¹ Enyɛ ɔ, ŋ sɔ gbeta be ŋ d'a trɔgbɔva mí gbɔ yí a va kpɔ mí le ŋshishi mɛ go. ² Ɖó nɔ́ enyɛŋtɔ ná yí mí ci ŋshishimɛ ɖee, mi ŋci yí enyɛ na va kpɔ jijɔ do ɔ? Amɛ ci yí ŋ na yí é ci ŋshishimɛ lɔ yɔ́ a? ³ Ŋ ŋwlɛ enu hɔn ɖaɖa mí vayi be nɔ́ ŋ va ɖó mí gbɔ ɔ, amɛ ciwo yí ɖo a do jijɔ nɔ ŋ ŋgbe va wɛɛ nɔ ma ci ŋshishi mɛ go. Ŋ trɔ ɖo kankandoji cɛ do míwo pleŋ ji be nyan jijɔ ɔ, míwo pleŋtɔ yí nyi hɛnnɛ. ⁴ Vevisese gangan mɛ yí ŋ le vayi, xomɛ de vo nɔ ŋ go yí ŋ le avin ji gacimɛ yí ŋwlɛ enu hɔn ɖaɖa mí. D'é nyi be ji ŋ jijiɛ be míwo le ci ŋshishi mɛ yɔ go, vɔ ɔ, nɔ́ mí a jeshi lehanci yí nyaŋ lɔnlɔn sa ekɔn nɔ mí do. ⁵ Nɔ́ é nyi be amɛɖe na yí yi kpena ci ŋshishimɛ ɔ, d'é nyi enyɛ yí é sɔ do ŋshishimɛ go. Vɔ ɔ, míwo pleŋ yɔ́. Nɔ́ mì d'a gangan enyɔ lɔ gbali go ɔ, míwo 'kpa ɖeka yí é sɔ do ŋshishimɛ. ⁶ Nɔ́ amɛ akpagantɔ gbe enyɔ no nɛnɛ 'mɛ ɔ, é sun nɛnɛ. ⁷ É yí ná taɖo ɔ, mí tashi enyɔgbegbe nii, mí sɔ ehwɛ kii yí a do ŋsɛn lanmɛ nii. Nɔ́ d'é nyi nɛnɛ go ɔ, a va ci ŋshishi sugbɔ kaka a va dan eta nɔ yiɖeki. ⁸ Ci yí é le nɛnɛ ɔ, ŋ dodoɔ ŋsɛn lanmɛ nɔ mí be míwo le ɖe lɔnlɔn 'fɔ ɖaɖa gbɔ́. ⁹ Ɖó ci yí ŋ ŋwlɛ enu ɖaɖa mí vayi ɔ, ŋ ji be ma sɔ́ do mí kpɔ a kpɔ be míwo nyi etonusetɔ le enushanu mɛ mɛ́. ¹⁰ Nɔ́ mí sɔ enu sɔ enu sɔ ke amɛɖe ɔ, enyɛ can ŋ sɔ kii. Nɔ́ enyi be enyɛ, ŋ ɖo a sɔ enu sɔ ke amɛɖe yí ŋ sɔ kii ɔ, míwo ' ta yí ŋ wɛɛ nɛnɛ do le Kliso lɔ ŋmɛ. ¹¹ Ŋ wɛɛni nɛnɛ nɔ mí ŋgbe va tashi Legba nɔ́ a kpɔ emɔ le mí nú. Ɖó ɔ, mí jeshi enu ciwo yí nyi yí totomɛwo ɖɛ nyuiɖe. ¹² Ci yí ŋ va ɖo Trowasi jugan mɛ yí a dó Kliso lɔ 'ŋɛnyui nɔ ɔ, ci yí Axwetɔ hun emɔ nɔ ŋ faa be enyɛ lé wɛɛ can ɔ, ¹³ nyaŋ 'ji de vo go. Ɖó ŋ de kpɔ nɔvinyɛ Titu le hɔntɔxu go. Nɛnɛ ɔ, ŋ klan Trowasi jugan 'mɛtɔ lɔwo yí so le hɔntɔxu yí vayi Maseduwanu 'kanmɛ. ¹⁴ Kafukafu nɔ Mawu ci yí kplɔkplɔ mì tɛgbɛɛ do Kliso lɔ 'jiɖuɖu 'hwakpa mɛ. É totoɔ mí ji yí na yí amɛwo jejeɛshi Kliso lɔ hwɛnhwɛn le afishafi. ¹⁵ Nyao ɔ, mì nyi Kliso lɔ 'mihwɛnte nɔ́ Mawu le amɛ ciwo yí le hwlɛnga 'mɔ jí domɛ kodo amɛ ciwo yí trɔntrɔn 'mɔ jí domɛ. ¹⁶ amihwɛnte lɔ hwɛnhwɛn lɔ nyi eku hwɛnhwɛn yí kplɔ amɛwo yigɔ ekumɛ. Nɔ& amɛ kpɛtɛwo ɔ, é nyi agbe hwɛnhwɛn ci yí kplɔ wo yigɔ agbe mɛ. Mí yí a sɛn eŋ sun edɔ hɔn jí yí a wa ɔ. ¹⁷ Mì de le shigbe amɛ sugbɔ ciwo yí sɔ Mawu 'nyɔ wa ajɔdodo 'nyɔ nɛnɛ go. Nyɔnɔnui yí mì nunuɔ, Mawu yí dɔ mì, yi ŋmɛ kodo Kliso lɔ mɛ yí mì xonɔ nuxu le.