɔmɛ Mawu tɔ nɔ amɛwo. Vɔ ɔ amɛɖeka le mí mɛ, yí mí de nyá amɛ ci ŋmɛ yí é nyi go. ²⁷ É le godu nɔ́ ŋ yí gbɔgbɔ. Vɔ ɔ, ŋ de je a ɖe yi fɔkpa 'kawo le afɔ nii kpetii go. » ²⁸ Enu hɔnwo pleŋ jɔ le Betani kɔxwimɛ le Ʒuluden 'tɔsasa lɔ godu fini ci yí Ʒan ʒinʒin amɛwo do tɔmɛ le nɛ. ²⁹ Le i ŋkegbu ɔ, Ʒan kpɔ yí Yesu gbɔgbɔ gbɔ. Eyi é nu bé: «Mí kpɔ ɖá! Mawu lɛngbɔvi ci yí vá cucu xixe lɔ 'nuvɔnwo si ge. ³⁰ É yí nú yí ŋ xo nuxu so be: "Amɛɖeka le godu nɔ́ ŋ yí gbɔgbɔ. Vɔ ɔ é nyí Mɛgan xoxu nɔ́ ŋ. Ɖo ɔ, é li xoxoxo gbɔxwe na vá jɔ". ³¹ Enyɛŋtɔ ɔ, ŋ de jeshii sasa go. Vɔ ɔ, ŋ va sɔ eshi leleɛ Mawushi nɔ amɛwo keŋ a dansin yí nɔ Israyɛliviwo nɔ́ wo a jeshii.» ³² Ʒan ɖe kunu be: «Ŋ kpɔ yí Gbɔngbɔn kɔkɔɛ sɔ hwanlin nɔnɔmɛ so jiŋkushi yí ɖyi je ji. ³³ Ŋ de jeshii sasa go. Vɔ ɔ, Mawu ci yí dɔ́ ŋ ɖaɖa yí ŋ va wawa ʒinʒindotɔmɛ Mawu tɔ nɔ amɛwo nu nɔ ŋ be: "À vá kpɔ́ yí gbɔngbɔn kɔkɔɛ a ɖyi yí a je do ŋsu ɖeka ji. Ŋsu lɔ yí a vá sɔ gbɔngbɔn kɔkɔɛ le Mawushi nɔ amɛwo." ³⁴ Enyɛŋtɔ ŋ kpɔ dó enu lɔ jí nɛnɛ yí ɖe kunu be ŋsu hɔn lɔ nyí Mawu Eviɛ.» ³⁵ Le i ŋkegbu ɔ, Ʒan gbe va ehɔn lɔ ké kodo yi nukplanviwo domɛtɔ amɛve. ³⁶ Ci é kpɔ yí Yesu zɔn vayigɔ ɔ, é nu bé: «Mí kpɔ ɖá! Mawu lɛngbɔvi lɔ ge!» ³⁷ Ci yí Ʒan nukplanvi amɛve lɔwo se enyɔ lɔwo nɛnɛ, wo só yí kplɔ Yesu do. ³⁸ Yesu trɔ kpɔ́ godu yí kpɔ́ bé wo kplɔeye do. Eyi é biɔ wo se be: «Nyi yi mí jijiɛ ɔ?» Wo ɖoŋci nii bé «Fini yí è nunɔ Hlabi?» Hlabi gɔnmɛ yí nyi be: «Cicagan.» ³⁹ Yesu ɖoŋci nɔ́ wo bé:«Mí va yí a kpɔɛ.» wetrɔmɛ do ganɛ mɛ han nu yí wo wawa enu lɔ dó. Eyi wo kplɔ Yesu do yí vayi kpɔ fini ci yí é nɔnɔ yí ci gbɔ gbehɔngbe. ⁴⁰ Ʒan nukplanvi amɛve ciwo yí se enyɔ ci yí Zan nu yí kplɔ Yesu do domɛtɔ ɖeka tɔ be Anŋdre. Simɔ Piyɛ nɔviɛ yí é nyi. ⁴¹ Amɛ ŋkɔtɔ ci yí Anŋdre vayi do ego nyi fofoɔ Simɔ. É nú nii bé: «Mì kpɔ́ mɛsiya lɔ.» Mesiya gɔnmɛ nyi be: «Kliso lɔ.» ⁴² Eyi é kplɔ Simɔ yí Yesu gbɔ . Yesu gloi kpɔ yí nu nii bé: « Eo yí nyí Simɔ, Ʒan eviɛ. Vɔ ɔ, wo a vá tɔ́ eo yɔyɔ bé kéfasi». Kefasi hɔnmɛ yí nyi be: «Ekpegbaja.» ⁴³ Le i ŋkegbu ɔ, Yesu sɔ gbeta be ye a yí galile 'kan mɛ. É do ego Filipu yí nú nii bé: «Kplɔ́ ŋ do.» ⁴⁴ Filipu lɔ só Bɛtisayida, kɔxwui ci mɛ Andre kodo Piyɛ can só. ⁴⁵ Le i godu ɔ, Filipu vayi kpɔ Natanayɛli yí nú nii bé: «Mì kpɔ amɛ ci nu yí Mɔyizi xo nuxu so le Ese wemawo mɛ yí Mawu 'ŋɛdotɔwo cán gbe xo buxu so bú lɔ. Yesu Nazalɛtitɔ, Ʒozɛfu eviɛ yɔ.» ⁴⁶ Eyi Natanayɛli nu nɔ Filipu be: Enunyui ɖé a sɛ́n eŋ tó so Nazalɛti kɔxwimɛ a ? Filipu nu nii be: «Vá kpɔ ɖá!» ⁴⁷ Gacimɛ yí yesu kpɔ Natanayɛli yí é gbɔgbɔ gbɔ ɔ, e nu so nú bé: «Mí kpɔ ɖá! Israyɛlivi adodui ɖeka ge. Enuficificiwawa de le lanmɛ nii go.» ⁴⁸ Natanayɛli biɔ Yesu se be: «Fini yí è jeshi ŋ ɖɛ le ɔ?» Yesu ɖoŋci nii be: «Ŋ kpɔ eo le figici lɔ gɔnmɛ gbɔxwe yí Filipu a vá yɔ eo.» ⁴⁹ Gahɔnmɛ yí Natanayɛli trɔxɔ nuxu yí nu bé «Cicagan, eo yí nyí Mawu eviɛ lɔ, eo yí nyí Israyɛli 'fiɔ lɔ.» ⁵⁰ Yesu ɖoŋci nii be: «Ci yí ŋ nu nɔ́ eo be ŋ kpɔ eo le figici lɔ gɔnmɛ ɔ, é yí dɔ́ yí è xɔ ŋ ji se a? Á gbe kpɔ enu gangan buwo sɔwu hɔn!» ⁵¹ Yesu ɖoŋci nii bé : «Le nyɔnɔnui mɛ ɔ ŋ nunuɔ nɔ mí be mí a vá kpɔ́ yí jiŋkushi a le hunhun yí Mawu dɔlawo a yiyiɛ eji yí a ɖyiɖyiɛ je "Agbetɔvi lɔ ji.»