¹ Wema cɛ so enyɛ, Pɔlu amɛ ci yí nyí Yesu Kliso 'mɛdɔdɔ sɔ́ to mawu 'dro mɛ gbɔ. Ŋ ŋwlɛ wema cɛ ɖaɖa amɛ ciwo yí nyí xɔsetɔwo yí gbe nyi amɛkandojiwo le Yesu Kliso mɛ le Efɛzi jugan mɛ. ² Mawu, mìwo 'da kodo Axwetɔ Yesu Kliso lé wa xomɛvunu nɔ́ mí yí a ná fafa mí! ³ Mí na nɔ́ mí a kanfu mawu, ci yí nyí Eda nɔ mìwo 'xwetɔ Yesu Kliso: amɛ ci yí sɔ́ gbɔngbɔnmɛ shicuwo pleŋ ciwo yí le jeŋkushi mɛ nɔxuwo sɔ́ cú eshi nɔ mì le Kliso lɔ mɛ. ⁴ Mawu doŋkɔ yí can mì dó akpo nɔ́ mì a nyí yitɔ gbɔxwe yí a vá ɖó xexe lɔ 'nyiɖuwo. É wɛɛ nɛnɛ nɔ́ mì a nyí amɛkɔkɔɛwo kodo amɛ ciwo nú yí afɛn ɖé de le o le yi ŋmɛ. Le lɔnlɔn ci yí e ɖo nɔ́ mì mɛ ɔ, ⁵ é sɔ́ gbeta xoxoxo bé ye a sɔ́ mìwo sɔ́ wa ye vi yewo sɔ́ to Yesu Kliso ji. Nɛnɛ yí é droi dó yí xo nɛvuwan amɛ mɛ nɛ. ⁶ Nɛnɛ nɔ́ mì gangangan. É ná enuwo mì gɔɖɔɔ afenutɔ le eviɛ vevi lɔ mɛ. ⁷ Sɔ́ to eviɛ lɔ 'hun mɛ ɔ, Mawu hwlɛn mì gán le enuvɔn jɔjɔmɛ shi mɛ yí xɔ mìwo 'fɛnwosɔsɔke le xomɛvunu gangan ci yí é wawa nɔ mì mɛ . ⁸ É wɛɛ nɔ mì sugbɔ haan sɔ to ŋunyanya kodo ŋɖɛnyanya akoŋka ciwo yí é na mì mɛ. ⁹ É ná yí jeshi enudanŋdonu ci yí le edro mɛ nii, é wa xomɛvu tomɛ hɔn ci yí gbeta yí e sɔ daɖɛ xoxoxo bé ye a wa to Kliso lɔ jí. ¹⁰ Mawu a wa tomɛ lɔ vɛ mleŋ le ŋkeke vɔvɔtɔ lɔwo mɛ: é yí nyí kpɔ́ bé á bɔ enu ciwo yí le jeŋkushi mɛ kodo ciwo yí le nyigban jí dó Kliso lɔ gɔnmɛ. ¹¹ Mí kpɔ́ mìwotɔ yí xɔ le enunana lɔ mɛ le Kliso lɔmɛ. Ɖó Mawu doŋkɔ yí cán mì ɖɛ́ sɔ́ to totomɛ ci yí é wa mɛ. É yí wanɔ enu le enushanu mɛ shigbe lecihan yí é sɔ gbeta lɔwo dó le yi 'dró mɛ do nɛnɛ. ¹² Mìwo ciwo Mawu doŋkɔ yí cán ɖɛ́ nɛnɛ yí mì nyí amɛ ŋkɔtɔ, ciwo yí sɔ́ míwo 'mɔkpɔkpɔ dado Kliso lɔ jí ɔ, é wɛɛ nɛnɛ nɔ́ mì a kannɔfu yi gangangan. ¹³ Míwo cán hwecinu yí mí se nyɔnɔnui nuxu lɔ, ci mɛ yí mawu to yí hwlɛn mí gan ɔ, mí xɔ Kliso lɔ jí se. Eyi nɛnɛ ɔ Mawu sɔ́ yiŋtɔ jeshidu ci yí nyí Gbɔngbɔn kɔkɔɛ, ci 'gbe yi é ɖo lɔ sɔ́ na mí. ¹⁴ Gbɔngbɔn kɔkɔɛ lɔ yí nyí enunana ciwo yí mì a xɔ le mawu mɛ ekpeɖojinuwo. É nana kankandoji mì bé mì a vá kpɔ́ wo a xɔ hwecinu yí Mawu a vá hwlɛn mì gan vɛ blebu nɔ́ mí a kannɔfu yi gangangan. ¹⁵ É yi ná taɖo yí enyɛ can ci yí wo xo míwo xɔse ci yí mí ɖo nɔ́ Axwetɔ Yesu 'nyɔ nɔ ŋ kodo lehanci yí mi lɔnlɔn xɔsetɔwo pleŋ dó ɔ, ¹⁶ ŋ de mí akpe dodo nɔ Mawu dó mìwo 'ta gbeɖe o. Ŋ ɖonɔ eŋui mí nii le anyi gbedoɖa wo mɛ, ¹⁷ nɔ́ mìwo 'xwetɔ Yesu Kliso, Mawu Eda bubutɔ lɔ a ná ŋununya nya kodo enuɖedoasɛ gbɔngbɔn ci yí a ná yí mí a jeshi mawu ɖɛ́ mí. ¹⁸ Lé klɛn nɔ́ míwo 'ji ŋkuniwo nɔ́ mí a mɔŋje emɔkpɔkpɔ ci yí mí a kpɔ a xɔ le gbɔ lɔ nyí dɔkunu gangan nɔ́ xɔsetɔwo do mɛ. ¹⁹ É le nɛnɛ hɛnnɛ nɔ́ mí a gbe mɔŋje lehanci yí mawu ŋsɛn gangan manumanutɔ yí li ɖɛ nɔ́ mìwo ciwo yí xɔɛ ji se do. Yi ŋsɛn manumanu hɔn ɔ, ²⁰ é vlúi doasɛ le Kliso lɔ mɛ yí fɔ́in so ekuwodi yí sɔ́ anyinɔnɔ do yi ɖushimɛ le jeŋkushi mɛ nɔxuwo mɛ. ²¹ Mawu sɔ́ ɖó eta nɔ gbɔngbɔnmɛ 'ga ɖekpokpoi, gbɔngbɔnmɛ 'cɛkpatɔ ɖekpokpoi, sɛn ɖekpokpoi, efiɔɖuɖu ɖekpokpoi yí gbe sɔɛ ɖó eta nɔ nyikɔ ɖekpokpoi ci yí wo a sɛ́n eŋ yɔ́ drú le xexe cɛ mɛ alo le kaka xexe ci yí gbɔgbɔ mɛ can. ²² Mawu sɔ́ enuwo pleŋ ɖó Kliso lɔ 'fɔwo gɔnmɛ é sɔ́ɛ ɖó eta nɔ enuɖekpokpoi. É sɔ́ɛ wa eta nɔ Mawu 'há lɔ ²³ ci yí nyí kliso lɔ ɖɔ́ blebu ý gbe ɖɔ xexe lɔ mɛ blebu