¹ Nɔvinyɛwo, ci yí mí xɔ mìwo 'xwetɔ klɛnklɛnnɔ Yesu Kliso ji se ɔ, mí ŋgbe sɔ amɛmɛ cancan bɔdo xɔse lɔ ŋ go. ² Le kpɔwɛ mɛ ɔ, ehotɔnɔ ɖe vá míwo 'ha mɛ yí dó shika 'lɔgavi yí gbe dó cigan 'wuwo yí wamɛnɔ ɖeka cán vá hɛnne yí do awu xoɖyixoɖyiwo. ³ Nɔ́ mí ɖo bubu nɔ amɛ ci yí do cigan 'wowo yí gbe ni nii be: « Nɔ́ anyinɔnɔ do mɛganwo ɛinkpin cɛ ji » vɔ yí va& nú nɔ́ wa mɛnɔ lɔ bé: « Eo yɛ ɔ, nɔ́ ete do hɔn, alo nɔ́ anyinɔnɔ do anyi 'fɔxa ɔ,» ⁴ mí de cán amɛ mɛ le míwiɖeɖewo mɛ lo? Alo mí de trɔ́ kojoɖotɔ ciwo yí susumɛ baɖa nɔ nɛnɛ ló? ⁵ Nɔvinyɛ veviwo, mí ɖo eto a se. Mawu de cán amɛ ciwo yí nyí wamɛnɔwo le xexe cɛ 'nukpɔkpɔ mɛ keŋ nɔ́ wo a je dɔku le xɔse mɛ yí a kpɔ́ wowo 'kpaxwe a xɔ le efiɔɖuxu ci ŋgbe yí é do ɖaɖɛ nɔ́ ciwo yí lɔnni ló? ⁶ Vɔ yí míwo ɔ míwo gbali wamɛnɔwo a! Ɖee, d'é nyí ehotɔnɔwo yí tanɔfu mi do yí dɔnɔ mí yi ehwɛxɔnu ehwɛxɔnuwo ló? ⁷ D'é wowo lɔwo yí nunɔ enyɔwo yí sɔ́ xonɔ eɖyi nyikɔ acɔtɔ ci yí wo yɔnɔ dó mí ŋ ló? ⁸ Nyao ɔ, nɔ mí wawa do jiŋkushimɛ 'fiɔɖuxu lɔ 'sé ji shigbe leci yí wo ŋwlɛ daɖɛ do Mawu 'nyɔ wemawo mɛ nɛnɛ bé: « ɛ́ ɖó a lɔn ao kpena shigbe eo ŋtɔ han nɛnɛ ɔ,» mí wɛɛ nyuiɖe. ⁹ Vɔ nɔ́ mí cancan amɛ mɛ ɔ, mi wawa enuvɔn, yí mí je ese 'hwɛ mɛ ɖó mí da le ji. ¹⁰ Ɖó nɔ́ amɛɖe wanɔ do Mawu 'sé lɔ ji blebu gankegan yí vá da le ɖeka kpaŋ ji ɔ, ese lɔ blebu yí amɛ lɔ gban. ¹¹ Ɖó ɔ, amɛ ci yí nú bé: « ŋgbe wa ehao 'shi o » ɔ, é yí lɔ ké yí gbe nu be: « ŋgbè wú amɛ o. » Ci yí é le nɛnɛ ɔ, d'è yí nyɔnu alo nyɔnuvi ci yí de de ashio gbɔ o gankegan yí wu amɛ ɔ, á nyi é gban Mawu "se le blebu mɛ. ¹² Ci yí é le nɛnɛ ɔ, mí xonɔ nuxu yí a wanɔ enu anyinɔnɔ do ese ci yí nanɔ vovo amɛ ji yí a ɖo kojo kodo nɛnɛ. ¹³ Ɖo ɔ, kojoɖodo lɔ d'á vá kpɔ́ ŋshishi nɔ amɛ ci yí de kpɔnɔ ŋshishi nɔ yí kpena o. Vɔ ɔ, ŋshishi kpɔkpɔ a ɖu kojoɖoɖo ji. ^{14 15} Nɔvinyɛwo, nɔ́ amɛɖe nu be: « Ŋ xɔ Mawu jí se», vɔ yí dé doasɛ lehanci yí é xɔ Mawu ji se do sɔ́ to yí 'nuwawawo mɛ ɖe, ele hi yí le mɛ nii ɔ? Xɔse hɔn lɔ a sɛ́n eŋ ahwlɛn amɛ lɔ gán téŋ a? Le kpɔwɛ mɛ, nɔvi ŋsu alo nyɔnu ɖe de ɖó awu ci yí á do o alo enu ci yí á ɖu le gbeɖeka mɛ o. ¹⁶ Eyi míwo domɛtɔ ɖeka va nú nɔ́ wo be: « Mí seyí le fafamɛ. Mí dɔn avɔ a sɔ́ xé vuvɔ nɔ míwoɖekiwo yí a ɖu enu nɔ́ xodu a ɖɔ́ mí!» Ma sɔ enu ci yí ʒián nɔ́ gbaza lɔ nɔ́ wo ɖee, nyí wanu yí nyí nɛnɛ ɔ? ¹⁷ Nɛnɛke yí é nyi dó nɔ́ xɔse nɛ: nɔ́ esedɔwawawo de le xɔse lɔ mɛ o ɔ, xɔse; lɔ nyí enu kuku le yiɖeki mɛ. ¹⁸ Vɔ amɛɖe anú be: « Eo ɖe, é ɖo xɔse; enyɛ ṣe, ŋ ɖo edɔwawawo.» Ma ɖoŋci nii be: « Dó asɛ ao xɔse edɔwawa mana nɔ mɛtɔ lɔ nɔ́ ŋ. Eyí sɔ́ to nyaŋ xɔse nɔ eo. » ¹⁹ É xɔse be Mawu Kuɖeka kpáŋ yí li, á wɛɛ nyuiɖe. Vɔ gbɔngbɔnvɔnwo cán xɔ́ɛse nɛnɛ hɛnnɛ yí hunhunhun ɔ. ²⁰ Ŋunumanyatɔ! È ji be ye a nyá bé xɔseɖoɖo edɔwawawo mabɔ do ŋ o ɔ, enugbali yí é nyi a? ²¹ Mówo tɔgbi Ablahamu ɖee, Mawu de xɔ́ wa amɛjɔjɔɛ do edɔwawawo ŋci nɔ́ ci yí é sɔ eviɛ Ezaki wa enunana dó avɔsakpe ji ŋci ló? ²² D'é kpɔ́ be yi xɔse kodo yi 'dɔwawawo ba wawa edɔ do eju yí é nyi kpɔ bé to yí 'dɔwawa lɔwo jí yí yi xɔse sɛn eŋ yí de blebu ló! ²³ Nɛnɛ yí enɔ ci yí wo ŋwlɛ do Mawu 'nyɔ wemawo mɛ vayi va mɛ do nɛ: «Ablahamu xɔ Mawu ji se yí Mawu hlin nii dó jɔjɔɛ nyinyi jí». Eyi wo gbe yɔ Ablahamu be Mawu 'xlɔ́. ²⁴ Mí de kpɔɛ ló! Edɔwawawo yí mawu kpɔnɔ yí sɔ́ amɛ wanɔ amɛjɔjɔɛ le yí ŋmɛ. D'é nyí kpɔ́ bé xɔse ɖekɛ jí yí é cunɔ afɔ do go. ²⁵ Nɛnɛke yí & nyi nɔ́ Hlahabu, nyɔnu sakabo lɔ nɛ. Mawu sɔ́ eyɛ cán wa amɛjɔjɔɛ le ŋmɛ nɔ yiɖeki do edɔ ci yí é wa ŋci dó mɛdru ci yí é xɔ Isryɛlivi ciwo yí nyi amɛdɔdɔwo yí drá emɔ bu nɔ́ wo yí wo trɔyi axwe ŋci. ²⁶ Shigbe lehanci yí nɔ́ gbɔngbɔn to le lakpan ɖe mɛ á trɔ́ lankpukuku dó nɛnɛ ɔ, nɛnɛke nɔ́ edɔwawawo de bɔdo xɔse ŋ o ɔ, xɔse kuku yí é nyi nɛ.