¹ Ŋ bibiɔ enu cɛ so eo gbɔ veviɖe le Mawu kodo le Yesu Kliso ci yí a vá ɖó kojo amɛkukuwo kodo amɛleagbewo ŋmɛ. Ŋ biɔbiɔɛ eo le Yesu Kliso lɔ trɔtrɔgbɔ kodo yi 'fiɔɖuɖu nyikɔ mɛ be: ² Dó axwa yí a nunɔ Mawu 'nyɔ lɔ. Nùnɔ enyɔ lɔ hweɖekpokpoinu. Hwenu lɔ nyɔ́ cán, de nyɔ́ cán, nui. ká aɖyi enu, gbè enyɔ nɔ amɛ, dó eji exo nɔ amɛ yí axɔnɔ jigbɔnɖɛ tɛgbɛɛ nɔ́ è le enu kplangɔ amɛ. ³ Ɖó ɔ, gamɛ gbɔgbɔgɔ yí awewo d'a gbe va lɔnnɔ enukplankplan nyuitɔ lɔ go. Vɔ ci yí é nyi enu yí drodro wowoŋtɔwo bé wo a le eklanwo seɛgɔ ɔ, wo a vá xɔ enukplanmɛtɔwo kɔɖɛ yí wowo a le enyɔ ci wo yí a vivinɔ sese nɔ wo nuɔgɔ. ⁴ Wo a vá cú eto dó nyɔnɔnui lɔ sese keŋ yí a vá li ɖɛ nɔ́ exocucu gbaliwo sese. ⁵ Vɔ eo yɛ ɔ wắnɔ enushanu do lehanci yí é ɖo a nɔ do a nɔ dojí. Lɔ́n yí a ɖu aya. Dó Mawu 'dɔ́ ci yí è xɔ vɛ blebu. ⁶ Enyŋɛ yɛ ɔ, le shigbe amɛci yí wo jijiɛ a sɔ́ sá avɔ nɛnɛ vɔ yí anyi soso le xexe cɛ mɛ gamɛ ɖo. ⁷ Ŋ wa ahwa enyuitɔ lɔ. Ŋ ɖo vɔvɔnu nɔ anyi 'jushishi. Ŋ le xɔse lɔ gogoiɖe. ⁸ Ecɛyɛ ɔ, Mawu sɔ& jɔjɔɛnyinyi fiɔkuku lɔ daɖɛ nɔ́ ŋ. Axwetɔ, kojojɔjɔɛɖotɔ a vá sɔ́ na ŋ le gbehɔngbe. D'é nyí enyɛ ɖekɛ yí a va sɔɛ ná go. vɔ, á vá sɔ́ɛ ná amɛ ciwo pleŋ yí ŋ nɔnɔ eté kpɔ yí trɔtrɔgbɔ lɔ le lɔnlɔn mɛ. ⁹ Evinyɛ Timɔte, tèkpɔ a vá ŋ gbɔ kaba. ¹⁰ Dó ɔ, Demasi xato xexe cɛ mɛ 'nuwo nú yí sogbe ŋ ɖɛ yí yi Tɛsaloniki jugan mɛ. Klɛshansi yɛ yi Galati 'kan mɛ. ¹¹ Luiki ɖekɛ yí kpɔtɔ le ŋ gbɔ. Nɔ́ è gbɔgbɔgɔ ɔ, kplɔ́ Maki vɛ nɔ́ ŋ. Ɖó ɔ é nyí amɛ vevi nɔ́ ŋ le Mawu 'dɔ́ lɔ mɛ. ¹² Ŋ ɖo Tishiki ɖaɖa Efɛzi jigan mɛ. ¹³ Nɔ́ é gbɔgbɔgɔ ɔ, ná sɔ vuvɔwu ci yí ŋ gbeɖɛ dó kaposi 'xwe mɛ le trowasi jugan mɛ vɛ nɔ́ ŋ. Sɔ́ wema lɔwo vɛ́ nɔ́ ŋ, veviɖe ciwo yí wo sɔ́ elan gbaza wa. ¹⁴ Alɛshandru ci yí nyí gbɛdɛ wa enu vevi sugbɔ kodo ŋ. Axwetɔ a ɖó edɔ ciwo yí é wa tɔxu nii. ¹⁵ Eɔ can, nyá zɔnzɔn le nu. Ɖó é fɔ́n egu sɛnŋsɛnŋɖe dó mìwo 'nyɔwo nu. ¹⁶ Ŋkɔtɔ ci yí ŋ hwlɛn eta nɔ enyɛɖeki le ehwɛxɔnu ɔ, amɛɖekpokpoi de vá dó alɔ ŋ go. amɛshamɛ so gbe ŋ ɖɛ. Mawu ŋgbe kpɔ dó yɛ nu yí a wa enuɖe kodo wo go. ¹⁷ Axwetɔ yí dó alɔ ŋ yí gbe sɔ ŋ wa ŋsɛntɔnɔ. Nɛnɛ ɔ, ŋ sɛn eŋ dó axwe yí dó Eŋɛnyui lɔ blebu nɔ́ amɛmanyi Yuɖatɔwo pleŋ yí wo sii. ¹⁸ Axwetɔ a hwlɛn ŋ gan le edɔwawa 'vɔnwo pleŋ mɛ yí a xɔ ŋ gan nɔ ma yi yi 'fiɔɖuɖu mɛ le jeŋkushimɛ. Yitɔ yí nyí kanfukanfu sɔyí mavɔmavɔ! Xoadyi! ¹⁹ Ɖó egbe nɔ Plishika kodo Akilasi nɔ ŋ. Dó egbe nɔ Onɛzifɔ xomu nɔ ŋ hɛnnɛ. ²⁰ Elasi yɛ cí kolɛnti jugan mɛ yí ŋ tashi trofinu ci nu ci nu yí agan de le o do Milɛ jugan mɛ. ²¹ Tekpɔ́ yí a vá ŋ gbɔ gbɔxwe nɔ́ vuvɔ hwenu a ɖo. Ebuli, Puɖɛnsi, Linu kodo klodiya kodo nɔvi kpɛtɛwo pleŋ dó egbe ɖaɖa eo. ²² Axwetɔ lé nɔ kodo ao gbɔngbɔn! Mawu lé wa xomɛvunu nɔ́ mí!