¹ Eo yɛ ɖe, evinyɛ, kpɔ́ ŋsɛn le xomɛvunu ci yí le Yesu Kliso lɔ mɛ mɛ. ² Enyɔ ci yí è se yí ŋ nu le kunuɖetɔ sugbɔ ŋmɛ ɔ, sɔ̀ kplán enu amɛ ciwo jí yí e kando. Nɛnɛ 'mɛ lɔwo lé nyí amɛ ciwo yí a gbe va sɛn eŋ sɔ́ enyɔ lɔ kplan enu amɛ buwo hɛnnɛ. ³ Lɔ̀n a ɖu aya kodo ŋ shigbe Yesu Kliso sɔja adodui ɖé nɛnɛ. ⁴ Nɔ́ sɔja ɖe yigɔ ahwa yí jí bé ye a wa enu nɔ́ a jɔ eji nɔ ye 'gá ɔ, d'é ɖó a lɔ́ gbɛmɛ 'nyɔwo kplá ekɔ nɔ yiɖeki go. ⁵ Nɔ ejushitɔ ɖé de le eju shiɛgɔ do ɖoɖo ciwo yi li nu go ɔ, wo d'a sɛ́n eŋ sɔ́ ejiɖuɖu 'fiɔkuku lɔ jó nii go. ⁶ Agbledetɔ ci yí ɖɔɖɔ eŋ yí le edɔ wagɔ sɛnŋsɛnŋɖe yí a gbe nyi amɛ ŋkɔtɔ ci yí a ɖu jinuku sɛnsɛn lɔwo. ⁷ Sè enyɔ ci yí ŋ nunuɔ gɔnmɛ nyuiɖe. Axwetɔ a na ŋɖɛnyanya eo le enuwo pleŋ mɛ. ⁸ Ɖò eŋui Yesu Kliso, Davidi jijimɛvi lɔ ci yí fɔ́n so ekuwodi shigbe lehanci yí Eŋɛnyui ci yí ŋ dodoɔ nɔ amɛwo nuinuiɛ do nɛnɛ. ⁹ Eŋɛnyui hɔn lɔ ŋci yí ŋ le efunwo kpeɛgɔ do nɛ kaka to gakpamɛnƥtɔwo 'funkpekpewo mɛ hɛnnɛ shigbe enubaɖawatɔ ɖé yi ŋ nyi nɛnɛ. Vɔ ɔ, Mawu 'nyɔ yɛ de le gakpamɛ go. ¹⁰ É yí ná taɖo yí ŋ lɔn yí le ayawo pleŋ ɖuɔ do eta nɔ amɛ ciwo yí Mawu cán keŋ nɔ́ Yesu Kliso ahwlɛn wo gán yí a gbe na klɛklɛn gangan mavɔmavɔ lɔ wo. ¹¹ Enyɔ ci ji yí wo a kando ɖeka ge: « Nɔ́ mì kù kodoi ɔ mì a gbe va nɔ agbe kodoi hɛnnɛ; ¹² nɔ́ mì dó eji sɔyi vɔvɔnu ɔ, mi a vá ɖu efiɔ kodoi hɛnnɛ; nɔ mì gbíi ɔ, eyɛ cán a vá gbé mì hɛnnɛ. ¹³ Nɔ́ mìwo de le egbeji nìi go ɔ, yɛ kpɔtɔ le egbeji. Ɖó ɔ, yɛ d'a sɛ́n eŋ gbé amɛ ci yí é nyi nyinyi go.» ¹⁴ Ɖò eŋui enyɔ cɛ nɔ amɛwo pleŋ yí a kanxle wo le mawu ŋmɛ be wo ŋgbe va le enu wagɔ do enyɔkui gbaliwo ji go. Evu hɔnwo de dranɔ enu dó go. Vɔ ɔ, wo gble nɔ amɛ ciwo yí senɔ wo. ¹⁵ Tekpɔ yí a jɔ le Mawu ŋmɛ shigbe amɛ ci yí tó enuwo mɛ kpɔ nɛnɛ , shigbe edɔwatɔ ɖé ci 'dɔwawawo de nyinɔ ŋkpɛn nɔ yiŋtɔ go nɛnɛ. Tekpɔ yí a donɔ nyɔnɔnui nuxu lɔ 'ŋɛ jɔjɔɛɖe. ¹⁶ Zé nɔ nuxu vɔ́nvɔ́n xoxo, nuxu ciwo yí de jɔnɔ eji nɔ Mawu go xoxo. Ɖó ɔ, amɛ ciwo yí xonɔ nuxu hɔnwo tenɔ le Mawu nú yí a yigɔ. ¹⁷ Amɛ hɔn lɔwo nuxuwo a le shigbe jemakui han nɛnɛ yí xɔnɔ texwe le gotu nɔ amɛwo. Imɛnɛ kodo Filetosi le amɛ hɔn lɔwo mɛ. ¹⁸ Wo teso nyɔnɔnui 'mɔ́ lɔ jí yí nunuɔgɔ bé Mawu fɔ́n amɛwo so ekuwodi vayi vɔ. Nɛnɛ ɔ, wo cakacaka susu nɔ́ amɛɖewo le xɔse mɛ. ¹⁹ Vɔ ɔ, anyiɖu lolo ciwo yí Mawu ɖó anyínɔnɔ kpɔtɔ li ɖɛ yí wo ŋwlɛ yí sɔ́ dó wo jí bé: «Axwetɔ jeshi amɛ ciwo yí nyí yi 'mɛwo!» Wo gbe ŋwlɛ bé: «Amɛɖekpokpoi ci yí nú be ye nyi Axwetɔ tɔ ɖo a shi nɔ esejidadale.» ²⁰ Keŋɖe, le axwe gangan ɖé mɛ ɔ, d'é nyi shika kodo ehokɔ 'gbanwo ɖekɛ yí wo kpɔnɔ go. Vɔ ɔ, wo kpɔnɔ aci kodo esu 'gbanwo hɛnnɛ. Agban ɖewo li ɖɛ nɔ́ zanzan le bubu doamɛnu hwenu yí eɖewo li ɖɛ nɔ́ zanzan gbaliwo. ²¹ Nɛnɛ ɔ, nɔ́ amɛɖe klɔ́ eɖyi so yiɖeki nú yí mí enuvɔn hɔnwo wawa ɔ, mawu a ná yí á nyi agban ci yí á li ɖɛ nɔ́ zanzan le bubudoamɛnu hwenu. Á ɖii do akpo yí á nyi agban vevi nɔ́ yí xwetɔ, agban ci yi ali ɖɛ nɔ́ edɔ enyuiwo pleŋ wawa. ²² Shì nɔ́ matelinu ciwo yí dronɔ dajɛvi kodo cugbejɛviwo. Vɔ ɖe, nyà axu nɔ jɔjɔɛnyi nyi, xɔse, lɔnlɔn kodo fafa kodo eji mɛmi lé. ²³ Gbènɔ enyɔ xloxlowo dɔndɔnkpɔ. é nya nyuiɖe bé evuwawwo yí wo dɔnnɔ va. ²⁴ Vɔ ɔ, Axwetɔ 'dɔwavi ɖé de ɖo a wanɔ evu go. É ɖó a nyí amɛ ci yí lɔnnɔ amɛshamɛ, a nyá enu a kplán amɛwo nyuiɖe yí agbe nyi amɛ ci yí ezu d'& venɔ go. ²⁵ Mawu 'dɔwavi ɖó a dré enu gɔnmɛ nɔ amɛ ciwo yí fɔnfɔn egu dó ji kodo ecufafa. Nɔ́ é wɛɛ nɛnɛ ɔ, Mawu a to hɔn drù yí a ná amɛ lɔwo a trɔ́ wowoɖekiwo aji yí a jeshi nyɔnɔnui lɔ. ²⁶ Nɛnɛ ɔ, wo a gbɔ va wowoɖekiwo mɛ yí a tó le feca ciwo mɛ Legba lé wo dó yí sɔ́ wo wanɔ do yí 'dró ji mɛ.